YEREMIA 51 - BALA LUK DO'

Babil Inukum Baruh

¹ Kebala Tuhan, “Ui ngacing aceh bui luk ngusag, kuan Babil idi pupuneh.

² Ui miak ngecuk nelun rat bawang baken amé' ngusag Babil mepad kudeng bui luk malid lipang padé. Kareb acodeh ngusag ineh, ideh miak munu' rat selipa idi rat pa selipa, pad bawang ineh na luk anun-anun.

³ Aleg maré kareb kuan baweh Babil, pad ideh na miak mayung ku busudeh idi pad ideh na miak ngayung ku ayungdeh. Aleg méi' inan anak adi' deléideh! Ngusag amung bawehdeh!

⁴ Ideh miak uen ngurat pad ideh maté luun dalan bawangdeh.

⁵ Ui ini, Tuhan Allah luk Melalud, na nenecan Israil idi Yahuda, sagan tu pana' ideh nenganau' sala' pa kiungKu, ieh ineh Tuhan lun Israil luk Meligan.

⁶ Buro rat Babil, pad muyuh mulun. Aleg muyuh maté ngaceku sala' Babil. Ui miak ngua' idi ngukum neneh, maya' kudeng luk pangeh inau'neh

⁷ Babil ineh mepad kudeng aceh sangkir amas bang paladKu, luk ngabuk amung tana' ini. Amung-amung pupu nengirup abpa' anggurneh, pad ideh meraruh terawé.

⁸ Denak-denak Babil netabpa, idi inusag! Do' nangi' neneh! Nakap ubat kuan uratneh. Kian, ieh miak uen ngedo' lek.

⁹ Kebala lun sakai luk tudo déi', ‘Kai nutun ngedengan Babil, iamo' mulai kai. Miket! Do' tau muli'. Allah pangeh nengukum Babil dengan amung tuehNeh, pad bawang ineh nabud nusag.’ ”

¹⁰ Kebala Tuhan, “PupuKu ngitang, kebaladeh, ‘Tuhan pangeh nengegala' do' kai. Do' tau amé' mada' nelun Sion ratnan amung luk inau' Tuhan Allah tau.’ ”

¹¹ Tuhan pangeh nengegio terawé raca'-raca' Midi, ngaceku Ieh pian ngusag bawang Babil. Kudeng ineh lawéNeh Tuhan ngua' ratnan usag Ruma'Neh. Kebala lun rayeh baweh, “Ngir busu muyuh! Idi temina' ku utap muyuh!

¹² Nateg tawak pad amung muyuh temina' ngusag libung batu Babil. Do' mula' lemulun luk matar. Ngecuk nedeh temina' su luk inandeh! Idi ngecuk nelun baken ngabang!” Tuhan pangeh nenganau' luk tirawéNeh idi luk bilaNeh kuan lun Babil.

¹³ Déi' Babil mula' abpa' idi binaweh luk pelaba do', iamo' tarekneh pangeh nacing kareb gitian ulunneh miak meputut.

¹⁴ Tuhan luk Melalud pangeh nepebulung ku ulunNeh sebuleng, kebalaNeh, “Ui miak ngacing mula' lemulun munu' Babil, mepad kudeng kinula' kato, idi ideh miak ngitang ngaceku ideh metueh ratnan bawang ineh.”

Aceh Nani Ubur Kuan Allah

¹⁵ Tuhan nemudut tana' dengan lalud idi ilehNeh, idi Ieh nemalad langit dengan ilehNeh teh.

¹⁶ Maya' ukumNeh inan uni lalam déi' langit, idi Ieh nguit laput rat iring tana'. Ieh nganau' kilep dengan udan, idi maré bui rat su inanNeh.

¹⁷ Amung lemulun dat ileh idi mebacé, amung lun luk mileh nganau' amas, dat niat ku akangdeh, ngaceku ideh ineh allah luk mebalih, idi na mulun.

¹⁸ Idi ideh ineh na ulek, idi petulu uen ngigu'. Ideh miak sagen kareb Tuhan macing ngukum nedeh.

¹⁹ Allah Yakub baken kudeng ineh; Ieh ineh nenganau' luk amung-amung, idi Ieh nemili' Israil ku pupuNeh sebuleng. Tuhan luk Melalud, ieh ineh ngadanNeh.

Tuno Tuhan

²⁰ Kebala Tuhan, “O Babil, iko tunoKu idi busuKu luk ku nengelaya' tuda'-tuda' pupu idi tuda'-tuda' imet.

²¹ Idi dengan ineh teh Ui nengaté kuda idi lun luk maya' kuda teh. Ui nengusag keréta idi lun luk ngimet keréta ineh teh.

²² Ui nengaté deléi idi decur, lun mengered idi anak baruh teh, anak adi' deléi idi decur pana'.

