YEREMIA 32 - BALA LUK DO'

Yeremia Melih Aceh Lalang Tana'

¹ Tuhan nepebala ni Yeremia bang lak luk kepulu' kareb Raca' Sedekia ngimet Yahuda, ieh ineh bang lak luk kepulu' ualuh kareb Raca' Nebukadnesar ngimet Babil.

² Kareb ineh baweh raca' Babil nengerieng Yerusalim, idi Nabi Yeremia tinutup luun natad ruma' raca'.

³ Raca' Sedekia pangeh nenutup neneh su ineh idi nengadu' neneh, ngaceku Yeremia nepebala, “Kebala Tuhan, ‘Ui miak maré bawang ini kuan raca' Babil, idi ieh miak ngalap neneh.

⁴ Raca' Sedekia na miak mepuit rat nelun Babil. Ieh miak barén kuan raca' Babil idi ieh miak papu' neneh idi pebala neneh.

⁵ Sedekia miak tebanen amé' Babil, idi ieh miak tudo déi' pad Ui ngukum neneh, sagan tu pana' ieh pebunu' nelun Babil, ieh na miak metueh. Ui ini, Tuhan pangeh nepebala.’ ”

⁶ Kebala Yeremia, “Kudeng ini bala Tuhan negku,

⁷ ‘Hanamel, anak taman pinakenmu Salum miak amé' namu idi mutuh namu melih tana'neh luk déi' Anatot, ngaceku iko pupuneh luk muneng idi miak melih tana'neh.’ ”

⁸ Idi maya' kudeng luk bila Tuhan, kinanakku Hanamel iné' negku luun natad su luk inanku tinutup, kebalaneh, ‘Do' iko melih tana'ku luk déi' Anatot bang babpat Beniamin. Ngaceku iko pupuku luk muneng idi miak melih idi ngimet tana' ineh. Do' iko melih ineh kuan bururmu sebuleng.’ Idi ui kali' Tuhan luk nengecuk negku nganau' luk kudeng ineh.

⁹ Idi ui nemelih tana' Hanamel ineh idi nenimang usin kuanneh. Idi raga tana' ineh pulu' tudu' balad pirak.

¹⁰ Idi ui nengayud ngadanku idi ui nengamut surat ineh pa kiung lemulun luk nekali', idi ui nenimang pirak ineh luun timang.

¹¹ Idi ui nengalap dueh balad surat belih tana' ineh, sebuleng luk pangeh imut idi sebuleng luk mukab.

¹² Idi ui nemaré dueh surat ineh kuan Baruk Neria Masia, pa kiung Hanamel, idi lun nekali' luk pangeh nengayud ngadandeh luun surat belih tana', idi amung lun Yahudi luk tudo luun natad ineh.

¹³ Idi kebalaku ni Baruk pa kiung amungdeh,

¹⁴ ‘Tuhan luk Melalud, Allah lun Israil pangeh nengecuk namu ngalap surat ini, do' surat belih tana' luk imut idi luk mukab teh. Do' nganau' surat ini bang kuden pad ieh na miak metutu'.’

¹⁵ Kebala Tuhan luk Melalud, Allah lun Israil, ‘Muci aco lemulun miak melih ruma', lati', idi kabun anggur bang bawang ini.’ ”

Sembayang Yeremia

¹⁶ Kareb ui pangeh nemaré surat belih tana' kuan Baruk Neria, idi ui nesembayang, kebalaku,

¹⁷ “O Tuhan Allah, Iko luk nenganau' tana' idi langit dengan lalud idi tuehMu luk rayeh. Na luk idi anun-anun luk na miak ruenMu.

¹⁸ Iko pangeh nengegala' éi'Mu kuan tuda'-tuda' ngeribu lemulun, iamo' Iko ngukum lemulun ngaceku sala' tamandeh. Iko mo' Allah luk rayeh idi melalud. Idi ngadanMu, ieh ineh Tuhan luk Melalud.

¹⁹ Iko luk inan terawé luk pelaba do' idi megéi' nganau' kekamen luk melalud. Iko nier amung-amung luk ruen lemulun. Idi Iko ngua' kuandeh, maya' kudeng luk kikemdeh.

²⁰ Iko nenganau' kekamen luk melalud idi luk inan mawa déi' bawang Masir. Idi Iko na ugka' nganau' luk kudeng ineh pad macing aco sini pana', do' bang bawang Israil idi bang bawang pupu baken pana', pad Iko buren iapeh-iapeh pana'.

²¹ Dengan kekamen luk melalud idi luk inan mawa luk nengatot bunu' kai, Iko nengegala' lalud idi tuehMu, pad Iko miak nguit pupuMu Israil rat bang bawang Masir.

²² Iko nemaré kuandeh tana' ini luk mebaleng, luk pijani'Mu kuan tepundeh.

²³ Iamo' kareb ideh nesemuet bang bawang ini idi nengalap neneh ku babpatdeh, idi na ideh nemaya' amung ukumMu idi bada'Mu. Na ideh nenganau' anun-anun luk icukMu nedeh. Ngaceku ineh Iko nengacing amung dereh ini kuandeh.

