YEREMIA 25 - BALA LUK DO'

Bunu' Rat Pa Tinueh Busat Aco

¹ Bang lak luk keapat kareb imet Yoyakim Yosia, raca' Yahuda, idi Yeremia nengalap bala Tuhan ratnan amung pupu Yahuda. (Ieh ineh bang lak luk pun-pun, kareb imet Nebukadnesar raca' Babil.)

² Idi kebala Yeremia kuan amung pupu Yahuda idi kuan amung lemulun luk tudo déi' Yerusalim,

³ “Tuhan pangeh nepebala negku dueh ngepulu' teluh lak kinioneh, ieh ineh rat lak luk kepulu' teluh kareb imet raca' Yosia Amon nelun Yahuda pad macing aco sini idi na ui ugka' mada' nemuyuh ratnan luk bilaNeh. Iamo' na muyuh nemaya' balaNeh.

⁴ Muyuh na neninger idi na nemaya' balaNeh, sagan tu pana' Tuhan na ugka' ngecuk demulunNeh lun nabi amé' nemuyuh.

⁵ Ideh nengecuk nemuyuh lumi ratnan lawé idi kekamen muyuh luk dat, pad muyuh miak tudo bang bawang luk biré Tuhan nemuyuh idi inan tepun muyuh mangun ku babpat muyuh luk meruked.

⁶ Ideh nengecuk nemuyuh na sembayang idi na maya' allah baken, idi na nganau' Tuhan museh ngaceku sembayang inan akang luk pangeh inau' muyuh. Kudeng muyuh pangeh nemaya' bala Tuhan, idi na Ieh pian ngukum nemuyuh.

⁷ Iamo' kebala Tuhan, ‘Muyuh na sikal ninger balaKu. Iamo' muyuh nganau' Negku museh ngaceku akang muyuh. Idi muyuh pangeh nengacing ukumKu kuan burur muyuh sebuleng.’

⁸ “Idi ngaceku muyuh na neninger balaNeh, kebala Tuhan luk Melalud,

⁹ ‘Ui miak nawar amung pupu rat pa tinueh busat aco, idi demulunKu Nebukadnesar raca' Babil. Idi Ui miak nguit nedeh munu' nemuyuh idi amung pupu libut-libut muyuh. Idi Ui miak ngusag bawang-bawang muyuh pad ideh na miak piduten ruked-ruked peh. Idi amung-amung lemulun miak megagap nier luk mangun kuan muyuh. Ui ini Tuhan pangeh nepebala.

¹⁰ Idi Ui miak ngagka' do' ria' idi awang niatdeh, dengan tang decur idi deléi luk sikal ngaweh. Idi Ui miak ngagka' uni iung lemulun luk tupeh. Idi Ui miak ngilep lapungdeh.

¹¹ Idi aput bawang ini miak uen ngusag, pad ieh pelaba dat ayu. Idi amung-amung pupu ini miak mangun ku demulun raca' Babil tudu' ngepulu' lak kinioneh.

¹² Muci ratnan ineh Ui miak ngukum raca' Babil idi anak itinneh ngaceku sala'deh. Ui miak ngusag bawangdeh, pad ieh na piduten ruked-ruked.

¹³ Ui miak ngukum bawang Babil maya' kudeng luk bilaKu, idi luk inayud bang surat ini, ieh ineh amung-amung ukum luk bila Yeremia miak macing kuan amung pupu ini.

¹⁴ Mula' pupu idi raca'-raca' luk rayeh miak naban nedeh mangun ku demulun, idi Ui miak ngua' amung kekamendeh luk dat.’ ”

Ukum Tuhan Kuan Pupu-Pupu

¹⁵ Kebala Tuhan Allah lun Israil negku, “Ini aceh sangkir abpa' anggur luk mepanu' ku usehKu. Ui ngecuk namu nguit sangkir ini kuan tuda'-tuda' pupu luk badénKu namu, pad ideh ngirup abpa' ini.

¹⁶ Kareb ideh ngirup abpa' ini ideh idar-idar lawé idi meraruh terawé ngaceku bunu' luk uenKu ngacing kuandeh.”

¹⁷ Idi ui nengalap sangkir ineh rat bang palad Tuhan idi nemaré abpa' ineh rupen amung-amung pupu luk bida' Tuhan negku.