²³ Ui nengaté lun luk matar dumba dengan dumbadeh, lun luk amé' lati' dengan aya'deh, lun luk ngimet idi lun rayehdeh.”

Ukum Babil

²⁴ Kebala Tuhan, “Muyuh miak nier Negku ngua' bawang Babil idi pupuneh, ngaceku amung dat luk inau'deh kuan Sion.

²⁵ O Babil, iko mepad kudeng aceh pegkung luk ngusag tana' ini, iamo' Ui ini Tuhan mangun ku bunu'mu. Ui miak ngakem namu, idi nala' namu luun tana', pad iko sabpen idi abuh mo' luk ketecan.

²⁶ Sebuleng batu pana' rat arang batu luk inusag ineh nateh luk miak uen mudut baruh. Iko mepad kudeng su luk ali-ali macing ruked-ruked. Ui ini Tuhan pangeh nepebala.

²⁷ “Do' nateg tawak, pad amung pupu miak ninger! Mada' amung pupu pad ideh temina' munu' Babil! Ngecuk bawang Ararat, Mini, idi Askenas amé' pebunu'. Mili' seburur lun rayeh baweh. Do' nguit amung-amung kuda, kinula'deh mepad kudeng kinula' kato.

²⁸ Do' ngecuk raca'-raca' Midi dengan lun rayeh idi penguludeh, idi amung bawang bang imetdeh, temina' amé' munu' Babil.

²⁹ Tana' sigio idi meruyuh ngaceku Tuhan ngacing luk pianNeh. Ieh miak nganau' Babil mangun ku su luk ali-ali luk na inan lemulun.

³⁰ Baweh Babil pangeh nugka' pebunu' idi uta bang libungdeh luk meraben. Ideh na mekuu', mepad kudeng decur mo'. Tanga' bawang pangeh inusag idi amung ruma' meseb.

³¹ Mula' lun duken upun mada' raca' Babil, kebaladeh, ‘Bawangmu inusag lun rat pa selipa macing pa selipa.

³² Bunu' ineh pangeh nengelaya' nelun luk matar gitan ineh idi ideh nenutung budud teh. Baweh Babil megagau.

³³ Na mio teh bunu'deh ineh miak narad nedeh idi ngeradu' nedeh mepad kudeng padé su luk inan rumik.’ Tuhan luk Melalud, Allah lun Israil pangeh nepebala.”

³⁴ Raca' Babil nemulu' bawang Yerusalim, idi nekuman uangneh. Ieh nengukit amung-amung luk bang bawang ineh, mepad kudeng abpa' luk bang sidangur. Idi ieh nenelen ineh mepad kudeng galau. Idi ieh nengalap luk pianneh idi ieh nenala' luk na pianneh.

³⁵ Nima' nelun Sion pebala, “Do' Babil mabeh sala' luk inau'neh kuan kai!” Nima' nelun Yerusalim pebala, “Do' Babil mabeh sala' ngaceku dereh luk icingneh kuan kai!”

Tuhan Miak Ngedengan Israil

³⁶ Idi kebala Tuhan nelun Yerusalim, “Ui miak ngedengan nemuyuh idi ngua' susa' muyuh. Ui miak nganau' bued abpa' idi amung arur Babil mekeket.

³⁷ Idi Babil miak mangun ku aceh bubpun batu luk inusag idi su luk inan pung luk meliput. Ieh miak mangun ku aceh luk inan megagap. Seburur pana' nateh luk mulun ieneh. Idi amung lemulun luk nier neneh miak matot ngaceku luk pangeh nangun kuanneh.

³⁸ Lun Babil ngeku mepad kudeng balang idi muni mepad kudeng uni anak balang.

³⁹ Matuké ideh manga. Ui miak nganau' aceh irau kuandeh. Idi Ui miak nganau' nedeh mabuk idi mawang niat. Ideh miak rudap idi na kulat teh.

⁴⁰ Ui miak nguit nedeh kereten, mepad kudeng anak dumba, amék, idi dumba deléi. Ui ini Tuhan pangeh nepebala.

Kekiped Babil

⁴¹ “Babil, ieh ineh bawang luk buren aput tana' ini, pangeh linaya'! Ieh pangeh nangun ku aceh luk inan megagap kuan amung pupu.

⁴² Abpa' rayeh netemubu' idi nengereb Babil.

⁴³ Amung bawangneh pangeh nangun ku aceh luk inan megagap. Ideh mepad kudeng su luk ali-ali, luk na abpa', idi na lemulun luk tebawang idi lun luk lemaba pana'.

