YEREMIA 28 - BALA LUK DO'

Yeremia Idi Nabi Hanania

¹ Bang lak ineh teh, ieh ineh bang bulan luk kelimeh idi lak luk keapat kareb imet Raca' Sedekia, idi Hanania Asur, seburur nabi rat bawang Gibion nepebala ni Yeremia bang Ruma' Allah. Kebalaneh ni Yeremia pa kiung amung imam idi lun mula' teh,

² “Kudeng ini bala Tuhan luk Melalud, Allah lun Israil, ‘Ui pangeh nengelaya' raca' Babil.

³ Bang dueh lak Ui miak nguit lemubed amung binaweh luk tiban Raca' Nebukadnesar rat Ruma' Allah iné' Babil.

⁴ Idi Ui miak nguit ni Yoyakin Yoyakim, raca' Yahuda dengan amung lun luk tiban rat Yahuda iné' Babil, muli'. Mo, Ui miak ngelaya' raca' Babil. Ui ini Tuhan pangeh nepebala.’ ”

⁵ Idi kebala Yeremia inan Nabi Hanania pa kiung amung imam idi lun mula' luk tuped bang Ruma' Allah,

⁶ “Do' kudeng amung ineh mangun, idi Tuhan ngacing amung balamu, pad Ieh nguit lemubed rat Babil amung binaweh Ruma' Allah idi amung lemulun luk pangeh tiban.

⁷ Iamo' ninger luk belénku namu idi nelun mula' teh.

⁸ Nabi-nabi luk nemada' atun rat negku idi rat namu teh nemada' ratnan bunu', lau, idi ét luk miak macing kuan mula' pupu idi imet luk rayeh.

⁹ Iamo' nabi luk mada' na miak inan bunu', baken nabi luk icuk Tuhan, kudeng luk bila nabi ineh na uen ngacing.”

¹⁰ Idi Hanania nengalap paga' rat luun dier Yeremia idi nemutul neneh.

¹¹ Idi kebala Hanania pa kiung lun mula', “Kudeng ini bala Tuhan, ‘Ui miak mutul paga' luk inau' Raca' Nebukadnesar luun dier amung-amung pupu bang dueh lak kinioneh.’ ” Kareb ieh neninger bala ineh, idi Nabi Yeremia neburo rat neneh.

¹² Muci ratnan Hanania nemutul paga' luk luun dier Yeremia, idi kebala Tuhan ni Yeremia,

¹³ “Amé' mada' ni Hanania, kebalamu, ‘Kebala Tuhan, Iko miak mutul paga' kayuh, iamo' Ieh miak ngelibal neneh ku paga' belawan.

¹⁴ Kebala Tuhan luk Melalud, Allah lun Israil, Ui miak nganau' paga' belawan luun dier amung-amung pupu ini, idi ideh miak mangun ku demulun Nebukadnesar, Raca' Babil. Idi Ui miak maré amung-amung pung luk meliput pana' kuan Nebukadnesar.’ ”

¹⁵ Idi kebala Yeremia ni Hanania, “O Hanania, do' iko ninger! Na iko icuk Tuhan, idi iko ngeraruh pupu ini pad ideh maya' balihmu.

¹⁶ Ngaceku ineh, kebala Tuhan, ‘Ui pian nala' namu. Kareb nateh lak ini mabud iko miak maté ngaceku iko nengecuk pupu ini ngelaba bala Tuhan.’ ”

¹⁷ Idi Nabi Hanania naté bang bulan luk ketudu' bang lak ineh.