²⁴ “Lun Babil pangeh nenganau' tuda'-tuda' dalan tana' luk medita' libut-libut bawang Yerusalim, pad ideh miak semuet idi ngelaya' bawang ineh. Ngaceku bunu', lau, idi ét, bawang ineh malé ruendeh ngelaya'. O Tuhan, Iko miak nier idi amung-amung luk bida'Mu pangeh nangun.

²⁵ Iamo', Tuhan Allah, Iko luk nengecuk negku melih tana' ini pa kiung lun luk nekali', sagan tu pana' bawang ini malé ruen lun Babil ngelaya'.”

²⁶ Idi kebala Tuhan ni Yeremia,

²⁷ “Ui ini Tuhan Allah amung lemulun. Na luk idi anun-anun luk na miak ruenKu.

²⁸ Ngaceku ineh, Ui miak maré bawang ini kuan Nebukadnesar, raca' Babil idi bawehneh, idi ideh miak ngelaya' neneh.

²⁹ Idi lun Babil luk ngerieng bawang ini miak amé' ngeseb neneh. Ideh miak ngeseb bawang idi amung ruma' su luk inan lemulun nganau' Negku museh, ngaceku ngeseb umau luk do' buen kuan Baal luun apodeh, idi ngutang baré luk rupen kuan allah baken.

³⁰ Rat pun-pun, lun Israil idi lun Yahuda pangeh nenganau' luk na petulu dengan pinianKu. Lun Israil pangeh nenganau' Negku museh ku akang luk inau'deh.

³¹ Bawang ini pangeh nenganau' Negku museh idi megateh rat pun-pun ineh pinudut. Ui pangeh nemutut ukum idi sikal ngusag neneh,

³² ngaceku amung-amung dat luk pangeh inau' lun Israil idi lun Yahuda, dengan amung raca' idi lun rayehdeh, lun imam idi nabideh, idi pupu Yahuda idi Yerusalim.

³³ Ideh neteketed rat Negku, idi sagan tu pana' Ui na ugka' mada' nedeh, nateh ideh neninger idi pian badén.

³⁴ Meluun teh ideh nengerareng amung akang luk inanKu megateh bang Ruma' Allah luk pinudut dengan ngadanKu, pad ideh nengelutak neneh.

³⁵ Ideh pangeh nemudut bubpun kuan Baal déi' Ruan Hinom, pad ideh miak maré anakdeh luk deléi idi decur kuan allah Molek. Na Ui nengecuk nedeh nganau' luk kudeng ineh pad ideh nguit nelun Yahuda nganau' sala'.”

Aceh Jani' Luk Maré Rapet

³⁶ Kebala Tuhan Allah lun Israil, “O Yeremia, iko pangeh nemada' pupu ini ratnan bunu', lau, idi ét luk miak nganau' bawang ini ruen raca' Babil ngelaya'. Idi nekini do' iko ninger luk badénKu teh.

³⁷ Ui pian ngamung amung-amung pupu rat anid-anid bawang luk inanKu nematad nedeh dengan useh idi gatehKu. Idi Ui sikal nguit nedeh muli' amé' bawang ini, pad ideh do' udeng.

³⁸ Idi ideh mangun ku pupuKu, idi Ui mangun ku Allahdeh.

³⁹ Idi Ui miak maré kuandeh sebuleng terawé, pelé ideh matot Negku ruked-ruked, pad ideh ngalap peruan dengan inuldeh pana'.

⁴⁰ Ui miak nganau' kuandeh aceh pejani' luk meruked. Na Ui ugka' nganau' luk do' kuandeh, pad niatdeh matot Negku, idi ideh na teketed rat Negku.

⁴¹ Idi dengan mawang niat Ui miak ngeperuan nedeh, idi dengan amung niatKu Ui miak ngeletep nedeh ruked-ruked bang bawang ini.

⁴² “Mepad kudeng Ui pangeh nengacing susa' kuan pupu ini, kudeng ineh teh Ui miak maré kuandeh amung-amung peruan luk pijani'Ku.

⁴³ O Yeremia, iko nepebala, ‘Bawang ini miak mangun ku su luk ali-ali, pad na lemulun idi pung pana', idi ieh miak barén kuan lun Babil.’ Iamo' muci lemulun miak melih tana' bang bawang ini.

⁴⁴ Lemulun miak melih tana' ineh, idi ngayud ngadan luun surat tana' ineh idi ngamut surat ineh pa kiung lemulun luk nekali'. Amung ini miak mangun bang babpat Beniamin, ieh ineh bang bawang luk libut-libut Yerusalim, amung bawang Yahuda, amung bawang luk luun pegkung, amung bawang luk luun raked, idi amung bawang luk déi' Negeb. Ui miak nguit pupu ini muli' amé' bawangdeh. Ui ini Tuhan pangeh nepebala.”