YEREMIA 37 - BALA LUK DO'

Putuh Sedekia Ni Yeremia

¹ Nebukadnesar raca' Babil nenganau' Sedekia Yosia mangun ku raca' bang bawang Yahuda ku libal Yoyakin Yoyakim.

² Iamo' Sedekia idi amung lun rayehneh dengan lun mula' pana' na nemaya' bala Tuhan luk bida' Nabi Yeremia.

³ Raca' Sedekia nengecuk Yukal Selemia idi Sepania Masia luk imam amé' papu' Yeremia. Kebala didueh neneh, “Do' sembayang inan Tuhan Allah kai kuan kai.”

⁴ Kareb ineh Yeremia nateh tinutup idi ieh sinima' nalan arang lun mula'.

⁵ Iamo' baweh raca' Masir pangeh nenalan rat bawang Masir. Idi kareb lun Babil luk ngerieng Yerusalim kali' bala ineh, idi ideh nelemubed.

⁶ Idi kebala Tuhan Allah lun Israil kuan Nabi Yeremia,

⁷ “Mada' raca' Yahuda, luk nengecuk namu ngitun Negku, kebalamu, ‘Baweh raca' Masir luk amé' ngedengan namu, miak muli' amé' Masir.

⁸ Idi lun Babil miak lemubed idi ngerieng bawang ini. Ideh miak ngalap idi ngeseb neneh.

⁹ Ui ini Tuhan mada' nemuyuh pad muyuh na uen naluk idi ngerawé lun Babil na lemubed. Ngaceku kali' rungen ideh lemubed.

¹⁰ Sagan tu pana' muyuh metueh ratnan amung baweh Babil luk ngerieng nemuyuh, pad lun luk nurat mo' ketecan bang lepodeh, lemulun ineh pana' miak tumui idi ngeseb bawang ini.’ ”

Yeremia Kikem Idi Tinutup

¹¹ Baweh Babil neburo rat Yerusalim ngaceku baweh raca' Masir malé macing.

¹² Idi Yeremia nenalan rat Yerusalim pian amé' babpat Beniamin pad ieh ngalap babpat tana' pupuneh.

¹³ Iamo' kareb ieh nacing Tanga' Beniamin, idi lun rayeh lun pebunu' luk matar tanga' ineh, luk ngadanneh Iria anak Selemia Hanania, nengagka' ni Yeremia, kebalaneh neneh, “Iko necan nekai amé' ngedengan nelun Babil!”

¹⁴ Iamo' kebala Yeremia, “Na tu! Na ui necan nemuyuh.” Iamo' Iria na sikal ninger balaneh. Ieh nengakem ni Yeremia idi nenguit neneh amé' nan lun rayeh.

¹⁵ Ideh megateh ni Yeremia idi nemebal neneh idi nenutup neneh bang ruma' Yonatan, lun rayeh raca'. (Ruma' Yonatan pangeh inisu' mangun ku ruma' tutup.)

¹⁶ Yeremia tinutup bang lubang luk pa liang ruma' tuda'-tuda' io.

¹⁷ Raca' Sedekia nengecuk nelun nguit ni Yeremia amé' papu' neneh, idi déi' bang ruma' raca' ieh nengitun neneh buleng-buleng, kebalaneh, “Inanké luk bila Tuhan ratnan ui?” Idi kebala Yeremia, ‘Inan. Iko miak barén bang palad raca' Babil.”

¹⁸ Idi Yeremia nengitun, kebalaneh, “Anun sala'ku pa kiungmu, idi pa kiung lun rayehmu idi pupu ini pad ui tinutupmu?

¹⁹ Anunké luk mangun kuan nabimu luk nemada' namu, kebaladeh, ‘Raca' Babil na miak munu' namu idi bawang ini?’

²⁰ Idi nekini, O Raca', ui mutuh namu ninger idi maya' balaku. Aleg ngecuk negku lemubed amé' ruma' Yonatan lun rayehmu ineh, pad ui na maté su ineh.”

²¹ Ngaceku ineh, Raca' Sedekia nengecuk nelun nutup ni Yeremia luun natad. Idi ideh nemaré neneh sebalad ruti anid-anid aco rat bang kadai luk nan nganau' ruti, pad ruti bang bawang ineh mabud. Idi Yeremia neketecan luun natad ineh.