YEREMIA 50 - BALA LUK DO'

Tabpa Babil

¹ Kebala Tuhan ni Nabi Yeremia ratnan Babil idi pupuneh.

² “Mada' bala ini kuan amung pupu! Nateg tawak, idi maré kali'! Aleg ngalum ineh! Babil pangeh netabpa! Akangneh Marduk pangeh nebila'! Idi amung akang Babil pangeh inigu'. Amung akang luk inan megani' pangeh inusag!

³ “Aceh pupu rat pa tinueh busat aco pangeh iné' munu' Babil, pad ieh mangun ku su luk ali-ali. Lemulun idi pung pana' miak buro, pad seburur pana' nateh luk mulun su ineh.”

Israil Muli'

⁴ Kebala Tuhan, “Kareb ineh lun Israil idi lun Yahuda miak amé' nakap Negku luk Allahdeh dengan nangi'.

⁵ Ideh miak ngitun dalan amé' Sion idi maya' dalan ineh. Ideh miak nganau' aceh pejani' luk meruked dengan Tuhan luk na miak labéndeh.

⁶ “PupuKu mepad kudeng dumba luk neraruh, luk rinaruh lun luk matar nedeh luun pegkung. Ideh pangeh nenalan mepad kudeng dumba, rat aceh pegkung amé' luun pegkung baken. Idi ideh pangeh nekelupan libungdeh.

⁷ Amung lemulun luk kali' nedeh ngaté nedeh. Idi kebala bunu'deh, ‘Ideh pangeh nenganau' sala' pa kiung Tuhan. Ngaceku ineh na kai mesala'. Tepundeh pangeh merapet inan Tuhan, idi petulu ideh lutep maya' Neneh.’

⁸ “O Lun Israil, buro rat Babil! Necan bawang ineh! Do' muyuh buro atun!

⁹ Ui miak ngegio tuda'-tuda' pupu rat pa tinueh busat aco, pad ideh amé' munu' Babil. Ideh miak ngerieng bawang ineh idi ngalap neneh. Ideh miak mayung ku busudeh mepad kudeng lun nganup luk mileh mayung.

¹⁰ Babil miak uen ngaro. Idi lemulun luk ngaro neneh miak ngalap anun-anun luk piandeh. Ui ini Tuhan pangeh nepebala.

Bawang Babil Metabpa

¹¹ “O Lun Babil, muyuh nengaro bawang pupuKu. Sagan tu pana' iko mawang niat idi do' ria', idi nalan mepad kudeng sapi' luk rumik padé, idi kudeng kuda luk muni,

¹² bawangmu ineh miak uen ngigu' idi uen ngebeneh. Babil miak mangun ku bawang luk isuut tu-tu, ieh ineh su luk ali-ali luk na abpa'.

¹³ Ngaceku usehKu, seburur pana' nateh luk tudo déi' Babil. Ieh miak uen ngusag. Amung lemulun luk lemaba miak megagap idi mawa ku luk pangeh nangun kuanneh.

¹⁴ “O muyuh lun luk mileh mayung ku busu, do' muyuh temina' ngerieng bawang Babil idi ngelibut neneh. Mayung busu muyuh nelun Babil, ngaceku ieh pangeh nenganau' sala' pa kiungKu luk Tuhan

¹⁵ Ngitang-ngitang libut-libut bawang ineh! Nekini Babil pangeh melaya'. Libung batuneh pangeh nekusag. Ui ini Tuhan ngua' nelun Babil. Do' muyuh pana' ngua' nedeh, idi nganau' kuandeh mepad kudeng luk pangeh inau'deh kuan lun baken.

¹⁶ Aleg nima' padé uen nibu déi' Babil, idi aleg nima' lemulun ngeranih su ineh. Amung lun sakai luk tudo déi' miak matot baweh luk ngerieng nedeh ineh, pad ideh muli'.”

Israil Muli'

¹⁷ Kebala Tuhan, “Lun Israil mepad kudeng dumba luk uen balang ngerada' idi ngatad. Pun-pun ideh binunu' raca' Asur, idi pangeh ineh Nebukadnesar raca' Babil ngim tulangdeh.

¹⁸ Ngaceku ineh Ui ini, Tuhan luk Melalud, Allah lun Israil, miak ngukum Nebukadnesar idi bawangneh, mepad kudeng Ui nengukum raca' Asur.

¹⁹ Ui miak nguit nelun Israil muli' amé' bawangdeh. Ideh miak kuman nuba' luun Pegkung Karmel idi bang babpat Basan. Idi ideh miak kuman amung luk piandeh déi' Epraim idi Giliad.

²⁰ Kareb ineh, na miak kali' sala' arang lun Israil, idi na luk dat arang lun Yahuda pana', ngaceku Ui miak maré do' kuan lemulun luk siménKu mulun. Ui ini Tuhan pangeh nepebala.”

Ukum Allah Kuan Babil

²¹ Kebala Tuhan, “Do' munu' lemulun déi' Merataim idi Pekod. Do' ngaté nedeh. Do' nganau' amung luk dukenKu nemuyuh. Ui ini Tuhan pangeh nepebala.

²² Uni lun pebunu' pedingeren bang bawang ngaceku inan usag luk rayeh.

²³ Babil pangeh nenecat amung tana' ini, idi nekini tuno ineh pangeh neputul. Amung-amung pupu megagap nier luk pangeh nangun kuan Babil.