¹⁸ Yerusalim idi amung-amung bawang Yahuda dengan raca'-raca' idi penguludeh nengirup abpa' ineh pad bawang ineh mangun ku su luk ali-ali. Idi amung-amung lemulun megagap nier luk pangeh nangun kuandeh, pad ngadandeh tetanen lemulun ku kediman. (Idi kudeng ini luk mangun macing aco sini.)

^19-26 Ini ngadan lemulun luk nengirup abpa' ineh: raca' Masir idi amung pengulu idi lun rayehneh; amung lun Masir, idi sakaideh; amung raca' bawang Us; amung raca' bawang Pilistin: ieh ineh bawang Askelon, Gasa, Ekeron, idi luk ketecan ratnan bawang Asdod; amung pupu Edom, Moab, idi Amon; amung raca' Sur idi Sidon; amung raca' luk ngimet bawang tangeb Abpa' Rayeh; amung bawang Dedan, Tema, idi Bus; amung pupu luk mekamu' abpuk; amung raca' bawang Arab; amung raca' lemulun luk tudo déi' su luk ali-ali; amung raca' Simri, Elam, idi Midi; amung raca' rat pa tinueh busat aco luk muneng idi luk mado, ieh ineh amung-amungdeh. Anid pupu bang tana' ini na miak na ngirup abpa' ineh. Idi muci raca' Babil pana' nengirup ineh.

²⁷ Idi kebala Tuhan negku, “Do' mada' pupu ini, kebalamu, ‘Ui ini Tuhan luk Melalud, Allah lun Israil ngecuk nemuyuh ngirup pad muyuh mabuk idi kuta', pelé muyuh mebpeh idi na miak tumui ngaceku bunu' luk uenKu ngacing kuan muyuh.’

²⁸ Idi kudeng ideh ara' ngalap sangkir rat bang paladmu, pad ideh miak ngirup abpa' ineh, do' mada' nedeh, kebalamu, Tuhan luk Melalud ngecuk nemuyuh ngirup ineh.

²⁹ Ui miak ngimun ngukum bawangKu sebuleng. Miakké muyuh mepuit ratnan ukumKu? Na tu-tu muyuh miak mepuit. Ngaceku Ui ngacing bunu' kuan amung-amung pupu bang tana' ini. Ui ini Tuhan luk Melalud pangeh nepebala.

³⁰ “O Yeremia, do' iko mada' amung-amung luk pangeh bilaKu. Do' iko mada' lemulun ini, kebalamu, ‘Tuhan miak ngitang rat bang langit, idi pebala rat déi' dita'. Ieh miak megateh niat inan pupuNeh; Ieh miak ngitang mepad kudeng lemulun luk ngeradu' bua' anggur, idi idé-idé luk bang tana' ini miak ninger Neneh

³¹ LinguNeh miak pedingeren pad macing iring tana' pana', ngaceku Tuhan ngadu' amung-amung pupu. Ieh miak nutun amung-amung pupu idi ngaté amung-amung lemulun luk nganau' luk dat. Tuhan pangeh nepebala.’ ”

³² Kebala Tuhan luk Melalud, “Dereh miak macing kuan anid-anid pupu, idi aceh barui miak macing rat iring tana'.

³³ Kareb aco ineh amung butung lemulun luk pinaté Tuhan miak uen ngatad rat iring tana' selipa macing iring tana' selipa. Idi seburur pana' nateh luk temido nedeh. Butungdeh na miak lapen idi tinamen. Ideh miak telubid luun tana' mepad kudeng rimuk luun tana'.

³⁴ “Do' muyuh lun rayeh ngitang. Do' muyuh temido idi siluti luun tana'. Ngaceku tarekneh pangeh nacing, muyuh miak pitayen, idi muyuh miak kereten mepad kudeng dumba deléi luk meluun do'.

³⁵ Idi lun rayeh pupu na miak mepuit.

^36-37 Idi bang derehdeh ideh ngitang idi ngarod, ngaceku dengan usehNeh, Tuhan pangeh nengusag bawangdeh luk do'.

³⁸ Tuhan pangeh nenecan pupuNeh, mepad kudeng aceh balang luk necan lubangneh. Amung dereh bunu' idi useh Tuhan pangeh nengisu' bawang ineh mangun ku su luk ali-ali.”