YEREMIA 3 - BALA LUK DO'

Israil Na Lutep Inan Tuhan

¹ Kebala Tuhan, “Kudeng seburur deléi ngelegkan awanneh, pad decur ineh buro idi lapen deléi baken, idi na ieh miak ngalap neneh baruh peh. Ngaceku kekamen luk kudeng ineh ngelutak bawang. O Israil, iko pangeh nengalap mula' awan, iamo' nekini iko pian lemubed amé' Negku!

² Tukag iko nier luun anid-anid pegkung luk inanmu nepasét. Iko nenganét deléi iring dalan, mepad kudeng lun Arab luk ngabang lemulun déi' su luk ali-ali. Iko pangeh nengelutak bawang ku kekamenmu luk dat.

³ Ini punneh Ui na maré udan kareb muyuh nganau' lati'. Ayumu pana' mepad kudeng decur luk mesawa', idi iko na migu'.

⁴ “Idi nekini iko neten Negku tamanmu, idi iko mala Negku mawa namu ratmu isuut.

⁵ Idi teh iko mala Negku na museh namu ruked-ruked! O Israil, sagan pana' balamu kudeng ineh iamo' iko pangeh nenganau' luk pelaba dat.”

Tuhan Ngecuk Israil Idi Yahuda Uren

⁶ Kareb imet Raca' Yosia, idi Tuhan nepebala negku, kebalaNeh, “Yeremia, pangeh iko nenier luk inau' Israil, decur luk na lutep ineh? Ieh iné' inan anid-anid pegkung, idi iné' liang anid-anid kayuh luk mebata' idi pasét.

⁷ Idi Ui ini Tuhan nengerawé, sagan pana' ieh nenganau' luk kudeng ineh, miak teh ieh lemubed amé' Negku, iamo' na ieh pian, idi kinanakneh Yahuda luk na lutep pana' nekali' amung ini.

⁸ Idi teh Yahuda nekali' Negku nengelegkan Israil idi nengecuk neneh buro, ngaceku ieh pangeh nelemubed rat Negku idi mangun ku decur luk mesawa'. Iamo' Yahuda, kinanak Israil luk na lutep, na mileh matot. Ieh pana' mangun ku decur luk mesawa',

⁹ idi na migu' teh. Idi teh ieh nengelutak bawang, ngaceku ieh nepasét kareb ieh sembayang inan batu idi kayuh.

¹⁰ Pangeh ineh Yahuda, kinanak Israil luk na lutep, nesiayu lemubed amé' Negku. Iamo' na ieh nelemubed dengan niatneh luk matu. Ui ini Tuhan luk pebala namu.”

¹¹ Idi kebala Tuhan negku, “Sagan pana' Israil neteketed rat Negku, ieh meluun do' rat ni Yahuda luk na lutep.”

¹² Kebala Tuhan negku, “Yeremia, do' iko amé' pa tinueh busat aco idi mada' ni Israil kudeng ini, ‘O Israil luk na lutep, do' lemubed amé' Negku. Na Ui museh namu ruked-ruked, ngaceku Ui méi' namu.

¹³ Do' iko mala namu lun mesala' idi nengelaba bala Tuhan Allahmu. Do' iko ngamo iko pangeh mawa inan allah baken liang anid-anid kayuh luk mebata', idi ngamo namu na nemaya' balaKu. Ui ini Tuhan luk pebala namu.

¹⁴ “ ‘O pupu luk na lutep, do' muyuh lemubed amé' Negku, ngaceku Ui ini Tuhan muyuh. Ui miak ngalap seburur muyuh rat anid bawang, idi dueh burur ratnan anid pupu, idi Ui miak nguit nemuyuh lemubed amé' Pegkung Sion.

¹⁵ Idi Ui miak maré nelun rayeh luk maya' Negku ngimet nemuyuh dengan ilehdeh.

¹⁶ Kareb muyuh amé' mula' bang bawang ineh, na lun pian pebala ratnan Pati' Pejani' Tuhan, idi na ngerawé ineh, idi na pian nganau' sebuleng baruh teh.

¹⁷ Bang kareb ineh Yerusalim miak tetanen kerusi Tuhan, idi amung pupu miak mepamung ieneh dengan ngadanKu. Idi ideh pana' na nganau' luk dat, maya' pian niatdeh luk metueh.

¹⁸ Idi Israil miak perurum dengan Yahuda, idi didueh miak pebaya' ratnan bawang luk inandeh tudo luk pa tinueh busat aco amé' tana' luk biré kuan tepun muyuh luk mangun ku babpat muyuh ruked-ruked.’ ”

Pupu Allah Sembayang Inan Akang

¹⁹ Kebala Tuhan, “O Israil, Ui pangeh nengerawé namu mangun ku anakKu, pad Ui miak maré tana' luk do' kuanmu, luk meluun do' bang tana' ini. Ui nengerawé iko neten Negku Tamanmu idi na lemubed rat Negku baruh peh.

²⁰ Iamo' iko mepad kudeng decur luk na lutep inan awanneh, kudeng ineh teh iko na lutep Negku. Ui ini Tuhan luk pebala namu.”

²¹ Idi inan tangi' déi' luun pegkung; ieh ineh tangi' lun Israil mutuh pedengan ratnan Tuhan, ngaceku ideh mesala' idi nekelupan Tuhan Allahdeh.

²² O amung muyuh luk nenecan Tuhan, do' muyuh lemubed amé' matun Neneh. Ieh miak ngedo' nemuyuh, idi nganau' nemuyuh lutep. Kebala muyuh, “Mo, kai amé' inan Tuhan, ngaceku Ieh ineh Tuhan Allah kai.

²³ Ngaceku na ulekneh kai sembayang dengan lun luk na manu déi' luun pegkung. Iamo' Tuhan Allah tau mo' luk miak ngulun nelun Israil.

²⁴ Amung binaweh idi aya' luk ilap taman kai dengan anakdeh sebuleng pana' nabud, ngaceku kai nesembayang inan Baal rat isuut.

²⁵ Do' tau tudo idi nima' igu' tau ngelinged netau. Ngaceku tau idi taman tau pangeh nenganau' sala' pa kiung Tuhan Allah tau rat isuut, idi tau na nemaya' balaNeh.”