YEREMIA 40 - BALA LUK DO'

Yeremia Tudo Dengan Gedalia

¹ Tuhan nepebala ni Yeremia, kareb Nebusaradan, lun rayeh baweh pangeh nemuit neneh déi' Rama. Ideh pangeh nenguit ni Yeremia bang kaling, dengan amung lun baken rat Yerusalim idi Yahuda luk miak tebanen amé' Babil.

² Idi lun rayeh baweh nepegayam ni Yeremia buleng-buleng, “Tuhan Allahmu nemada' ratnan susa' luk miak macing kuan bawang ini,

³ idi nekini Ieh pangeh nenganau' maya' kudeng luk bilaNeh. Amung ini pangeh nangun ngaceku pupumu mesala' pa kiung Tuhan idi na nemaya' balaNeh.

⁴ Nekini ui neka kaling luk luun langenmu pad iko mepuit. Kudeng iko pian maya' negku amé' Babil, miak mo', idi ui miak matar namu. Iamo' kudeng iko na pian, aleg iko amé'. Amung bawang idi pa kiungmu. Do' iko amé' iapeh-iapeh su luk pianmu.”

⁵ Iamo' Yeremia na iné', idi kebala Nebusaradan, “Lemubed amé' ni Gedalia, anak Ahikam Sapan, luk inau' raca' Babil mangun ku lun rayeh amung bawang Yahuda. Iko miak tudo denganneh arang pupumu. Iko miak amé' iapeh-iapeh su luk pianmu.” Idi ieh nemaré aceh baré idi sesuut balu' idi nenima' neneh nalan.

⁶ Yeremia iné' tudo dengan Gedalia déi' Mispa, idi ieh netudo arang pupuneh luk neketecan bang bawang ineh.

Ideh Pegayam Sikal Ngaté Gedalia

⁷ Inan sebuang lun rayeh Yahuda idi lun pebunu' luk nateh neperurum nelun Babil. Idi ideh kali' bala ratnan raca' Babil pangeh nenganau' Gedalia Ahikam mangun ku lun rayeh bawang, idi nenganau' neneh ngimet amung lemulun luk nateh tiban amé' Babil, ieh ineh lemulun luk meluun asi' bang bawang ineh.

⁸ Idi Ismail Netania, Yohanan Karia, Seraya Tanumet dengan anak-anak Epai rat Netopa, idi Yesania lun Maketit iné' dengan anak itindeh papu' ni Gedalia déi' Mispa.

⁹ Idi kebala Gedalia, “Ui pejani', kudeng muyuh perurum nelun Babil, muyuh na luk katot. Do' muyuh tebawang, idi ngakem kuan raca' Babil, pad muyuh miak do' udeng.

¹⁰ Ui sebuleng miak tudo déi' Mispa idi mangun ku gatum muyuh kareb lun Babil amé' tungé'. Iamo' muyuh miak ngamung idi nganug abpa' anggur, bua', idi umau saitun, idi tudo bang bawang-bawang luk ilap muyuh.”

¹¹ Idi kareb ineh amung lun Yahudi luk tudo déi' Moab, Amon, Edom, idi bawang-bawang baken kali' bala ratnan raca' Babil nenima' sebuang lun Yahudi tudo déi' Yahuda, idi nenganau' Gedalia mangun ku lun rayehdeh.

¹² Ngaceku ineh amung lun Yahudi ineh nenecan bawang su luk inandeh pitad idi nelemubed iné' Yahuda. Ideh iné' papu' ni Gedalia déi' Mispa. Idi ideh nengamung mula' abpa' anggur idi bua' pana'.

Gedalia Pinaté

¹³ Pangeh ineh Yohanan Karia idi amung lun rayeh lun pebunu' luk nateh neperurum nelun Babil iné' matun Gedalia déi' Mispa.

¹⁴ Idi kebaladeh neneh, “Naké iko kali' Balis raca' Amon pangeh nengecuk Ismail Netania amé' ngaté namu?” Iamo' na ieh manu ku baladeh.

¹⁵ Idi Yohanan nepebala ni Gedalia buleng-buleng, “Nima' negku amé' ngaté Ismail pad na lemulun miak kali' idé luk nengaté neneh. Ngudehké ieh simén ngaté namu? Kudeng ieh ngaté namu, idi amung lun Yahudi bang imetmu miak uen ngatad, pad amung lemulun luk ketecan déi' Yahuda mesusa'.”

¹⁶ Iamo' kebala Gedalia, “Aleg muyuh ngaté neneh. Ngaceku bala muyuh ratnan Ismail na matu!”