⁴⁴ Ui miak ngukum Bél, allah lun Babil, idi ngecuk neneh maré binaweh luk pinoneh lemubed. Idi pupu baken na miak sembayang neneh teh. “Libung batu Babil pangeh netabpa. O lun Israil, buro rat ieneh!

⁴⁵ Do' amung muyuh buro ratnan usehKu luk pelaba bura'.

⁴⁶ Do' muyuh mekuu' idi aleg matot ku bala luk pedingeren muyuh. Anid lak inan bala macing, ieh ineh bala ratnan susa' bang bawang, idi ratnan seburur raca' sikal metueh ratnan raca' baken.

⁴⁷ Idi ngaceku ineh, tarekneh miak macing kareb Ui ngukum amung akang Babil. Bawang ini miak uen ngigu' idi amung lun luk bang bawang ini miak pitayen.

⁴⁸ Amung-amung luk luun tana' idi luk bang langit miak ngitang ku awang niat kareb Babil barén bang palad lemulun luk macing rat pa tinueh busat aco luk sikal ngusag neneh.

⁴⁹ Babil nengacing até kuan lemulun aput-aput tana', idi nekini Babil miak metabpa ngaceku ieh nengacing até kuan mula' lun Israil. Ui ini Tuhan pangeh nepebala.”

Bala Allah Kuan Lun Yahudi Déi' Babil

⁵⁰ Kebala Tuhan, “O pupuKu luk déi' Babil, muyuh pinuit ratnan até! Buro nekini! Aleg nganét! Sagan tu pana' muyuh mado ratnan bawang muyuh, do' ngerawé Negku luk Tuhan muyuh, idi ngerawé Yerusalim teh.

⁵¹ Muyuh pebala, ‘Kai pangeh dinat idi inigu'. Kai pelaba laya', ngaceku pupu baken pangeh nengalap su luk meligan bang Ruma' Allah.’

⁵² Ngaceku ineh, Ui pebala: Tarekneh malé macing kareb Ui ngukum amung akang Babil, idi lun luk nurat miak ngarod aput-aput bawangneh.

⁵³ Sagan tu pana' Babil umak amé' bang langit idi mudut aceh libung batu déi', idi Ui miak ngecuk lemulun ngusag neneh. Ui ini Tuhan pangeh nepebala.

Ukum Baruh Kuan Babil

⁵⁴ “Ninger tangi' lemulun déi' Babil, idi tido ngaceku usag bawang.

⁵⁵ Ui ngusag Babil idi nganau' neneh pirud. Amung baweh ngerieng neneh idi ngitang, mepad kudeng beri abpa' rayeh.

⁵⁶ Ideh iné' ngusag Babil, lun pebunu'neh pangeh kikem, idi busudeh neputul. Ui ini Allah luk ngukum luk dat, Ui miak ngukum Babil maya' kudeng luk inau'neh.

⁵⁷ Ui miak ngabuk nelun luk ngimet neneh — lun luk mileh, lun rayeh, idi lun pebunu'. Ideh miak rudap, idi na kulat. Ui ini luk raca' pangeh nepebala, Ui ini Tuhan luk Melalud.

⁵⁸ Libung batu Babil miak talan luun tana', idi amung tanga'neh luk rayeh miak sabpen. Amung kekamen anak itinneh na ulek, idi luk inau' amung pupu sabpen mo'. Tuhan luk Melalud pangeh nepebala.”

Bala Yeremia Bida' Nelun Babil

⁵⁹ Seraya, anak Neria Masia, ieh ineh lun duken Raca' Sedekia. Bang lak luk keapat kareb Raca' Sedekia ngimet Yahuda, idi Seraya pian amé' Babil, idi Yeremia nemaré aceh bada' kuanneh.

⁶⁰ Yeremia nengayud bang aceh surat ratnan amung-amung susa' luk miak macing kuan Babil, idi teh amung-amung bala luk baken ratnan Babil.

⁶¹ Kebalaneh ni Seraya, “Kareb iko macing déi' Babil, do' iko maca' kuan lun mula' dengan rayeh arod amung-amung bala luk inayud bang surat ini.

⁶² Pangeh ineh do' sembayang, kesembayangmu, ‘O Tuhan, Iko nepejani' ngusag bawang ini, pad sebuleng pudut pana' nateh luk mulun ieneh, do' lemulun idi pung pana', pad ieh mangun ku su luk ali-ali macing ruked-ruked.’

⁶³ O Seraya, kareb iko pangeh nemaca' surat ini kuan lun mula', do' ngabet aceh batu nan surat ineh, idi nala' neneh bang Abpa' Pirat,

⁶⁴ kebalamu, ‘Ini luk miak mangun kuan Babil — ieh miak turem idi na lupung teh, ngaceku ukum luk uen Tuhan ngacing kuanneh.’ ” Ini mo' kekiped bala Yeremia.