YEREMIA 26 - BALA LUK DO'

Yeremia Tinutun Bang Besara'

¹ Kareb Raca' Yoyakim Yosia nengimun ngimet bawang Yahuda,

² idi kebala Tuhan ni Yeremia, “Do' tuped luun natad Ruma' Allah idi mada' amung-amung luk icukKu namu, kuan amung-amung lemulun luk macing rat bawang-bawang Yahuda, pad ideh sembayang déi'. Aleg mekelupan sebila' bala pana'.

³ Kian, lemulun ineh miak ninger idi necan kekamendeh luk dat lek. Kudeng pieh kudeng ineh Ui miak ngisu' terawéKu ratnan ukum luk uenKu ngacing kuandeh ngaceku kekamendeh luk dat ineh.”

⁴ Tuhan nengecuk ni Yeremia pebala inan pupu ineh, “Ui ini Tuhan ngecuk nemuyuh maya' Negku idi maya' amung bada' luk biréKu nemuyuh.

⁵ Do' muyuh ninger amung bala demulunKu, lun nabi luk megéi' dukenKu amé' nemuyuh. Macing nekini pana' muyuh nateh nemaya' baladeh.

⁶ Kudeng muyuh na maya' luk icukKu ini, idi Ui miak ngukum Ruma' Sembayang ini mepad kudeng luk inau'Ku déi' Silo. Amung pupu bang tana' ini miak neten ngadan bawang ini ku kediman.”

⁷ Amung lun imam idi nabi idi amung pupu ineh neninger luk bila Yeremia bang Ruma' Allah.

⁸ Kareb Yeremia pangeh nemada' amung-amung luk icuk Tuhan neneh, idi amung lun imam idi nabi idi pupu ineh pana' nengakem neneh, idi nengitang, “Na miak na iko pitayen ngaceku balamu ineh!

⁹ Ngudehké iko pebala dengan ngadan Tuhan, ‘Ruma' ini miak mangun mepad kudeng Silo, idi bawang ini miak uen ngusag, pad seburur pana' nateh luk miak tudo ieneh?’ ” Idi pupu ineh nengerieng ni Yeremia déi' bang Ruma' Allah.

¹⁰ Kareb amung lun rayeh Yahuda neninger bala ratnan luk pangeh nangun, idi ideh nenalan rat ruma' raca' idi iné' tuped munung Tanga' Baruh déi' Ruma' Allah.

¹¹ Idi kebala amung lun imam idi nabi kuan lun rayeh idi kuan pupu ineh, “Na miak na lemulun ini pitayen ngaceku ieh nengadu' bawang tau. Muyuh sebuleng pangeh neninger balaneh.”

¹² Idi kebala Yeremia kuan amung lun rayeh idi pupu ineh pana', “Tuhan nengecuk negku mada' amung-amung bala luk pindenger muyuh ratnan Ruma' idi bawang ini.

¹³ Do' muyuh ngisu' lawé muyuh idi kekamen muyuh, idi maya' bala Tuhan Allah muyuh, pad Ieh miak ngisu' terawéNeh ratnan ukum luk miak uenNeh ngacing kuan muyuh.

¹⁴ Iamo' ui ini bang palad muyuh. Do' nganau' anun-anun luk mesiri idi luk matu bang terawé muyuh.

¹⁵ Iamo' kudeng muyuh ngaté negku, kali' rungen muyuh idi lun luk tudo bang bawang ini mesala', ngaceku ngaté lemulun luk na mesala', ngaceku Tuhan luk nengecuk negku mada' amung bala ini kuan muyuh.”

¹⁶ Idi kebala amung lun rayeh idi pupu ineh kuan lun imam idi nabi, “Lemulun ini na miak pitayen, ngaceku ieh nemada' netau dengan ngadan Tuhan Allah tau.”

¹⁷ Pangeh ineh tuda'-tuda' burur lun rayeh netuped idi nepebala kuan lemulun luk pangeh nepamung,

¹⁸ “Kareb Raca' Hesekia nengimet bawang Yahuda, idi Nabi Mika rat Moreset nemada' nelun mula', kebalaneh, ‘Kudeng ini bala Tuhan luk Melalud: Sion miak uen ngeradu mepad kudeng lati'; Yerusalim miak mangun ku perupun batu mo', idi surud su inan Ruma' Allah miak mangun ku pulung.’

¹⁹ Idi Hesekia raca' Yahuda idi anak itinneh na nengaté ni Mika. Iamo' Hesekia matot inan Tuhan idi pian inanNeh méi'. Idi Tuhan nengisu' terawéNeh ratnan ukum luk miak uenNeh ngacing kuandeh. Idi nekini tau sikal ngacing aceh ukum luk pelaba rayeh kuan burur tau sebuleng.”

²⁰ (Idi inan seburur lemulun teh, ieh ineh Uria Semaya rat Kiriat Yarim, luk nemada' dengan ngadan Tuhan. Idi ieh nengadu' bawang ini idi pupu ini mepad kudeng luk inau' Yeremia.

²¹ Kareb Raca' Yoyakim idi bawehneh idi lun rayehneh neninger luk bila Uria, idi raca' ineh pana' pian ngaté neneh. Iamo' Uria nekali' baladeh; idi ieh neburo iné' Masir.

²² Iamo' Raca' Yoyakim nengecuk ni Elnatan Akbor idi tuda'-tuda' burur lun baken amé' Masir pad ideh miak ngalap ni Uria.

²³ Ideh nenguit ni Uria lemubed rat Masir kuan Raca' Yoyakim luk nengecuk ngaté neneh idi nala' butungneh bang lengutan lun masi'.)

²⁴ Idi Ahikam Sapan nengedengan ni Yeremia, pad ieh na barén kuan pupu ineh idi pitayen.