YEREMIA 20 - BALA LUK DO'

Kedaluh Yeremia Dengan Pasur Lun Imam

¹ Pasur, anak Imer, ieh ineh imam idi lun rayeh bang Ruma' Allah. Ieh neninger amung bada' Yeremia.

² Idi Pasur nengecuk mebal neneh idi ngaling neneh bang Ruma' Allah munung Tanga' Beniamin luk pa luun.

³ Pekak kenebpa, kareb Pasur pangeh neneka kalingneh, idi Yeremia nepebala neneh, “Na Tuhan neneten ngadanmu Pasur. Iamo' ngadan luk pangeh biré Tuhan namu, ieh ineh, ‘Inan Luk Katot Iapeh-Iapeh.’

⁴ Iamo' Tuhan sebuleng nepebala, ‘Ui miak nganau' namu mangun ku luk katot kuan bururmu sebuleng idi kuan lun rurummu pana'. Idi iko miak nier nedeh pitayen ku pelapet bunu'deh. Ui miak maré amung pupu Yahuda bang palad raca' Babil. Ieh miak naban sebuangdeh amé' Babil, idi lun baken miak pitayenneh.

⁵ Ui miak nima' bunu'deh ngaro amung-amung luk meraga bang bawang ini, idi ideh miak naban amung-amung binaweh, pad amung-amung binaweh raca'-raca' Yahuda pana' miak tebanen amé' Babil.

⁶ Idi iko, Pasur, idi amung uang tetek ruma'mu miak kamen idi tebanen amé' Babil. Idi déi' iko miak maté idi tinamen dengan amung lun rurummu luk inanmu mebalih ineh.’ ”

Yeremia Medureng Pa Kiung Tuhan

⁷ Tuhan, Iko nenaluk negku, idi ui pangeh sinaluk. Iko meluun tueh rat negku, idi Iko nengelaya' negku. Amung lemulun situnga negku, idi meriruh negku tebaco-tebaco.

⁸ Kareb ui pebala, ui megéi' ngitang “Susa' idi Até!” O Tuhan, ideh situnga negku kidi-kidi ngaceku ui mada' balaMu.

⁹ Iamo' kareb ui pebala, “Do' ui mekelupan Tuhan, idi na mada' bang ngadanNeh,” idi balaMu ineh mepad kudeng apui bang niatku, idi bang tulangku. Ui na miak ngilep neneh, idi na ui tuman na mada' balaMu.

¹⁰ Ui ninger lun mula' payek-payek. “Inan Luk Katot Iapeh-Iapeh.” Kebaladeh, “Do' tau ngadu' neneh!” Lun rurumku pana' pian ku ui mebpeh. Kebaladeh, “Miak ieh uen naluk lek. Do' tau ngakem neneh idi ngua' datneh.”

¹¹ Iamo' Iko Tuhan luk kuanku. Iko luk metueh idi melalud, idi lun luk ngedereh negku miak metebaceng idi na miak metueh. Ideh miak uen ngigu' ngaceku ideh na miak metueh. Ideh migu' ruked-ruked idi na mekelupan.

¹² Iamo' Iko Tuhan luk Melalud, Iko nutun lemulun dengan dalan luk matu. Iko kali' luk bang niatdeh idi terawédeh. Nima' negku nier Namu ngua' sala' bunu'ku, ngaceku ui merapet Namu.

¹³ Do' menani kuan Tuhan! Ngubur Tuhan! Ieh muit nelun luk pidereh rat bang palad lemulun luk dat.

¹⁴ Ngediman aco luk inanku tinganak! Mekelupan aco luk inan tinanku nenganak negku!

¹⁵ Ngediman nelun luk nengawang niat tamanku, kareb ieh nenguit bala, “Iko inan anak deléi!”

¹⁶ Do' ieh mepad kudeng bawang-bawang luk inusag Tuhan dengan na méi'. Nima' neneh ninger arod lun luk mét kareb pekak, idi kukor kareb muned aco,

¹⁷ ngaceku na ieh nengaté negku kareb nateh ui tinganak, pad nakan tinanku mangun ku tanemku, idi ui na tinganak peh.

¹⁸ Ngudeh ui tinganak? Pad ui ngalap susa', dereh, idi até dengan igu'ké?