YEREMIA 49 - BALA LUK DO'

Ukum Tuhan Kuan Lun Amon

¹ Kebala Tuhan ratnan lun Amon, “Iapehké lun Israil? Naké lemulun luk miak matar bawangdeh? Ngudehké ideh nima' lemulun luk sembayang inan Milkom ngalap tana' pupu Gad idi tebawang déi'?

² Ngerawé do'-do', tarekneh miak macing kareb Ui nganau' lun bang bawang Raba ninger uni lun pebunu'. Bawang lun Amon ineh miak uen ngusag idi amung ruma'deh miak mabud sabpen. Idi lun Israil miak ngalap tana'deh lemubed ratnan lemulun luk nengaro neneh. Ui ini Tuhan pangeh nepebala.

³ O lun Hesbon, do' muyuh ngitang! Bawang muyuh pangeh inusag! O muyuh decur lun Raba. Do' muyuh temido! Do' muyuh nacung idi nangi'. Do' muyuh perigéi' upun. Akang muyuh Milkom miak tebanen perapu dengan imam idi penguluneh.

⁴ Ngudehké muyuh luk na lutep manu pelaba dita' niat? Tueh muyuh na luk idi. Ngudehké muyuh merapet inan lalud muyuh, kebala muyuh, ‘Lemulun na mekuu' munu' nekai?’

⁵ Ui miak ngacing tot kuan muyuh rat pa selipa idi rat pa selipa. Amung muyuh miak upun buro, idi seburur pana' nateh luk miak ngamung baweh muyuh teh. Ui ini Tuhan pangeh nepebala.

⁶ “Iamo' muci aco Ui miak ngeperuan nelun Amon teh. Ui ini Tuhan pangeh nepebala.”

Ukum Tuhan Kuan Edom

⁷ Kebala Tuhan luk Melalud ratnan Edom, “Matuké lun Edom na mileh ngerawé? Naké lun luk nguyut nedeh mileh mada' nedeh? Iapehké ilehdeh?

⁸ O lun Dedan, upun buro! Amé' sigapung! Ui miak ngaté inul Esau, ngaceku tarek luk inandeh miak kumin pangeh nacing.

⁹ Kareb lemulun ngalap bua' anggur, ideh megéi' necan sesuut bua'. Idi kareb lun mano macing kareb medacem, ideh ngalap luk piandeh mo'.

¹⁰ Iamo' Ui pangeh nengabud inul Esau, idi nengegala' amung su luk inandeh sigapung, pad ideh na miak sigapung teh. Lun Edom idi pupudeh idi lun dengandeh pangeh pinaté. Seburur pana' nateh luk ketecan.

¹¹ Necan amung anak maté muyuh denganKu, idi Ui miak ngasa' nedeh. Decur muyuh luk tinula' pana' miak merapet Negku.”

¹² Kebala Tuhan, “Kudeng lemulun luk na petulu kumin ngirup ratnan sangkir ukum, miakké muyuh mepuit ratnan ukum? Na tu! Muyuh pana' miak ngirup ratnan sangkir ineh!

¹³ Ui sebuleng pangeh nepebulung, kebalaKu, Bawang Bosra miak mangun ku aceh luk inan megagap idi su luk ali-ali. Lemulun miak situnga neneh, idi neten ngadanneh ku kediman. Amung ruma' libut-libutneh miak uen ngusag macing ruked-ruked. Ui ini Tuhan pangeh nepebala.”

¹⁴ Kebala Yeremia, “Ui pangeh nengalap aceh bala ratnan Tuhan. Ieh nengecuk seburur lun duken mada' amung pupu, kebalaNeh, ‘Ngamung baweh muyuh idi amé' munu' Edom! Do' muyuh temina' pebunu'!’

¹⁵ Tuhan miak ngelaya' bawangmu, pad seburur pana' nateh luk ngedita' namu.

¹⁶ Iko sinaluk ngaceku dita' niatmu. Na tu lemulun matot namu. Iko tudo luun pegkung batu luk medita'. Iamo' sagan pana' ruma'mu medita' kudeng arar kanui, Tuhan miak ngebeneh namu. Tuhan pangeh nepebala.”

¹⁷ Kebala Tuhan, “Aceh susa' luk pelaba rayeh miak macing kuan Edom, pad amung-amung lemulun luk lemaba miak megagap idi matot nier amung-amung luk pangeh nangun.

¹⁸ Ukum miak macing kuan Edom, mepad kudeng ukum Sodom idi Gemora, ieh ineh kareb ideh idi amung bawang luk muneng inusag. Seburur pana' nateh luk miak mulun ieneh, segageh pana' nateh. Ui ini Tuhan pangeh nepebala.

