YEREMIA 27 - BALA LUK DO'

Yeremia Ngayung Ku Paga' Sapi'

¹ Muci ratnan Sedekia Yosia mangun ku raca' Yahuda, idi Tuhan nengecuk ni Yeremia

² nganau' aceh paga' ratnan kubil sapi' idi raken kayuh, pad ieh miak ruen luun dierneh.

³ Idi Tuhan nengecuk neneh maré aceh bala iten lun duken raca'-raca' Edom, Moab, Amon, Sur, idi Sidon luk pangeh iné' Yerusalim pad ideh papu' Raca' Sedekia.

⁴ Tuhan luk Melalud, Allah lun Israil nengecuk ni Yeremia ngecuk nelun duken ineh mada' raca'-raca'deh ratnan luk bila Tuhan, kebalaNeh,

⁵ “Ui ini dengan lalud idi tuehKu luk rayeh, nemudut tana' ini, idi lemulun idi amung pung luk tudo luun tana'. Idi Ui miak maré neneh kuan idé-idé luk pianKu.

⁶ Ui luk pangeh nenganau' amung pupu ini bang palad demulunKu Nebukadnesar raca' Babil, amung pung luk meliput pana' biréKu neneh.

⁷ Amung pupu miak mangun ku demulunneh, idi demulun anakneh, idi demulun mupunneh pana', pad macing tarekneh bawangneh sebuleng miak uen ngelaya'. Idi pupuneh sebuleng miak mangun ku demulun tuda'-tuda' pupu baken luk melalud idi raca'-raca' luk rayeh.

⁸ “Iamo' kudeng aceh pupu idi bawang na pian uen Nebukadnesar ngimet, idi uenneh ngebeneh, idi Ui miak ngukum bawang ineh dengan bunu', lau, idi ét pana', pad bawang ineh uen Nebukadnesar ngimet.

⁹ Aleg ninger bala nabi muyuh, idi idé-idé pana' luk mada' ratnan luk miak macing muci, dengan mada' nupi, idi dengan nawar ada' lun naté, idi dengan ileh Sétan. Amung-amungdeh mebpeng nemuyuh na miak mangun ku demulun raca' Babil.

¹⁰ Ideh naluk nemuyuh, pad muyuh tebanen amé' mado ratnan bawang muyuh sebuleng. Ui miak masut nemuyuh, idi muyuh miak pitayen.

¹¹ Iamo' kudeng aceh pupu maya' bala raca' Babil idi mangun ku demulunneh, idi Ui miak nima' pupu ineh lutep tudo bang bawangdeh sebuleng, pad ideh nganau' lati' idi tudo déi'. Ui ini Tuhan pangeh nepebala.”

¹² Kudeng ineh teh bala Yeremia kuan Sedekia raca' Yahuda, kebalaneh, “Do' maya' bala raca' Babil, idi mangun ku demulunneh, idi demulun anak itinneh pana' pad iko mulun.

¹³ Ngudehké iko idi anak itinmu pitayen bang bunu', idi maté ku lau idi ét pana'. Amung ineh miak mangun kuan anid-anid pupu luk na mangun ku demulun raca' Babil.

¹⁴ Aleg iko ninger bala nabi-nabi luk mebpeng namu na miak mangun ku demulun raca' Babil. Ideh naluk namu.

¹⁵ Kebala Tuhan, Na Ui nengecuk nedeh, idi ideh mebalih dengan ngadanKu. Ngaceku ineh, Ui miak masut namu idi iko miak pitayen, idi nabi-nabi luk mebalih ineh.”

¹⁶ Idi Yeremia nemada' nelun imam idi pupu ineh luk pangeh bila Tuhan, kebalaNeh, “Aleg muyuh ninger bada' nabi-nabi luk pebala, ‘Amung binaweh Ruma' Allah miak iten lemubed rat bawang Babil.’ Ideh mebalih pa kiung muyuh.

¹⁷ Aleg ninger baladeh. Do' mangun ku demulun raca' Babil pad muyuh mulun. Ngudehké muyuh nima' bawang muyuh uen ngusag?

¹⁸ Kudeng ideh nabi luk matu luk kali' balaKu do' ideh mutuh Negku, Tuhan luk Melalud, pad Ui na nima' binaweh luk ketecan déi' Yerusalim, bang Ruma' Allah idi bang ruma' raca', iten amé' Babil.”

^19-20 (Kareb Raca' Nebukadnesar nenaban Yoyakin Yoyakim, raca' Yahuda iné' Babil dengan amung lun rayeh Yahuda idi Yerusalim, ieh nenecan amung diri, idi luk inan sibaru', amung alen, idi tuda'-tuda' binaweh baken rat bang Ruma' Allah.)

²¹ “Ninger balaKu, ieh ineh Tuhan luk Melalud, Allah lun Israil ratnan binaweh luk ketecan déi' Yerusalim bang Ruma' Allah idi bang ruma' raca' pana'.

²² Ideh miak iten amé' Babil idi ketecan déi', pad Ui ngerawé binaweh ineh teh. Idi Ui miak nguit binaweh ineh lemubed idi ngerareng amung ineh bang su luk inandeh. Ui ini Tuhan pangeh nepebala.”