YEREMIA 35 - BALA LUK DO'

Yeremia Idi Lun Rekabi

¹ Kareb Yoyakim, anak Yosia mangun ku raca' Yahuda, idi Tuhan nepebala ni Yeremia,

² “Amé' pegayam nelun Rekabi. Idi nguit nedeh semuet bang aceh takep Ruma' Allah idi maré abpa' anggur kuandeh.”

³ Idi Yeremia nenguit amung lun Rekabi, ieh ineh Yasania luk anak Yeremia Habasinia dengan amung kinanakneh idi anakneh.

⁴ Idi Yeremia nenguit nedeh amé' bang Ruma' Allah, ieh ineh bang takep anak Hanan Igdalia luk demulun Allah. Takep ineh muneng ku takep amung lun rayeh idi pa luun takep Salum Masia, aceh lun rayeh bang Ruma' Allah.

⁵ Idi Yeremia nengerareng tuda'-tuda' sangkir idi sidangur pa kiung lun Rekabi, idi kebalaneh nedeh, “Do' muyuh ngirup.”

⁶ Iamo' kebaladeh, “Kai na miak ngirup abpa' anggur ngaceku Yonadab, anak tepun kai Rekabi, nemebpeng nekai idi inul kai na miak ngirup abpa' anggur.

⁷ Idi ieh nemebpeng nekai na miak mudut ruma' idi nganau' lati', idi na nganau' kabun anggur idi teh na melih kabun anggur. Ieh nengecuk nekai tudo bang lepo kibung ruked ulun kai, pad kai lutep tudo bang bawang mepad kudeng sakai.

⁸ Kai pangeh nemaya' bala Yonadab, anak tepun kai Rekabi. Kai na tu-tu ngirup abpa' anggur, do' burur kai sebuleng, awan kai, idi anak kai luk deléi idi decur pana'.

⁹ Kai na mudut ruma', idi na kabun anggur, lati', idi padé kai.

¹⁰ Kai tudo bang lepo kibung. Kai pangeh nemaya' amung-amung luk bila tepun kai Yonadab.

¹¹ Iamo' kareb Nebukadnesar, raca' Babil nesemuet bang bawang ini, kai nepegayam idi iné' Yerusalim, pad kai buro rat baweh Babil idi baweh Siria teh. Idi punneh kai tudo déi' Yerusalim.”

^12-13 Idi Tuhan luk Melalud, Allah lun Israil nengecuk Yeremia pebala nelun Yahuda idi Yerusalim, kebalaNeh, “Ui ini, Tuhan ngitun nemuyuh, ‘Anun punneh muyuh ara' ninger idi maya' bada'Ku?’

¹⁴ Inul Yonadab pangeh nemaya' ukumneh na miak ngirup abpa' anggur, pad ideh na ngirup macing aco sini, ngaceku ideh maya' ukum luk biré tepundeh. Iamo' Ui na ugka' mada' nemuyuh, idi muyuh na maya' balaKu.

¹⁵ Idi Ui na ugka' maré demulunKu lun nabi luk ngecuk nemuyuh necan dalan muyuh luk dat pad muyuh nganau' luk do'. Ideh nemebpeng nemuyuh na sembayang inan allah baken, pad muyuh lutep tudo bang bawang luk biréKu kuan muyuh idi tepun muyuh. Iamo' na muyuh ninger idi maya' balaKu.

¹⁶ Inul Yonadab pangeh nemaya' ukum luk biré tepundeh nedeh, iamo' muyuh na nemaya' balaKu.

¹⁷ Ngaceku ineh, Ui ini, Tuhan luk Melalud, Allah lun Israil miak ngacing kuan muyuh lun Yahuda idi lun Yerusalim amung dereh luk pijani'Ku. Ui miak nganau' kudeng ini, ngaceku kareb Ui nepebala nemuyuh, muyuh na neninger balaKu, idi kareb Ui nenawar nemuyuh, muyuh na nengor balaKu.”

¹⁸ Idi Yeremia nemada' pupu Rekabi ratnan amung-amung luk bila Tuhan luk Melalud, Allah lun Israil, kebalaneh, “Muyuh pangeh nemaya' amung ukum luk biré tepun muyuh Yonadab.

¹⁹ Ngaceku ineh, Ui ini, Tuhan luk Melalud, Allah lun Israil pejani', ieh ineh Yonadab Rekab megéi' inan inul deléi luk mangun ngakem kuanKu.”