²⁴ O Babil, iko pangeh nekaneh abpung luk inau'Ku kuanmu, sagan tu pana' iko na kali'. Iko pangeh kikemdeh, ngaceku iko sikal metueh rat Negku.

²⁵ Ui pangeh nengukab su luk inanKu nganug busuKu, idi dengan usehKu Ui pangeh nengalap busu ineh ngaceku Ui ini, Tuhan luk Melalud, inan luk ruenKu déi' Babil.

²⁶ Do' munu' Babil rat selipa idi rat pa selipa, idi ngaro lepo padédeh. Ngamung amung binaweh luk ruen muyuh ngaro mepad kudeng aceh bubpun padé. Do' ngusag bawang ineh idi aleg necan anun-anun pana'.

²⁷ Ngaté amung lundeh luk pebunu'! Ngaté nedeh, idi aleg méi' nelun Babil! Tarekneh pangeh macing kareb ideh miak kumin!”

²⁸ (Lun luk neburo rat Babil iné' Sion, idi nemada' ratnan kudeng apeh Tuhan Allah tau nengua' luk inau' lun Babil kuan Ruma'Neh.)

²⁹ “Do' ngecuk nelun luk mileh mayung ku busu amé' munu' Babil. Idi teh ngecuk amung-amung lemulun luk mileh mayung ku busu amé' ngelibut bawang ineh, idi aleg nima' seburur pana' buro. Do' ngua' amung-amung luk pangeh inau'neh. Idi nganau' kuanneh, mepad kudeng luk inau'neh kuan lun baken. Ngaceku dengan medita' niat ieh sikal metueh rat Negku, ieh ineh Tuhan lun Israil luk Meligan.

³⁰ Idi amung anak adi' deléi miak pitayen luun dalan bawang ineh, idi amung bawehneh miak uen ngaté bang aco sineh. Ui ini Tuhan pangeh nepebala.

³¹ “O Babil, iko pelaba dita' niat. Ngaceku ineh, Ui ini, Tuhan luk Melalud, sikal metueh rat namu. Tarekneh pangeh nacing kareb iko miak kumin.

³² Pupumu luk medita' niat miak metebaceng idi meluka', idi seburur pana' nateh luk miak ngiding namu. Ui miak ngeseb amung bawangmu, idi teh amung luk libut-libutmu miak uen ngusag.”

³³ Kebala Tuhan luk Melalud, “Amung lun Israil idi lun Yahuda pangeh pidereh. Amung-amung lun luk nenaban nedeh matar nedeh do'-do' idi na sikal muit nedeh.

³⁴ Iamo' Lun luk pian muit nedeh ineh metueh — idi ngadanNeh, ieh ineh Tuhan luk Melalud. Ieh luk miak ngedengan nedeh idi nguit tana' ini pedo', iamo' Ieh miak ngacing susa' kuan lun Babil.”

³⁵ Kebala Tuhan, “Até kuan Babil! Até kuan pupuneh, idi kuan lun rayeh idi lun mileh pana'.

³⁶ Até kuan nabi-nabineh luk mebalih — ideh pelaba bacé. Até kuan bawehneh — ideh pelaba tot.

³⁷ Ngaté kudaneh idi ngusag kerétaneh! Ngaté nelun pebunu' luk ngalap tabpar pana' — ideh pelaba laya'! Ngusag amung binawehneh; idi ngaro neneh.

³⁸ Ngacing rikan kuan bawangneh, pad abpa'neh mekeket. Babil ineh aceh bawang luk mepanu' ku akang luk dat luk naluk nelun Babil.

³⁹ “Ngaceku ineh, Babil mangun ku su luk mula' ada' idi suit luk melutak. Idi muci na lemulun miak mulun ieneh, macing ruked-ruked.

⁴⁰ Mepad kudeng luk inau'Ku kuan Sodom, Gemora, idi bawang luk muneng ku bawang ineh, kareb Ui nengusag nedeh, kudeng ineh teh luk miak ruenKu kuan Babil. Seburur pana' nateh luk miak mulun su ineh, segageh pana' nateh. Ui ini Tuhan pangeh nepebala.

⁴¹ “Aceh pupu macing rat bawang luk pa tinueh busat aco, ieh ineh aceh bawang luk melalud rat mado luk temina' pebunu'.

⁴² Ideh pangeh nengalap busu idi pelapetdeh. Ideh mesangit idi na mileh méi'. Uni bawehdeh mepad kudeng beri abpa' rayeh kareb ideh nalan maya' kudadeh. Ideh temina' munu' nelun Babil.”

⁴³ Kareb raca' Babil neninger bala ineh, idi ticu'neh melaya'. Idi ieh pelaba susa' mepad kudeng seburur decur luk mét nenganak.

⁴⁴ “Ui ini Tuhan miak remuat rat bang pulung tangeb Abpa' Yarden idi nalan luun laman. Idi Ui miak nganau' nelun Babil denak-denak buro rat bang bawangdeh. Idi lun luk pilinKu miak ngimet bawang ineh. Idéké luk mepad Negku? Idéké luk sikal metueh rat Negku? Iapehké lun rayeh luk metueh rat Negku?

⁴⁵ Do' ninger balaKu ratnan bawang Babil, idi luk ruenKu kuan pupuneh. Anak-anakdeh pana' miak tebanen, pad amung lemulun miak megagap.

⁴⁶ Kareb Babil metabpa, unineh miak nganau' tana' meruyuh, idi arod lemulun miak pedingeren amung pupu baken.”