¹⁹ Ui miak macing mepad kudeng balang luk remuat rat bang pulung luk tangeb Abpa' Yarden idi nalan luun laman. Idi Ui miak nganau' nelun Edom upun buro rat bang bawangdeh. Idi lun rayeh luk pilinKu miak ngimet bawang ineh. Idéké luk mepad Negku? Idéké luk sikal metueh rat Negku? Iapehké lun rayeh luk metueh rat Negku?

²⁰ Do' ninger balaKu ratnan lun Edom idi luk miak ruenKu kuan lemulun luk tudo bang bawang Teman. Anak-anakdeh pana' miak tebanen, pad amung lemulun miak megagap.

²¹ Kareb Edom metabpa, unineh miak nganau' tana' meruyuh, idi arod lemulun miak pedingeren macing Abpa' Pisui.

²² Bunu' ineh miak munu' bawang Bosra mepad kudeng kanui luk ngeladai rat déi' dita'. Idi bang aco sineh, baweh Edom miak matot mepad kudeng decur luk mét nenganak.”

Ukum Tuhan Kuan Damsik

²³ Kebala Tuhan kuan Damsik, “Lun bang bawang Hamat idi Arpad megagau idi mesusa' ngaceku ideh neninger bala luk dat. Susa' ngereb nedeh mepad kudeng abpa' rayeh, pad ideh na do' udeng.

²⁴ Lun Damsik melaya', idi upun buro ngaceku matot. Ideh mét idi medereh mepad kudeng decur luk mét nenganak.

²⁵ Bawang luk mebala idi do' ria' atun pangeh tican.

²⁶ Idi kareb ineh amung anak adi' deléi idi lun pebunu' miak pitayen déi' luun dalan bawang ineh. Ui ini Tuhan luk Melalud pangeh nepebala.

²⁷ Ui miak ngeseb amung libung batu Damsik idi ruma'-ruma' Raca' Benhadad pana'.”

Ukum Kuan Pupu Kedar Idi Bawang Hasor

²⁸ Kebala Tuhan ratnan pupu Kedar idi lun rayeh bawang Hasor, luk linaya' Nebukadnesar raca' Babil, “Amé' munu' nelun Kedar idi ngaté pupu luk rat pa busat aco ineh!

²⁹ Ngalap lepo idi aya'deh, idi kibung, idi teh amung binaweh luk bang lepodeh ineh. Ngalap untadeh, idi mada' nedeh, ‘Inan luk katot libut-libut muyuh!’

³⁰ “O lun Hasor, Ui ini Tuhan ngecuk nemuyuh buro amé' mado idi sigapung déi'. Nebukadnesar raca' Babil pian munu' nemuyuh, kebalaneh,

³¹ ‘Miket! Do' tau munu' lemulun ineh luk ngerawé na inan susa'. Bawangdeh ineh na libung idi na tanga', idi teh na lun matar nedeh.’ Tuhan pangeh nepebala.

³² “Ngalap untadeh idi amung-amung aya'deh! Ui miak ngatad lemulun luk mekamu' abpuk ineh, idi Ui miak ngacing susa' kuandeh rat selipa idi rat pa selipa. Ui ini Tuhan pangeh nepebala.

³³ Hasor miak mangun ku su luk ali-ali macing ruked-ruked, ieh ineh su luk inan galau mo'. Seburur pana' nateh luk miak tudo ieneh, segageh pana' nateh.”

Ukum Kuan Elam

³⁴ Kareb Sedekia pun-pun mangun ku raca' Yahuda, idi Tuhan nepebala ni Yeremia ratnan bawang Elam.

³⁵ Kebala Tuhan luk Melalud, “Ui miak ngaté amung lemulun luk mileh mayung ku busu luk pangeh nenganau' bawang Elam rayeh.

³⁶ Ui miak ngacing bui rat iapeh-iapeh luk malid pupu Elam amé' iapeh-iapeh, pad na luk idi bawang luk na ulek lemulun luk buro.

³⁷ Ui miak nganau' nelun Elam matot nan bunu' luk pian ngaté nedeh. Ui miak ngaté nedeh dengan usehKu luk pelaba bura', idi ngecuk tuda'-tuda' baweh munu' nedeh pad ideh mabud maté. Ui ini Tuhan pangeh nepebala.

³⁸ Ui miak ngaté amung raca' idi lun rayeh Elam, pad Ui ngeletep kerusiKu ieneh.

³⁹ Iamo' muci aco Ui miak ngeperuan nelun Elam teh. Ui ini Tuhan pangeh nepebala.”