YEREMIA 41 - BALA LUK DO'

¹ Bang bulan luk ketudu' idi Ismail anak Netania Elisama, luk ratnan inul raca' iné' papu' ni Gedalia déi' Mispa dengan pulu' burur lun denganneh.

² Kareb ideh pad-pad kuman déi' Mispa, idi Ismail dengan pulu' burur lun denganneh nengaté ni Gedalia luk inau' raca' Babil mangun ku lun rayeh bawang ku pelapetdeh.

³ Idi teh Ismail nengaté amung-amung lun Yahudi luk idi dengan Gedalia déi' Mispa dengan amung-amung baweh Babil luk idi déi' Mispa teh.

⁴ Kenebpa, kareb nateh seburur nekali' ratnan até Gedalia,

⁵ idi ualuh ngepulu' burur lemulun nacing rat Sikem, Silo, idi Samaria. Ideh pangeh nemingit idi nengerarak kuyu'deh, idi nengurat bururdeh sebuleng. Idi ideh nenguit baré akan idi umau luk do' buen amé' bang Ruma' Allah.

⁶ Idi Ismail nenalan rat Mispa sikal papu' nedeh, idi ieh nangi' maya' dalan. Kareb ieh nacing nedeh, idi kebalaneh, “Do' amé' papu' Gedalia.”

⁷ Iamo' kareb ideh nesemuet bang bawang, Ismail idi anak itinneh nengaté nedeh idi nenala' butungdeh bang aceh subuk.

⁸ Iamo' arangdeh inan pulu' burur lemulun luk nepebala ni Ismail, “Aleg ngaté nekai! Kai inan padé, ikun, umau saitun, idi duru' inapung déi' lati'.” Idi na ieh nengaté nedeh dengan lun rurumdeh.

⁹ Subuk su luk inan Ismail nenala' butung lemulun luk pinaténeh pelaba rayeh. Subuk ineh pangeh inukat kareb Raca' Asa sikal metueh rat ni Basa raca' Israil. Idi Ismail nemanu' subuk ineh ku butung lemulun luk pinaténeh.

¹⁰ Idi Ismail nengakem amung anak raca' luk decur dengan amung lemulun luk ketecan déi' Mispa luk biré Nebusaradan lun rayeh baweh bang imet Gedalia. Ismail nenaban nedeh amé' bawang Amon.

¹¹ Yohanan Karia idi amung lun rayeh baweh nekali' bala ratnan dat luk inau' Ismail ineh.

¹² Idi ideh nenguit anak itindeh iné' munu' neneh. Ideh nepigket neneh muneng tangeb takung Gibion.

¹³ Kareb lun luk tiban Ismail nekali' Yohanan idi lun rayeh baweh ineh, ideh pelaba awang niat.

¹⁴ Idi lun luk tiban ineh nupun iné' ni Yohanan.

¹⁵ Iamo' Ismail dengan ualuh burur anak itinneh neburo rat ni Yohanan idi iné' bawang Amon.

¹⁶ Idi Yohanan dengan amung lun rayeh baweh luk nemaya' neneh nengalap amung lun pebunu', decur, anak, idi lun luk pinani' luk pangeh tiban Ismail rat Mispa, kareb ieh pangeh nengaté ni Gedalia. Idi ideh nengasa' lemulun luk inuit Yohanan rat Gibion.

¹⁷ Idi ideh nenalan idi nelupo déi' Kimam muneng ku Baitlahim. Ideh pian amé' déi' Masir,

¹⁸ pad ideh miak buro rat nelun Babil. Ideh matot nelun Babil ngaceku Ismail nengaté ni Gedalia luk inau' raca' Babil mangun ku lun rayeh bawang.