YEREMIA 7 - BALA LUK DO'

Yeremia Mada' Bang Ruma' Allah

^1-3 Tuhan nengecuk ni Yeremia amé' munung tanga' Ruma' Allah su luk inan lun Yahuda semuet kareb amé' sembayang. Idi Ieh nengecuk neneh tuped ieneh, idi mada' luk belén Tuhan, Allah lun Israil luk Melalud nedeh, “Ngisu' lawé muyuh idi kekamen muyuh, pad Ui maré nemuyuh lutep tudo ieni.

⁴ Aleg manu ku bala luk mebalih ineh, ‘Ini Ruma' Tuhan, ini Ruma' Tuhan, ini Ruma' Tuhan!’

⁵ “Ngisu' lawé muyuh idi kekamen muyuh. Do' maya' luk mesiri seburur dengan seburur.

⁶ Aleg muyok nelun sakai, anak maté idi tinula'. Aleg ngaté lemulun luk na mesala' bang bawang ini luk meligan. Ugka' ratnan sembayang inan allah baken, ngaceku dalan ineh luk ngaté nemuyuh.

⁷ Pad Ui miak maré nemuyuh lutep tudo bang bawang ini luk biréKu kuan tepun muyuh ku aceh babpat luk meruked.

⁸ “Siruh, muyuh merapet ku akang luk na ulek.

⁹ Muyuh mano, ngaté lemulun, pasét, mebalih dengan pebulung, maré luk sabpen kuan Baal, idi sembayang inan allah baken luk na muyuh kali'.

¹⁰ Muyuh nganau' luk inanKu megateh, idi muyuh tuped pa kiungKu, bang ruma'Ku sebuleng, idi pebala, ‘Tau na inan susa'!’

¹¹ Inanké muyuh ngerawé ruma'Ku ini inan lun luk mano sigapung? Ui kali' kekamen muyuh. Ui ini Tuhan pangeh nepebala.

¹² Amé' déi' Silo, luk pinili'Ku pun-pun inan muyuh sembayang Negku, idi nier anun luk inau'Ku ngaceku amung dat pupuKu Israil.

¹³ Muyuh pangeh nenganau' amung-amung sala' luk pangeh bibpengKu. Sagan pana' Ui megéi' pebala nemuyuh iamo' muyuh ara' ninger, idi kareb Ui nawar nemuyuh, muyuh na sikal ngor balaKu. Ui ini Tuhan pangeh nepebala.

¹⁴ Ngaceku ineh Ui miak nganau' kuan ruma'Ku ini luk inan muyuh merapet luk inau'Ku déi' Silo. Ui miak nganau' kuan ruma' ini luk biréKu kuan muyuh idi teh tepun muyuh, mepad kudeng luk pangeh inau'Ku déi' Silo.

¹⁵ Ui miak masut nemuyuh rat pa kiungKu, mepad kudeng luk inau'Ku kuan pupu muyuh lun Epraim.”

Lun Israil Na Maya' Bala Tuhan

¹⁶ Kebala Tuhan, “O Yeremia, aleg iko sembayang kuan pupu ini. Aleg iko mutuh kuandeh, ngaceku Ui na ninger sembayangmu.

¹⁷ Naké iko nier luk ruendeh déi' bang amung bawang Yahuda idi déi' iring dalan Yerusalim?

¹⁸ Anak-anak ngamung kayuh apui, lun deléi ngapui, idi decurdeh nguel banak ruen ku pinaram kuan akang decur luk titendeh raca' decur déi' langit. Idi teh ideh ngutang baré luk rupen kuan allah baken, pad ideh ngedereh Negku.

¹⁹ Matuké Ui luk uendeh ngedereh? Na, Ui pebala, ideh ngedereh bururdeh sebuleng, idi ngigu' bururdeh sebuleng.

²⁰ Ngaceku ineh, Ui ini Tuhan Allah miak ngutang usehKu bang bawang ini. Ui ngutang useh ineh luun lemulun idi pung-pung pana', luun kayuh idi lati' pana'. UsehKu mepad kudeng apui luk na miak milep.

²¹ “O pupuKu, meluun do' muyuh sebuleng kuman baré-baré luk petulu sabpen luun bubpun dengan amung baré luk miak kenen muyuh. Ini luk bilaKu, Tuhan luk Melalud, Allah lun Israil.

²² Kareb Ui nenguit tepun muyuh remuat rat bang bawang Masir, na Ui nemaré ukum ratnan baré luk sabpen idi baré luk baken-baken.

²³ Iamo' Ui nengecuk nedeh maya' balaKu, pad Ui mangun ku Allahdeh, idi ideh mangun ku pupuKu. Idi Ui nengecuk nedeh maya' luk bilaKu, pad ideh do' udeng.

²⁴ Iamo' na ideh neninger balaKu. Iamo' ideh maya' terawé niatdeh luk dat idi metueh, idi iuk-iuk ideh amé' dat tu-tu.

²⁵ Rat kareb tepun muyuh neremuat rat bang bawang Masir macing aco sini, na Ui ugka' maré demulunKu lun nabi.

²⁶ Iamo' na muyuh neninger balaKu. Iamo' muyuh metueh niat idi meluun dat ratnan tepun muyuh.

²⁷ “Ngaceku ineh, O Yeremia, iko miak pebala luk bilaKu ini kuandeh; iamo' na ideh pian ninger balamu ineh. Iko miak nawar nedeh, iamo' na ideh pian ngor balamu.

²⁸ Do' iko mada' nedeh, ‘Muyuh aceh pupu luk na maya' Tuhan Allahdeh idi luk na pian badén. Na luk idi lemulun luk lutep maya' jani'. Idi teh na ideh pegayam ratnan luk kudeng ineh.

Kekamen Luk Dat Déi' Ruan Hinom

²⁹ “ ‘O muyuh lun Yerusalim, do' muyuh temido, ngiki abpuk muyuh idi nala' neneh. Idi nganau' aceh tido luun surud, ngaceku Ui ini Tuhan pangeh nenala' pupu ini luk inanKu megateh.’

³⁰ “Pupu Yahuda pangeh nenganau' luk dat. Ideh pangeh nenganau' akangdeh luk inanKu megateh bang ruma'Ku idi nengelutak ruma' ineh. Ui ini Tuhan pangeh nepebala.

³¹ Ideh pangeh nemudut aceh bubpun luk titen Topet déi' Ruan Hinom, pad ideh maré anakdeh luk deléi idi decur ku baré luk sabpen. Ieh ineh luk na tu-tu icukKu idi luk na tirawéKu pana'.

³² Idi muci su ineh na miak tetanen Topet idi Ruan Hinom, iamo' su ineh tetanen Ruan Até ngaceku ideh miak nanem lemulun déi' Topet, pad na luk idi tana' ketecan peh.

³³ Idi butung-butung ineh mangun ku akan suit idi pung-pung luk meliput pana', ngaceku na luk idi lemulun miak ngusu nedeh.

³⁴ Tana' ineh mangun ku su luk ali-ali. Idi déi' amung bawang Yahuda idi déi' iring dalan Yerusalim Ui miak ngagka' arod lemulun luk mawang niat idi do' ria', idi arod decur idi deléi luk sikal ngaweh.