YEREMIA 33 - BALA LUK DO'

Aceh Jani' Luk Maré Rapet Teh

¹ Kareb Yeremia tinutup luun natad, idi ieh neninger bala Tuhan sekua' teh.

² Tuhan luk nemudut idi nengeletep tana' ini nepebala ni Yeremia. Ieh luk titen Tuhan nepebala,

³ “Nawar Negku, idi Ui miak ngor balamu, idi ngegala' kuanmu kekamen luk pelaba do' idi luk inan mawa luk nateh nekali'mu.

^4-5 Ui ini Tuhan Allah lun Israil pebala, ‘Amung ruma' déi' Yerusalim idi ruma' raca' Yahuda miak uen ngusag. Na ulekneh amé' munu' nelun Babil luk luun dalan tana' luk medita', pad muyuh na miak manu' bawang ku butung lemulun luk ruenKu necat dengan usehKu. Ui pangeh neteketed ratnan bawang ini ngaceku kekamen luk dat luk pangeh kikem pupu ini.

⁶ Ui miak ngedo' bawang ini idi pupu ini pad ideh mawang niat idi do' udeng.

⁷ Ui miak ngeperuan Yahuda idi Israil, idi Ui miak mudut bawang ineh baruh mepad kudeng luk atun.

⁸ Ui miak ngeligan nedeh ratnan sala' luk inau'deh pa kiungKu. Idi Ui miak maré do' ratnan sala'deh idi datdeh.

⁹ Yerusalim miak mangun ku aceh lawa awang, ubur, idi rayeh kuanKu. Idi amung pupu bang tana' ini miak matot idi megegker, kareb ideh ninger ratnan amung peruan luk ruenKu ngacing kuan lun Yerusalim idi bawangdeh ini.’ ”

¹⁰ Kebala Tuhan, “Muyuh pebala, ‘Bawang ini mepad kudeng su luk ali-ali. Na lemulun idi pung pana'.’ Matu bawang Yahuda idi dalan Yerusalim na lemulun idi pung pana'. Iamo' bawang ini miak kali' sekua' teh,

¹¹ awang niat idi do' ria', idi tang deléi idi decur luk sikal ngaweh. Muyuh miak ninger nani lemulun luk nguit baré ubur bang ruma'Ku. Kebaladeh, ‘Maré ubur kuan Tuhan luk Melalud, ngaceku Ieh do', idi awaNeh meruked.’ Ui miak ngeperuan bawang ini mepad kudeng luk atun. Ui ini Tuhan pangeh nepebala.”

¹² Kebala Tuhan luk Melalud, ‘Bang bawang ini luk mepad kudeng su luk ali-ali idi luk na lemulun idi pung pana', miak ku laman muci su luk inan lemulun miak matar dumbadeh.

¹³ Muci lemulun luk matar dumba miak ngiap dumbadeh bang babpat Beniamin, idi bang bawang luk libut-libut Yerusalim, amung bawang Yahuda, amung bawang luk luun pegkung, amung bawang luk luun raked idi amung bawang luk déi' Negeb. Ui ini Tuhan pangeh nepebala.”

¹⁴ Kebala Tuhan, “Tarekneh miak macing, kareb Ui ngacing jani'Ku nelun Israil idi Yahuda.

¹⁵ Kareb ineh Ui miak maré aceh inul Daud luk matu, idi Ieh miak nganau' luk matu idi luk mesiri aput-aput tana'.

¹⁶ Kareb ineh pupu Yahuda miak uen ngulun idi lun Yerusalim miak do' udeng. Ngadan luk baréndeh kuan pupudeh idi bawangdeh, ieh ineh, ‘Tuhan pangeh nengulun netau.’

¹⁷ Ui ini Tuhan pejani', idi Ui miak maré inul Daud mangun ku raca' Israil ruked-ruked,

¹⁸ idi imam-imam rat pupu Liwi megéi' tuped pa kiungKu idi maré baré luk sabpen, baré luk kenen, idi baré luk kereten.”

¹⁹ Kebala Tuhan ni Yeremia,

²⁰ “Ui na miak ngelaba jani'Ku ratnan aco idi dacem, pad aco idi dacem na mangun bang kareb luk petulu.

²¹ Kudeng ineh teh Ui na miak ngelaba jani'Ku kuan demulunKu Daud, pad na luk idi inulneh luk mangun ku raca', idi jani'Ku nelun imam ratnan pupu Liwi luk ngakem kuanKu.

²² Ui miak ngula' inul demulunKu Daud, idi imam-imam ratnan pupu Liwi luk ngakem kuanKu, pad ideh mepad kinula' gituen luk déi' langit, idi mepad kudeng bada luk tangeb abpa' rayeh luk na mekiap.”

²³ Kebala Tuhan ni Yeremia,

²⁴ “Kali'mu bala pupu ini luk pebala, ‘Tuhan pangeh nenala' Israil idi Yahuda, ieh ineh dueh pupu luk pinili'Neh?’ Pad ideh ngedat pupuKu, idi na ngerawé nedeh mangun ku aceh pupu.

²⁵ Iamo' Ui ini Tuhan pangeh pejani' ratnan aco idi dacem, idi Ui pangeh nenganau' ukum ratnan tana' idi langit.

²⁶ Kudeng ineh teh Ui miak maya' jani'Ku dengan inul Yakub, idi demulunKu Daud. Ui miak mili' aceh inul Daud luk miak ngimet inul Ibrahim, Isak, idi Yakub. Idi teh Ui miak ngeperuan pupuKu, idi méi' nedeh.”