YEREMIA 42 - BALA LUK DO'

Lun Mula' Mutuh Yeremia Sembayang Kuandeh

¹ Idi amung lun rayeh baweh dengan Yohanan Karia idi Asaria Hosaya nacing dengan anak itindeh, lun do' idi lun dat pana'.

² Idi kebaladeh ni Nabi Yeremia, “Do' nganau' luk pituen kai namu! Do' sembayang pa kiung Tuhan Allah kuan kai. Mutuh kuan amung-amung kai luk ketecan. Atun kai mula', iamo' nekini kai pawa', mepad kudeng luk siniermu.

³ Mutuh Tuhan Allah tau mada' dalan luk bén kai idi anun-anun luk petulu ruen kai.”

⁴ Idi kebala Yeremia, “Mo, do'. Ui miak sembayang pa kiung Tuhan Allah tau, maya' kudeng luk pinutuh muyuh, idi ui miak mada' nemuyuh ratnan anun-anun luk belénNeh. Na ui miak ngalum anun-anun nemuyuh.”

⁵ Idi kebaladeh ni Yeremia, “Nima' Tuhan mangun ku lun nekali' luk matu rat nekai, kudeng kai na maya' amung ukum luk barén Tuhan Allah tau namu kuan kai.

⁶ Kai ngecuk namu amé' matun Tuhan Allah tau. Idi sagan pana' malé kian mikat lek kai miak maya' balaNeh. Idi kudeng kai maya' balaNeh, kali' rungen kai ngalap peruan.”

Tuhan Ngor Sembayang Yeremia

⁷ Pulu' aco muci ratnan ineh, idi Tuhan nepebala ni Yeremia.

⁸ Idi Yeremia nengamung Yohanan Karia dengan amung lun rayeh baweh luk idi denganneh, idi anak itindeh, lun do' idi lun dat pana'.

⁹ Idi kebalaneh nedeh, “Tuhan Allah lun Israil luk pinutuhku kuan muyuh nepebala,

¹⁰ ‘Kudeng muyuh pian tudo bang bawang ini, idi Ui ngeletep nemuyuh idi na Ui ngedereh nemuyuh. Ui miak nibu nemuyuh idi na Ui mubput nemuyuh. Ui mesusa' niat ngaceku dereh luk icingKu nemuyuh.

¹¹ Aleg muyuh matot ni raca' Babil. Aleg matot neneh ngaceku Ui idi dengan muyuh. Ui miak ngulun nemuyuh idi muit nemuyuh rat bang paladneh.

¹² Ui miak méi' nemuyuh idi nganau' raca' Babil pana' méi' nemuyuh, pad ieh nima' nemuyuh muli'. Ui ini Tuhan pangeh nepebala.’

^13-15 “Iamo' aleg muyuh luk ketecan bang bawang Yahuda ngelaba bala Tuhan Allah muyuh pad muyuh ara' tudo bang bawang ini. Aleg muyuh pebala, ‘Na! Kai sikal amé' tudo déi' Masir. Ngaceku na luk idi bunu' idi uni tawak luk nawar amé' pebunu', idi na kai melau.’ Kudeng muyuh pebala kudeng ini, idi Tuhan luk Melalud, Allah lun Israil pebala, ‘Kudeng muyuh mesaad amé' bawang Masir,

¹⁶ idi bunu' luk inan muyuh matot mepigket nemuyuh, idi lun luk inan muyuh matot miak ngerada' nemuyuh, idi muyuh miak maté déi' Masir.

¹⁷ Amung lemulun luk mesaad amé' Masir miak maté ku bunu', lau, idi ét. Seburur pana' nateh luk miak mulun. Idi teh seburur pana' nateh luk miak mepuit ratnan susa' luk ruenKu ngacing kuandeh.’

¹⁸ “Kebala Tuhan Allah lun Israil, ‘Mepad kudeng useh idi gatehKu inutang kuan lun Yerusalim, kudeng ineh teh usehKu miak uen ngutang kuan muyuh, kudeng muyuh amé' Masir. Muyuh mangun ku aceh luk inan megagap. Lun baken miak situnga nemuyuh, idi ideh neten ngadan muyuh ku kediman. Idi muyuh na miak nier bawang ini teh.’ ”

¹⁹ Idi kebala Yeremia teh, “Tuhan pangeh nemebpeng nemuyuh luk ketecan déi' Yahuda, na miak amé' déi' Masir. Idi ui mada' nemuyuh nekini

²⁰ ngaceku muyuh sala' terawé. Muyuh nengecuk negku amé' matun Tuhan Allah tau, kebala muyuh, ‘Mutuh ratnan Tuhan Allah tau kuan kai! Mada' nekai ratnan amung-amung luk belénNeh kuan kai, idi kai miak maya' ineh.’

²¹ Idi nekini ui pangeh nemada' nemuyuh, iamo' muyuh pangeh nengelaba amung bala Tuhan Allah tau luk bilaku nemuyuh.

²² Ngaceku ineh, ngerawé do'-do'! Muyuh miak maté ku bunu', lau, idi ét bang bawang luk inan muyuh pian amé'.”