YEREMIA 38 - BALA LUK DO'

Yeremia Bang Subuk Luk Na Abpa'

¹ Sepatia Matan, Geladia Pasur, Yukal Selemia, idi Pasur Malkia neninger luk bila Yeremia nelun mula', kebalaneh,

² “Tuhan pangeh nepebala, ‘Idé-idé luk ketecan bang bawang ini miak maté ku bunu', lau, idi ét. Iamo' idé-idé luk amé' matun nelun Babil na miak pitayen. Iamo' ieh miak mulun.’ ”

³ Idi teh Yeremia nemada' nedeh ratnan amung luk bila Tuhan, kebalaNeh, “Ui miak maré bawang ini kuan baweh raca' Babil, idi ieh miak ngalap neneh.”

⁴ Idi kebala lun rayeh ineh inan raca', “Lun ini na miak na pitayen. Dengan bala luk kudeng ineh Yeremia ngelaya' nelun pebunu'. Idi ieh nganau' luk kudeng ineh kuan amung lemulun luk ketecan bang bawang ini. Lemulun ini na ngedengan nelun mula'. Iamo' ieh ngedereh nedeh.”

⁵ Idi kebala Raca' Sedekia, “Do', pad pian muyuh. Ui na miak mebpeng nemuyuh.”

⁶ Idi ideh nengalap ni Yeremia idi nenganau' neneh bang subuk Pengulu Malkia, luk luun natad ineh. Idi ideh nengurur neneh bang subuk luk na abpa'. Iamo' Yeremia nepelusuk bang buri luk bang subuk ineh.

⁷ Iamo' Ebek Melek lun Sudan, seburur lemulun luk pinani' luk ngakem bang ruma' raca' nekali' bala ratnan Yeremia luk inau' bang subuk. Kareb ineh raca' pegayam munung Tanga' Beniamin.

⁸ Idi Ebed Melek nenalan rat ruma' raca' idi nepebala nan raca',

⁹ “O Raca', sala' luk inau' lemulun ini. Ideh nenganau' ni Yeremia bang subuk, idi kali' rungen ieh maté ku lau. Idi na luk kenen bang bawang ini.”

¹⁰ Idi raca' nengecuk Ebed Melek nguit teluh ngepulu' burur lemulun luk tuped ieneh amé' nginat ni Yeremia rat bang subuk ineh kareb nateh ieh maté.

¹¹ Idi Ebed Melek nenguit lemulun ineh iné' bang takep ruma' raca' luk inandeh nganug binaweh. Idi ideh nengalap tuda'-tuda' kuyu' luk dat luk inururneh kuan Yeremia luk bang subuk.

¹² Idi kebala Ebed Melek ni Yeremia, “Do' iko nganau' kuyu' ini bang ilekmu pad abet ineh na miak ngurat namu.” Idi Yeremia nenganau' luk kudeng ineh.

¹³ Idi ideh nenginat neneh ku abet ineh idi nengalap neneh. Pangeh ineh Yeremia tinutup luun natad ineh teh.

Sedekia Ngitun Ni Yeremia Ratnan Luk Miak Mangun

¹⁴ Raca' Sedekia nengecuk nelun nguit Nabi Yeremia amé' matun neneh munung tanga' luk keteluh bang Ruma' Allah. Idi kebalaneh ni Yeremia, “Ui pian ngitun namu aceh itun, idi aleg iko ngalum anun-anun negku.”

¹⁵ Idi kebala Yeremia, “Kudeng ui mada' luk matu, ui miak pitayenmu. Idi kudeng ui ngubuk namu, na iko pian maya' balaku.”

¹⁶ Idi Raca' Sedekia nepejani' ni Yeremia dengan lulem. Kebalaneh, “Ui pebulung dengan ngadan Tuhan luk mulun, idi luk ngulun netau, na ui ngaté namu, idi teh na ui maré namu bang palad lemulun luk sikal ngaté namu.”

¹⁷ Idi kebala Yeremia ni Sedekia, “Tuhan luk Melalud, Allah lun Israil nepebala, ‘Kudeng iko maré bururmu bang palad lun rayeh raca' Babil, iko miak mulun, idi bawang ini na sabpen. Iko dengan tetek ruma'mu miak mulun.

¹⁸ Iamo' kudeng iko na nganau' kudeng ineh, idi bawang ini miak barén kuan lun Babil, luk miak ngeseb neneh, idi iko pana' na miak mepuit rat nedeh.’ ”

¹⁹ Iamo' kebala Raca' Sedekia, “Ui matot nelun Yahudi luk pangeh neperurum nelun Babil. Kian, ui barén bang paladdeh lek, pad ideh ngedereh negku.”

²⁰ Idi kebala Yeremia, “Na tu iko barén bang paladdeh. Ui mutuh namu maya' bala Tuhan luk bilaku namu, pad iko uen ngeperuan idi na iko maté.

²¹ Iamo' Tuhan pangeh nengegala' bang aceh luk sinierku amung-amung luk miak mangun kudeng iko ara' maré bururmu nedeh.

²² Siruh! Amung decur luk ketecan déi' ruma' raca' Yahuda uen nated amé' matun lun rayeh raca' Babil. Ninger luk beléndeh maya' dalan: ‘Lun rurum raca' nengeraruh neneh, idi ideh luk pa luunneh. Idi nekini kukudneh nepelusuk bang buri, idi lun rurumneh pangeh nenecan neneh.’ ”

²³ Idi kebala Yeremia, “Amung decur idi anakmu miak iten amé' matun lun Babil. Idi iko sebuleng na miak mepuit rat nedeh. Iko miak tebanen raca' Babil, idi bawang ini miak mabud sabpen.”

²⁴ Idi kebala Sedekia, “Aleg iko mada' nelun baken ratnan gayam kiteh ini, pad iko na pitayen.

²⁵ Kudeng lun rayeh kali' ui nepebala namu, kali' rungen ideh ngitun namu ratnan gayam kiteh. Ideh miak pejani' na ngaté namu kudeng iko mada' nedeh.

²⁶ Iamo' do' iko pebala, ‘Ui mutuh neneh pad ieh na ngecuk negku lemubed amé' ruma' Yonatan idi maté déi'.’ ”

²⁷ Matu amung lun rayeh ineh iné' matun ni Yeremia. Idi ideh nengitun neneh. Iamo' Yeremia nemada' nedeh maya' kudeng luk icuk raca' neneh. Idi na ideh miak nganau' anun-anun, ngaceku seburur pana' nateh luk neninger gayam didueh ineh.

²⁸ Idi Yeremia tinutup luun natad ineh pad macing aco luk inan Yerusalim linaya' lun Babil.