YEREMIA 29 - BALA LUK DO'

Surat Yeremia Kuan Lun Yahudi Déi' Babil

¹ Nabi Yeremia nengayud aceh surat kuan amung lun rayeh, imam, nabi, idi pupu Yahuda luk tiban Nebukadnesar rat Yerusalim iné' Babil.

² Ieh nengayud surat ineh muci ratnan Raca' Yoyakin, tinanneh, amung lun rayeh bang ruma' raca', amung lun rayeh Yahuda idi Yerusalim, idi amung lun luk mileh bang anid-anid kekamen pangeh tiban rat Yerusalim.

³ Sedekia, raca' Yahuda nengecuk Elasa Sapan idi Gemaria Hilkia nated surat ineh ni Nebukadnesar raca' Babil. Idi kebala surat ineh kudeng ini:

⁴ “Kebala Tuhan luk Melalud, Allah lun Israil, kuan amung lemulun luk sinima' Tuhan tiban Nebukadnesar rat Yerusalim iné' Babil,

⁵ ‘Do' muyuh mudut ruma' idi tebawang, idi nganau' kabun idi kuman luk tibuen muyuh.

⁶ Do' muyuh ngaweh pad muyuh inan anak. Idi nima' anak muyuh ngaweh, pad ideh pana' inan anak, idi muyuh amé' mula'.

⁷ Do' ngakem kuan bawang luk inanKu nemaré nemuyuh tebanen, pad bawang ineh ruen ngeperuan. Do' mutuh Negku ngeperuan bawang ineh, ngaceku kudeng ieh ruen ngeperuan, muyuh pana' miak ruen ngeperuan teh.

⁸ Ui ini Tuhan Allah lun Israil, mada' nemuyuh pad muyuh na saluken nabi-nabi luk tudo arang muyuh idi idé-idé pana' luk mada' ratnan luk miak macing muci. Aleg maya' nupideh.

⁹ Ideh mebalih dengan ngadanKu. Na Ui nengecuk nedeh. Ui ini Tuhan pangeh nepebala.’

¹⁰ “Kebala Tuhan, ‘Kareb mabud tudu' ngepulu' lak déi' Babil, Ui miak méi' nemuyuh idi maya' jani'Ku idi nguit nemuyuh muli'.

¹¹ Ui sebuleng mo' kali' luk pianKu kuan muyuh, pad muyuh ruen ngeperuan, idi na medereh peh, pelé muyuh miak ngalap luk pian muyuh.

¹² Kareb ineh muyuh miak nawar Negku idi sembayang mutuh rat Negku, idi Ui miak ngua' sembayang muyuh.

¹³ Muyuh miak nakap Negku, idi muyuh miak miti Negku, ngaceku muyuh nakap Negku dengan amung niat muyuh.

¹⁴ Ui ini Tuhan pebala, muyuh miak miti Negku, idi Ui miak nguit nemuyuh muli' amé' bawang muyuh. Ui miak ngamung nemuyuh rat bang anid bawang idi su luk inanKu nengatad nemuyuh. Idi Ui miak nguit nemuyuh muli' amé' bawang luk inanKu nemaré nemuyuh tiban. Ui ini Tuhan pangeh nepebala.’

¹⁵ “Kebala muyuh, ‘Tuhan pangeh nemaré nabi kuan kai déi' Babil.’

¹⁶ Do' ninger luk bila Tuhan ratnan raca' luk ngimet bawang mepad kudeng Raca' Daud, idi ratnan amung lemulun bang bawang ini, ieh ineh pupu muyuh luk na tiban maya' nemuyuh.

¹⁷ Kebala Tuhan luk Melalud, ‘Ui ngacing bunu', lau, idi ét kuandeh, idi Ui miak nganau' nedeh mepad kudeng bua' gita' luk melu luk na miak kenen.

¹⁸ Ui miak ngeradu' nedeh idi ngacing bunu', lau, idi ét kuandeh, pad amung pupu bang tana' ini miak megagap ku ideh. Iapeh-iapeh pana' luk inanKu ngatad nedeh, lun baken miak megagap idi matot, ngaceku luk pangeh nangun kuandeh. Ideh miak situnga nedeh idi neten ngadandeh ku kediman.

¹⁹ Amung ini miak mangun kuandeh ngaceku ideh na maya' bala luk megéi' bida' kuandeh dengan tang demulun idi nabiKu. Ideh ara' ninger bala ineh.

²⁰ Do' amung muyuh luk biréKu tiban raca' Babil rat Yerusalim, ninger luk bilaKu, ieh ineh Tuhan.’

²¹ “Kebala Tuhan luk Melalud, Allah lun Israil ratnan Akab Kolaya idi Sedekia Masia, luk mebalih dengan ngadanNeh, ‘Ui miak maré nedidueh bang palad Nebukadnesar raca' Babil luk miak ngaté nedidueh pa kiung muyuh.

²² Kareb lemulun luk tiban rat Yerusalim iné' Babil pian ngediman seburur lemulun idi ideh miak pebala, “Nima' Tuhan nganau' kuanmu mepad kudeng luk inau' raca' Babil kuan Sedekia idi Akab luk isebneh mulun!”

²³ Amung ini miak mangun kuandeh ngaceku ideh nenganau' luk mebacé — ideh pasét idi mebalih dengan ngadan Tuhan. Ini baken luk pianKu. Ui kali' amung kekamendeh, idi Ui mangun ku lun nekali' nedeh. Ui ini Tuhan pangeh nepebala.’ ”

Surat Semaya

^24-25 Tuhan luk Melalud, Allah lun Israil nengecuk ni Yeremia mada' ni Semaya rat Nehelam, luk pangeh nemaré surat dengan ngadanneh kuan amung lun Yerusalim, idi kuan Imam Sepania Masia idi kuan amung imam baken. Idi kebala Semaya bang surat luk biréneh ni Sepania:

²⁶ “Tuhan nenganau' namu mangun ku imam ku libal Yoyada, idi nekini iko lun rayeh bang Ruma' Allah. Do' iko ngecuk nelun ngaling amung lun luk mebacé luk siayu mangun ku nabi, idi ngabet dierdeh ku belawan.

²⁷ Ngudeh iko na nengukum ni Yeremia rat Anatot luk ngedita' bururneh arang muyuh mepad kudeng nabi.

²⁸ Do' ngukum ni Yeremia ngaceku kebalaneh nelun luk tiban déi' Babil, ‘Kali' rungen muyuh mio déi' Babil. Do' muyuh mudut ruma' idi tebawang, idi nganau' kabun idi kuman luk tibuen muyuh.’ ”

²⁹ Surat Semaya ini bica' Imam Sepania ni Yeremia.

³⁰ Idi kebala Tuhan ni Yeremia,

^31-32 “Do' maré bala ini kuan amung-amung lun luk tiban déi' Babil, ‘Kudeng ini bala Tuhan ratnan Semaya: Ui ini Tuhan miak ngukum ni Semaya dengan amung inulneh. Na Ui nengecuk neneh, iamo' ieh nepebala nemuyuh mepad kudeng nabi, pad muyuh nemaya' balihneh. Na ieh miak inan inul arang muyuh. Ieh na miak mulun, pad ieh nier amung-amung luk do' luk miak ruenKu kuan pupuKu, ngaceku ieh nengecuk nedeh ngelaba balaKu. Ui ini Tuhan pangeh nepebala.’ ”