YEREMIA 4 - BALA LUK DO'

Tuhan Ngecuk Uren

¹ Kebala Tuhan, “O lun Israil, kudeng muyuh lemubed ratnan Baal, do' amé' Negku, idi nala' amung akang luk inanKu megateh, idi lutep maya' Negku,

² idi muyuh miak pebulung ku ngadanKu dengan niat luk mesiri idi luk matu. Amung pupu miak ngubur Negku idi mutuh Negku ngeperuan nedeh.”

³ Kebala Tuhan kuan lun Yahuda idi lun Yerusalim, “Ngukat tana' luk na inukat muyuh; idi aleg nibu ilung muyuh arang tabpa'.

⁴ Aleg mekelupan jani' muyuh Negku, luk Tuhan muyuh, idi maré amung niat muyuh Negku, O muyuh lun Yahuda idi lun Yerusalim, pad usehKu na ngeseb nemuyuh mepad kudeng apui ngaceku dat luk pangeh inau' muyuh. Ngaceku seburur pana' na miak ngilep apui ineh.”

Lun Yahuda Ninger Bala Ratnan Bunu' Luk Macing

⁵ Nateg tawak muyuh, anid-anid bawang! Idi nawar dengan rayeh arod! Ngecuk nelun Yahuda buro amé' bawang luk meraben libung, idi lun Yerusalim buro amé' Pegkung Sion.

⁶ Do' mada' dalan amé' Pegkung Sion. Buro miket! Aleg ngesidan! Ngaceku Tuhan ngacing aceh susa' luk rayeh, rat pa tinueh busat aco.

⁷ Aceh balang pangeh neremuat rat bang lubangneh, idi lun luk ngusag amung bawang pangeh nenalan. Ieh nacing rat bawangneh, pian ngusag bawang Yahuda. Idi amung bawang ineh miak uen ngusag pad seburur pana' nateh luk ketecan.

⁸ Do' muyuh nacung idi temido, ngaceku Tuhan na ugka' museh nelun Yahuda.

⁹ Kebala Tuhan, “Kareb ineh amung raca' idi lun rayeh miak matot; idi lun imam miak megagap, idi amung nabi miak nginawa.”

¹⁰ Idi keburi'ku, “O Tuhan Allah, Iko pangeh nenaluk nelun Yerusalim! KebalaMu, ‘Na luk idi bunu' miak macing,’ iamo' nekini inan bunu' macing nedeh.”

¹¹ Muci lun Yerusalim miak ninger bala ratnan aceh bui luk melau' macing rat su luk ali-ali idi ngedereh pupu Tuhan. Bui ineh baken ieh macing malid nedeh mepad kudeng padé.

¹² Ngaceku bui luk duken Tuhan pelaba tueh. Idi Tuhan sebuleng luk maré kali' ratnan kudeng apeh Ieh miak ngukum pupuNeh.

Yahuda Linibut Bunu'neh

¹³ Siruh, bunu' tau macing mepad kudeng laput, idi kerétaneh mepad kudeng libuleh, kudaneh meluun awer ratnan kanui. Adui! Maté tau!

¹⁴ O Yerusalim, maru' sala' luk bang niatmu, pad iko miak uen ngulun. Tuda' io iko ngerawé luk dat baruh teh?

¹⁵ Idi inan bala luk dat rat bawang Dan idi rat Pegkung Epraim.

¹⁶ Ideh nengecuk mada' amung pupu idi Yerusalim teh, ratnan bunu' luk macing rat bawang mado. Ideh ineh ngitang ngedat amung bawang Yahuda.

¹⁷ Ideh miak ngelibut Yerusalim, ngaceku pupu Yahuda sikal metueh ratnan Tuhan. Tuhan pangeh nepebala.

¹⁸ O Yahuda, iko luk nengedat bururmu sebuleng, ngaceku lawému idi kekamenmu luk dat. Sala'mu luk nengacing ét ini; idi ieh luk nenebpek niatmu.

Yeremia Dat Niat Ngerawé Pupuneh

¹⁹ Adui, pelaba bura' étku! Idi niatku pelaba gegker! Na ui tuman pirud, ngaceku ui ninger uni tawak idi tang lun luk pebunu'.

²⁰ Pelaba ula' bunu' macing, idi ngusag amung bawang. Idi denak-denak amung lepoku netabpa, idi kibung luk ku dicing bang lepo ineh nedarak.

²¹ Tuda' io ui nier bunu' ini? Idi tuda' io ui ninger uni tawak?

²² Kebala Tuhan, “PupuKu mebacé! Na ideh miti Negku. Ideh mepad kudeng anak luk dat ileh; idi ideh na mileh kali'. Ideh mileh tu-tu nganau' luk dat, iamo' na ideh mileh nganau' luk do'.”

Luk Pangeh Sinier Yeremia Ratnan Dereh Luk Macing

²³ Kareb ui nenier tana' ini; idi na luk idi ayu idi na uang teh; idi langit na acang teh.

²⁴ Idi ui nenier amung pegkung sigio, idi teh amung surud megué.

²⁵ Idi teh ui nenier na lemulun ketecan idi amung suit pana' nabud neburo.

²⁶ Tana' luk mebaleng ineh pangeh nisu' ku su luk ali-ali; idi amung bawang luk rayeh pangeh inusag, ngaceku useh Tuhan. (

²⁷ Kebala Tuhan, “Idi amung-amung tana' miak mangun ku su luk ali-ali. Iamo' na Ui miak ngusag neneh.”)

²⁸ Tana' ini miak temido, idi langit mangun medacem. Ngaceku Tuhan pangeh nepebala idi na Ieh misu' terawé. Ieh pangeh nemutut ukum ini idi na misu'.

²⁹ Kareb ideh kali' ria' lun luk maya' kuda idi lun luk ngimet gaman, idi amungdeh miak buro. Sebuang buro amé' bang pulung, sebuang sigapung bang lubang batu. Idi bang amung bawang rayeh ineh na lemulun peh.

³⁰ O Yerusalim, iko na miak na kumin! Ngudeh iko ngayung ku luk mesia'? Ngudeh iko nganau' banému idi ngitem matehmu? Iamo' iko nganau' bururmu metaga, iamo' na ulekneh! Idi amung lun luk mawa namu atun nengelegkan namu idi pian ngaté namu.

³¹ Ui neninger arod, mepad kudeng decur luk nenganak atun. Ieh ineh arod Yerusalim luk mabud niat, Ieh nenatang ticu'neh idi nepebala, “Ui pangeh inukum! Ideh pian ngaté negku!”