YEREMIA 5 - BALA LUK DO'

Sala' Yerusalim

¹ O lun Yerusalim, nakap déi' luun dalan! Idi nier muyuh do'-do'! Nakap déi' kadai! Kian inan seburur lemulun lek luk nganau' luk matu, idi luk lutep maya' jani'. Kudeng inan luk kali'mu, Tuhan miak maré do' kuan Yerusalim.

² Sagan tu pana' iko pebulung ku ngadan Tuhan, iko naluk mo'.

³ Kali' rungen Tuhan nakap luk matu. Ieh nenecat namu, iamo' iko na kali' étneh. Idi Ieh nenebpek namu, iamo' iko na pian badén. Iko metueh niat idi ara' necan sala'mu.

⁴ Idi keterawéku, “Lemulun ini na mileh. Ideh nganau' luk mebacé, idi na kali' luk pian Tuhan.

⁵ Ui miak amé' papu' nelun rayeh, idi ngitun nedeh. Kali' rungen ideh kali' luk pian Tuhan.” Iamo' amungdeh ngarung lalud Tuhan, idi na maya' ukumNeh.

⁶ Ini punneh aceh balang rat bang pulung miak ngaté nedeh; aceh bungalé rat su luk ali-ali miak ngerarak nedeh, idi teh aceh kuir miak semayo bang bawangdeh. Idi idé-idé luk mepai miak uendeh ngerarak ngaceku ideh mula' sala' idi megéi' teketed ratnan Allah.

⁷ Kebala Tuhan, “Ngudeh Ui maré do' ratnan sala pupuKu? Ngaceku amung anakdeh nenecan Negku, idi nepebulung ku allah luk na matu. Ui nemaman pupuKu pad ideh mebor, iamo' ideh pasét idi nakap decur luk mesawa'.

⁸ Ideh mepad kudeng kuda luk melamu luk melili ku tineh baken.

⁹ Petulu Ui ngukum nedeh ngaceku amung ini. Petulu Ui ngua' sala' aceh pupu luk kudeng ineh.

¹⁰ Ui miak ngecuk bunu'deh nebpeng anggurdeh, iamo' na miak ngaté nedeh amung. Idi Ui ngecuk nedeh nangal angatdeh, ngaceku ineh baken Ui kuan.

¹¹ Lun Israil idi lun Yahuda pangeh nemasui Negku. Ui ini Tuhan, pangeh nepebala.”

Tuhan Na Pian Ku Lun Israil

¹² Pupu Tuhan pangeh nengalum Neneh. Keburi'deh, “Na Ieh sikal ngukum netau. Na tau miak medereh. Na miak inan bunu' idi na tau miak melau.”

^13-14 Keburi'deh, “Amung nabi mepad kudeng bui, idi baladeh baken ratnan Tuhan.” Idi kebala Tuhan luk Melalud negku, “O Yeremia, Ui mada' namu ratnan luk miak mangun kuan pupu ini ngaceku baladeh ini. Ui miak nganau' balaKu mepad kudeng apui bang tangmu. Idi lemulun ini mepad kudeng kayuh luk sabpen ku apui ineh.”

¹⁵ O lun Israil, Tuhan miak nguit aceh pupu rat mado luk munu' nemuyuh. Ieh ineh aceh pupu luk metueh rat mon, idi muyuh na tupu kali' buri'deh.

¹⁶ Lun luk ngimet binor mileh ngaté, amungdeh ineh lun mesangit.

¹⁷ Idi ideh ineh miak ngabud padé muyuh, dengan anak muyuh luk deléi idi decur teh. Idi ideh ngabud aya' muyuh, dengan bua' anggur idi bua' gita'. Amung bawang muyuh luk linibung luk inan muyuh merapet miak ruen bawehdeh ngusag.

¹⁸ Iamo' kebala Tuhan, “Kareb ineh pana', na Ui sikal ngaté pupuKu amung.

¹⁹ O Yeremia, kareb ideh ngitun anun punneh Ui nenganau' kudeng ineh, do' mada' nedeh, kebalamu, ‘Mepad kudeng muyuh nenecan Tuhan idi mangun ku demulun allah baken bang bawang muyuh, kudeng ineh teh muyuh miak mangun ku demulun pupu baken bang aceh bawang luk baken muyuh kuan.’ ”

Allah Mada' PupuNeh

²⁰ Kebala Tuhan, “Do' mada' inul Yakub idi pupu Yahuda:

²¹ Ngerawé do'-do', O muyuh lun mebacé, luk inan mateh idi na miak nier, idi luk inan lalid idi na miak ninger.

²² Ui ini Tuhan; ngudeh muyuh na matot Negku, idi na megegker pa kiungKu? Ui nenganau' bada mangun ku lakan abpa' rayeh, aceh lakan luk meruked luk na miak labén. Sagan pana' mula' ribut, idi meberi, abpa' rayeh ineh na miak lemaba lakan ineh.

²³ Iamo' muyuh ini metueh niat idi sikal metueh rat Negku, pad muyuh numai idi nenecan Negku.

²⁴ Idi na muyuh nepebala bang niat muyuh, ‘Do' tau matot inan Tuhan Allah tau, luk maré udan maya' karebneh, ieh ineh udan luk pun-pun idi luk muci pana', luk maré aceh kareb inan tau ngeranih anid lak.’

²⁵ Ngaceku sala' idi dat muyuh, idi punneh muyuh pitad ratnan luk do' ini.

²⁶ “Lemulun luk dat kekamen tudo arang pupuKu; ideh mepad kudeng lemulun luk nganau' ukung suit iamo' setuneh ideh pian ngakem lemulun.

²⁷ Mepad kudeng lun luk ngakem suit manu' belalungdeh ku suit, kudeng ineh teh ideh manu' ruma'deh ku binaweh luk pinodeh. Ngaceku ineh, idi punneh ideh mangun ku lun do',

²⁸ idi teh ideh pelaba lamu idi mebor. Idi teh ideh na ugka' nganau' luk dat; na ideh ngedengan anak maté bang besara'deh; idi na ideh nganau' luk mesiri kuan lun luk masi'.

²⁹ “Iamo' Ui miak ngukum nedeh ngaceku kekamen ini. Ui miak ngua' sala' pupu ini. Ui ini Tuhan pangeh nepebala.

³⁰ Inan sala' luk pelaba dat bang bawang ini.

³¹ Idi amung-amung nabi mebalih; imam-imam merapet inan ilehdeh sebuleng; idi ini luk petulu dengan pinian pupuKu. Idi anunké ruendeh kareb kekipedneh?”