YEREMIA 9 - BALA LUK DO'

¹ Kudeng uluhku bued abpa', idi matehku mepanu' ku abpa' mateh, ui miak nangi' tebaco kedangan kuan pupuku luk pangeh pinaté.

² Meluun do' ui tudo su luk ali-ali, pad ui miak mepatad ratnan pupuku. Ngaceku ideh na lutep maya' jani'deh. Ideh aceh rurum luk masui lun dengandeh.

³ Ideh megéi' mebalih; idi baken luk matu iamo' balih luk ngimet tana' ini. Kebala Tuhan, “PupuKu na ugka' nganau' luk dat, idi na ideh pian maya' Negku.”

⁴ Do' anid burur matar lun rurumneh, ngaceku na miak merapet ku kinanakmu; ngaceku anid kinanakmu naluk kudeng Yakub, idi lun rurum ngedat lun rurumneh.

⁵ Amung-amungdeh naluk lun rurumdeh, idi seburur pana' nateh mala luk matu. Dila'deh pekalai mebalih, ideh mesala', iamo' na ideh pian teketed ratnan sala'deh.

⁶ Ideh megéi' nganau' luk dat, idi megéi' naluk teh. Idi kebala Tuhan, “PupuKu na pian maya' Negku.”

⁷ Ngaceku ineh kebala Tuhan luk Meluun Melalud, “Ui pian nutun pupuKu mepad kudeng pirak. PupuKu pangeh nenganau' luk dat — kudanKu teh ideh?

⁸ Dila'deh mepad kudeng langan luk inan parir. idi tangdeh naluk nelun baken. Amung-amungdeh ngeruat bala luk do' kuan lun denganneh, iamo' setuneh ideh nganau' abpung kuandeh.

⁹ Petuluké Ui ngukum nedeh ngaceku amung ini? Petuluké Ui ngua' sala' aceh pupu luk kudeng ineh? Ui ini Tuhan pangeh nepebala.”

¹⁰ Keburi' Yeremia, “Ui miak nangi' kuan pegkung idi laman, ngaceku ideh pangeh netekering, idi na lemulun maya' ineh. Idi uni sapi' pana' nateh luk pedingeren su ineh. Amung suit idi pung luk meliput pana' pangeh neburo.”

¹¹ Kebala Tuhan, “Ui miak nganau' Yerusalim mangun ku ruma' tican, su luk inan galau tudo. Amung bawang Yahuda miak mangun ku su luk ali-ali idi na lemulun.”

¹² Idi Yeremia nengitun, “O Tuhan, ngudeh bawang ini tican idi metekering mepad kudeng su luk ali-ali, idi lemulun pana' nateh maya' ineh? Idé luk mileh pad ieh kali' ilungneh? Idé luk bida'Mu pad ieh miak mada' nelun baken?”

¹³ Idi Tuhan nengor bala Yeremia, “Amung ini pangeh nangun ngaceku pupuKu na pian maya' bada'Ku. Na ideh maya' Negku, idi na ideh nenganau' luk icukKu nedeh.

¹⁴ Iamo' ideh metueh niat idi nesembayang inan akang Baal maya' luk bida' tamandeh.

¹⁵ Ngaceku ineh ninger balaKu, Ui ini Tuhan luk Melalud, Allah lun Israil miak maré luk mepét kenen pupuKu, idi abpa' luk megalih pana' rupendeh.

¹⁶ Ui miak ngatad nedeh amé' arang pupu baken luk inandeh idi tepundeh na pekalai. Idi Ui miak ngecuk tuda'-tuda' baweh munu' nedeh pad ideh mabud maté.”

Lun Yerusalim Ngitang Mutuh Pedengan

¹⁷ Kebala Tuhan luk Melalud, “Ngerawé! Do' nawar lemulun luk mileh temido, ieh ineh decur luk mileh temido.”

¹⁸ Kebala lun mula', “Ngecuk nedeh miket nganau' aceh tido kuan tau, pad abpa' mateh tau remuat, pad bibir mateh tau mebara' ngaceku ucet nangi'.”

¹⁹ Ninger tangi' déi' Sion, “Tau pelaba dereh, idi inigu'deh! Na miak na tau necan bawang tau; ngaceku ruma' tau pangeh inusag.”

²⁰ Kebala Yeremia, “O decur, do' ninger luk bila Tuhan, idi maya' balaNeh. Mada' anak muyuh luk decur pad ideh mileh nangi' idi mada' rurum muyuh pad ideh mileh temido.

²¹ Até pangeh nacing maya' tabuk tau, idi pangeh nesemuet bang ruma' raca' tau, pad anak tau maté arang dalan, idi anak adi' deléi maté déi' kadai.

²² Butung lemulun miak uen ngatad mepad kudeng rimuk luk luun kabun, idi padé luk piranih luk tican luun lati'. Ini luk icuk Tuhan miak belénku.”

²³ Kebala Tuhan, “Na petulu lun mileh medita' niat ngaceku ilehneh, idi lun luk metueh ngaceku tuehneh, idi lun luk mula' binaweh ngaceku binawehneh.

²⁴ Kudeng seburur pian medita' niat, do' ieh medita' niat ngaceku ieh miti idi kali' Negku, ngaceku Ui ini Tuhan nganau' luk do', idi luk matu idi luk mesiri bang tana' ini. Amung ini luk pianKu. Ui ini Tuhan luk nepebala.”

^25-26 Kebala Tuhan, “Malé karebneh macing, idi Ui miak ngukum amung lemulun luk sinunat bang bururdeh, iamo' luk na sinunat bang niatdeh: ieh ineh lun Masir, Yahuda, Edom, Amon, Moab, idi amung lun luk tudo déi' su luk ali-ali idi luk kamu' abpuk. Amung pupu ini idi amung pupu Israil nateh sinunat bang niatdeh idi na ideh maya' balaKu.”