YEREMIA 45 - BALA LUK DO'

Jani' Allah Kuan Baruk

¹ Bang lak luk keapat kareb Yoyakim Yosia ngimet Yahuda idi Baruk Neria nengayud luk bila Yeremia neneh. Kebala Yeremia ni Baruk,

² “Tuhan Allah lun Israil nepebala,

³ ‘O Baruk, kebalamu, Ui pian ugka', ngaceku Tuhan pangeh nengula' susa'ku! Ui merur ngarod idi na miak ngato erurku!’ ”

⁴ Idi Tuhan nengecuk ni Yeremia pebala ni Baruk, “Ui ngusag luk pinudutKu, idi mubput luk tinibuKu. Ui miak nganau' luk kudeng ini aput tana'.

⁵ Miakké iko nakap luk meluun do' kuan bururmu sebuleng? Aleg nganau' kudeng ineh. Ui ngacing susa' kuan amung lemulun, iamo' iko miak mepuit idi mulun, iapeh-iapeh luk ulekmu. Ui ini Tuhan pangeh nepebala.”