YEREMIA 52 - BALA LUK DO'

Tabpa Yerusalim

¹ Ulun Sedekia, dueh ngepulu' aceh lak kareb ieh mangun ku raca'. Idi ngadan tinanneh Hamutal, ieh ineh anak Yeremia luk tudo déi' Libna.

² Idi Raca' Sedekia nenganau' luk dat pa kiung Tuhan, mepad kudeng luk inau' Raca' Yoyakim.

³ Yerusalim idi Yahuda iuk amé' dat pad Tuhan museh nedeh, idi nemaré nedeh tebanen. Idi Sedekia sikal metueh ratnan Raca' Babil.

⁴ Idi pulu' aco, bulan pulu' bang lak luk keiwa' kareb Raca' Sedekia ngimet Yahuda, idi Nebukadnesar raca' Babil iné' dengan amung bawehneh sikal munu' Yerusalim. Ideh nelupo bal alad bawang, idi teh nenganau' ibpeng luk medita' libut bawang ineh.

⁵ Idi ideh nengerieng bawang Yerusalim pad macing lak luk kepulu' aceh kareb imet Sedekia.

⁶ Idi iwa' aco bulan apat bang lak ineh teh, inan lau idi iru' luk pelaba io, pad na luk kenen lemulun.

⁷ Idi libung batu bawang Yerusalim netabpa. Idi baweh Yahuda nutun buro kareb medacem, sagan tu pana' lun Babil ngelibut bawangdeh ineh. Ideh nenalan rat kabun raca', maya' tanga' luk titen Arang Dueh Alad! Idi ideh neburo iné' matun Raked Yarden.

⁸ Iamo' baweh lun Babil nengerada' Raca' Sedekia idi nengakem neneh luun raked luk muneng ku Yeriko. Idi amung bawehneh nenecan neneh.

⁹ Kareb Sedekia pangeh tiban, idi ideh nenated neneh amé' matun Raca' Nebukadnesar luk déi' Ribla luk bang bawang Hamat, idi Nebukadnesar, nengukum neneh déi'.

¹⁰ Déi' Ribla raca' Babil nengecuk nelun ngaté anak-anak Sedekia su siren Sedekia. Idi teh ieh nengecuk nelun ngaté amung lun rayeh Yahuda.

¹¹ Idi ieh nengecuk nelun nakul mateh Sedekia, idi ngaling neneh, pad ieh iten amé' Babil. Idi Sedekia tinutup déi' Babil pad macing ieh maté.

Ruma' Allah Inusag

¹² Idi pulu' aco bulan limeh bang lak luk kepulu' iwa' kareb Raca' Nebukadnesar ngimet Babil, idi Nebusaradan luk lun rayeh raca' idi lun rayeh bawehneh, nesemuet bang Yerusalim.

¹³ Idi ieh nengeseb Ruma' Allah, ruma' raca', idi ruma' amung lun rayeh déi' Yerusalim.

¹⁴ Idi lun pebunu'neh nengusag amung libung batu bawang ineh.

¹⁵ Idi Nebusaradan nenaban lemulun luk neketecan bang bawang ineh amé' Babil, dengan lemulun luk pangeh neperurum neneh; idi lemulun luk mileh ngakem luk nateh tiban atun.

¹⁶ Iamo' ieh nenecan bang bawang Yahuda tuda'-tuda' burur lun luk masi' luk na tana'. Idi ieh nengecuk nedeh ngakem bang kabun anggur idi bang lati' pana'.

¹⁷ Idi lun Babil nemila' amung diri tekaling, idi amung alen luk bang Ruma' Allah, dengan luk inan sibaru' ratnan tekaling luk idi déi'. Idi ideh nenguit amung binaweh tekaling amé' Babil.

¹⁸ Idi ideh nenguit luk ku ngook abuh, idi belanga', idi luk ku ngilep lapung, idi bigan luk ruandeh dara', idi su luk inan ngeseb umau luk do' buen, idi amung binaweh tekaling luk uen makai bang kekamen Ruma' Allah.

¹⁹ Ideh nenguit amung-amung binaweh luk ratnan amas idi pirak: busi' luk isuut, su luk inan bareh apui, bigan luk ruandeh dara', belanga', kukud dawan, su luk inan ngeseb umau luk do' buen, idi teh bigan luk ku ngutang baré luk rupen.

²⁰ Binaweh luk ratnan tekaling luk inau' Raca' Selimun kuan Ruma' Allah, ieh ineh dueh diri, alen, bigan luk rayeh, idi pulu' dueh sapi' deléi luk ngimet ineh, na miak uen nimang ngaceku pelaba berat.

^21-22 Dueh diri ineh mepad mo' dita'neh, ieh ineh dueh ngepulu' tudu' kaki, idi kirayehneh pulu' ualuh kaki libut-libutneh. Dueh-dueh diri ineh inan lubang. Idi tekaling ineh apat inci kapalneh. Pa luun sebuleng diri ineh inan aceh babpat luk ratnan tekaling, dita'neh tudu' kaki setangal. Idi libut tekaling ineh inan berawang dengan bua' delima luk inau' ratnan tekaling teh.

²³ Idi luun berawang sebuleng diri ineh inan meratu bua' delima, idi iwa' ngepulu' anem bua' delima ineh miak siren rat déi' liang.

Lun Yahuda Tiban Amé' Babil

²⁴ Idi Nebusaradan, lun rayeh bawang ineh nenaban ni Seraya, Imam Rayeh ineh, Sepania, imam luk pa liangneh, idi teh teluh burur lun baken luk lun rayeh bang Ruma' Allah.

²⁵ Idi rat bang bawang ineh ieh nenaban seburur lemulun luk nguyut baweh, tudu' burur lun rayeh raca' luk neketecan bang bawang, lun luk ngedengan lun rayeh baweh luk ngimet amung surat ratnan bunu', dengan anem ngepulu' burur lun rayeh luk baken.

²⁶ Idi Nebusaradan nenated nedeh amé' matun raca' Babil luk déi' Ribla.

²⁷ Idi déi' Ribla bang bawang Hamat, raca' Babil nengecuk nelun mebal nedeh, idi ngaté nedeh. Idi lun Yahuda tiban rat bang bawangdeh sebuleng.

²⁸ Idi ini surat luk ratnan lemulun luk tiban Nebukadnesar: bang lak luk ketudu' kareb imetneh ieh nenaban 3,023 burur;

²⁹ bang lak luk kepulu' ualuh, 832 burur rat Yerusalim;

³⁰ idi bang lak luk kedueh ngepulu' teluh, Nebusaradan nenaban 745 burur. Amungdeh 4,600 burur luk pangeh tiban ineh.

³¹ Idi bang lak luk inan Ewil Merodak mangun ku raca' Babil, ieh méi' kuan Yoyakin raca' Yahuda idi nemuit neneh rat bang tutup. Ini pangeh nangun bang dueh ngepulu' limeh aco bulan pulu' dueh bang lak luk keteluh ngepulu' tudu', muci ratnan Yoyakin pangeh tiban.

³² Idi Ewil Merodak méi' ni Yoyakin idi nemaré neneh aceh kekamen luk meluun rayeh ratnan kekamen raca'-raca' baken luk tiban iné' Babil.

³³ Idi Yoyakin sinima' nengelengu ayung tutup ineh, idi ieh nekuman iring téng raca' ruked-ruked ulunneh.

³⁴ Idi anid aco ruked ulunneh, ieh ngalap tabpar kuan bururneh sebuleng.