YEREMIA 6 - BALA LUK DO'

Yerusalim Pangeh Linibut Bunu'

¹ O lun Beniamin, do' muyuh buro pad na maté! Buro rat Yerusalim! Amé' nateg tawak déi' Tekoa, idi mada' nedeh déi' Bait Kerim, ngaceku susa' idi até macing rat pa tinueh busat aco.

² O lun Sion, muyuh mepad kudeng aceh laman luk pelaba do';

³ iamo' raca'-raca' miak lupo su ineh dengan bawehdeh, libut-libut muyuh pad ideh ngaro luk piandeh.

⁴ Idi kebaladeh, “Do' tau temina' ngerieng Yerusalim kareb muned aco. Idi kebaladeh teh, “Ini pangeh nepelaba peh, ngaceku lélé malem aco.

⁵ Do' tau temina' malem ini, idi ngusag amung libung Yerusalim.”

⁶ Tuhan luk Melalud nengecuk nebpeng amung-amung kayuh, pad tau nganau' aceh dalan luk medita', pelé tau miak semuet bang Yerusalim. KebalaNeh, “Ui pian ngukum bawang ini, ngaceku ieh mepanu' ku sala'.

⁷ Mepad kudeng bued megéi' inan abpa', kudeng ineh teh Yerusalim megéi' inan sala'. Idi Ui ninger ria' lun luk pepaté bang bawang ineh; idi Ui nier ét idi urat teh.

⁸ O lun Yerusalim, do' muyuh ninger bada'Ku, pad Ui na necan nemuyuh, pelé Ui na ngisu' bawang muyuh mangun ku su luk ali-ali, luk na inan lemulun tudo.”

Israil Ngelaba Bala Tuhan

⁹ Kebala Tuhan luk Melalud negku, “Amung lemulun luk bang bawang Israil miak lapen amung mepad kudeng bua' anggur luk pinureg pad na luk idi ketecan. Ngaceku ineh do' iko ngulun amung luk miak uen ngulun, mepad kudeng lun luk ngasa' anggur ngalap bua'neh.”

¹⁰ Idi kebala Yeremia, “Idé luk miak ninger balaku, kareb ui pebala idi mada' nedeh? Ideh mapen laliddeh ara' ninger balaMu; ideh situnga ku balaMu.

¹¹ O Tuhan ui mepanu' ku usehMu pad ui na miak tuman.” Idi kebala Tuhan negku, “Ngeruat usehKu kuan anak-anak luk déi' iring dalan, idi bang amung tebubpun anak adi' deléi. Dingdiru miak tebanen, idi lun mengered pana'.

¹² Ruma'deh miak barén kuan lun baken, kudeng ineh teh lati'deh idi decurdeh. Ui miak ngukum pupu luk bang bawang ini.

¹³ Idi amung-amung lun do' idi lun dat pana' nakap usin dengan naluk. Nabi-nabi idi imam pana' nateh mesiri kekamen.

¹⁴ Idi urat pupuKu uendeh ngubat, ayu-ayuneh na ieh mebura'. Keburi'deh, ‘Do', do',’ iamo' na ieh do'.

¹⁵ Inanké ideh migu' ngaceku kekamendeh luk inanKu megateh? Na tu-tu ideh mileh migu'. Ngaceku ineh ideh miak mebpeh mepad kudeng lun baken. Kareb Ui ngukum nedeh, miak ideh mabud maté. Ui ini Tuhan pangeh nepebala.”

Israil Ara' Maya' Dalan Tuhan Allah

¹⁶ Kebala Tuhan kuan pupuNeh, “Tuped déi' lisangen dalan idi nier; ngitun dalan luk meruked, ieh ineh dalan luk meluun do'. Maya' dalan ineh, pad muyuh do' udeng.” Iamo' keburi'deh, “Na kai pian maya' dalan ineh.”

¹⁷ Tuhan nengeletep tuda'-tuda' lun matar bawang, pad ideh miak ninger uni serupit. Iamo' kebala lun Israil, “Na kai pian ninger!”

¹⁸ Idi kebala Tuhan, “O amung pupu, do' muyuh ninger, luk miak mangun kuan pupuKu.

¹⁹ O amung uang tana' ini do' ninger! Ui miak ngusag pupu ini petulu maya' kekamendeh, ngaceku ideh na nemaya' balaKu idi nengarung bada'Ku.

²⁰ Na Ui pian ku umau luk do' buen luk itendeh rat bawang Siba, idi amung-amung luk do' buen rat bawang mado. Idi teh Ui na pian ngalap luk baréndeh. Idi na Ui mawang niat ku luk sabpen luun bubpundeh.

²¹ Ngaceku ineh, Ui ini Tuhan miak nganau' pupu ini metebaceng, pad taman idi anak pana' maté, lun rurum idi lun dengandeh teh.”

Baweh Macing Rat Pa Tinueh Busat Aco

²² Kebala Tuhan, “Inan aceh pupu luk macing rat pa tinueh busat aco, ieh ineh rat aceh bawang rayeh luk temina' amé' pebunu'.

²³ Idi ideh nguit gamen idi pelapetdeh; ideh ineh lun mesangit luk na mileh méi'. Unideh mepad kudeng beri abpa' rayeh kareb ideh nalan maya' kudadeh. Ideh temina' amé' munu' nelun Sion.”

²⁴ “Tau pangeh neninger bala,” keburi' lun Yerusalim, “iamo' ticu' tau melaya'; tau mebura' ét, mepad kudeng decur luk nenganak.

²⁵ Na tau mekuu' mepai, ngaceku bunu' tau pangeh netemina' ku repapehdeh, idi luk katot ngelibut netau.”

²⁶ Kebala Tuhan kuan pupuNeh, “Do' muyuh nacung idi telubid luun abuh. Idi temido mepad kudeng muyuh temido, kareb anak buleng muyuh luk deléi maté. Bunu' luk sikal ngaté nemuyuh miak macing denak-denak.

²⁷ O Yeremia, do' iko nutun pupuKu mepad kudeng muyuh nutun perak pad iko kali' kekamendeh

²⁸ Idi amung-amungdeh metueh niat idi na maya' bala idi ngatum buri'. Ideh metueh mepad kudeng tekaling idi belawan. Idi amung terawédeh pana' tekilu'.

²⁹ Sagan tu pana' tetel pelaba lau', amung luk dat ineh na miak mederuno. Kudeng ineh teh na ulekneh nutun nelun Israil teh, ngaceku lun luk dat na miak mabud talan.

³⁰ Ideh ineh miak tetanen pirak luk pangeh tila' ngaceku Ui ini Tuhan pangeh nenala' nedeh.”