YEREMIA 8 - BALA LUK DO'

¹ “Idi kareb ineh amung tulang raca' idi lun rayeh Yahuda, dengan amung tulang imam-imam idi nabi, idi teh tulang amung lun baken luk tudo déi' Yerusalim, miak lapen rat bang tanemdeh. Ui ini Tuhan pangeh nepebala.

² Ideh miak uen ngelalad pa kiung aco, bulan, idi gituen luk inandeh mawa idi sembayang, luk uendeh ngitun idi maya'. Idi amung tulang ineh na miak uen ngamung idi tinamen, iamo' amung ineh mangun ku rimuk tana'.

³ Idi amung lemulun luk ketecan ratnan inul pupu luk dat ini, luk bang bawang su luk inanKu nengusu nedeh, pian maté. Ui ini, Tuhan luk Melalud, pangeh nepebala.

Ukum Sala'

⁴ “O Yeremia, Ui ini Tuhan pebala kuan pupuKu: Miakké lemulun mebpeh, idi na tumui teh? Miakké lemulun meraruh, idi na lemubed teh?

⁵ O pupuKu, ngudeh muyuh megéi' teketed rat Negku idi na uren? Muyuh merapet ku akang muyuh, idi ara' lumi Negku.

⁶ Ui pangeh neninger do'-do', iamo' na muyuh pebala' luk matu. Seburur pana' rat arang muyuh nateh nenginuud ngaceku datneh. Seburur pana' nateh nengitun, ‘Anun sala'ku?’ Anid-anid burur muyuh lutep maya' pianneh sebuleng, mepad kudeng kuda luk upun amé' matun bunu'.

⁷ Manuuk luk déi' langit pana' kali' karebneh temulud amé' bawang baken, kudeng ineh teh sukur, pelelueh, idi lal lakui. Iamo' muyuh luk pupuKu na kali' ukumKu nemuyuh.

⁸ Kudeng apehké muyuh pebala, ‘Kai mileh, kai inan ukum Tuhan?’ Siruh, guru-guru Ukum pangeh nengisu' ukum ineh.

⁹ Lun luk mileh arang muyuh uen ngigu', ngaceku balihdeh pangeh ginala'. Ideh pangeh nengarung balaKu idi anunké ilehdeh nekini?

¹⁰ Ngaceku ineh Ui miak maré decurdeh kuan deléi baken, idi lati'deh pana' kuan lun baken. Amung-amung lemulun, ieh ineh lun do' idi lun dat teh nakap usin dengan naluk. Nabi-nabi idi imam pana' nateh mesiri kekamen.

¹¹ Idi urat pupuKu uendeh ngubat ayu-ayuneh na ieh mebura', kebaladeh, ‘Do', do',’ iamo' na ieh do'.

¹² O pupuKu, inanké muyuh migu' ngaceku kekamen muyuh luk inanKu megateh? Na tu-tu muyuh mileh migu'! Ngaceku ineh muyuh miak mebpeh mepad kudeng lun baken. Kareb Ui ngukum nemuyuh, miak muyuh mabud maté. Ui ini Tuhan pangeh nepebala.

¹³ “Ui ini Tuhan miak ngaté amung pupuKu. Ideh mepad kudeng anggur luk na kebua', idi gita' pana', idi don-don pana' mekarang. Ngaceku ineh Ui miak ngua' kuandeh maya' kekamendeh.

¹⁴ “Ngudeh tau ungeng?” Kebala pupu Allah, “Do' tau miket amé' bawang luk linibung pad maté déi'. Tuhan Allah tau pangeh nemaré ukum maté kuan tau. Ieh pangeh nemaré abpa' luk megalih rupen tau, ngaceku tau nenganau' sala' pa kiungNeh.

¹⁵ Tau pian do' udeng, iamo' na ulekneh, tau pian uen ngedo', iamo' tot pangeh nacing netau.

¹⁶ Tau ninger uni kuda bunu' ineh, kareb ideh iné' pa tinueh busat aco macing bawang Dan. Kareb kudadeh muni amung tana' meruyuh. Ideh pian ngaro bawang tau dengan amung uangneh, idi ngusag bawang rayeh dengan amung lemulun teh.”

¹⁷ Kebala Tuhan, “Matar do'-do'! Ui miak maré menipeh arang muyuh, ieh ineh menipeh luk megalih luk na miak inan marot, idi ideh miak nicuk nemuyuh.”

Yeremia Dat Niat Ngerawé Pupuneh

¹⁸ Dat niatku na miak uen ngedo'. Bang niatku mét.

¹⁹ Ninger muyuh lun Israil! Aput tana' ui ninger pupuku ngitang, “Idiké Tuhan déi' Sion? Idiké Raca' Sion teh?” Idi Tuhan, raca'deh ngor baladeh, “Ngudeh muyuh nganau' Negku museh ku akang muyuh, idi allah pupu baken luk na lalud?”

²⁰ Idi pupu ineh ngitang, “Pangeh rikan, pangeh ngeranih, iamo' nateh tau nepuit ratnan bunu' tau.”

²¹ Niatku medereh ngaceku dereh pupuku. Ui temido idi pelaba dat niat.

²² Naké ubat déi' Giliad? Naké lun luk mileh ngubat déi'? Ngudehké ét pupuku nateh nedo'?