YEREMIA 2 - BALA LUK DO'

Allah Matar Nelun Israil

¹ Tuhan nengecuk negku

² amé' mada' balaNeh kuan amung lun bang bawang Yerusalim, kebalaNeh, “Ui kali' namu lutep karebmu anak, idi iko mawa Negku kareb kiteh pun paweh. Iko nemaya' Negku déi' su luk ali-ali, su luk na inan lemulun nenganau' lati'.

³ O Israil, Ui luk kuan namu; iko aceh lati'Ku luk meluun do'. Ui nengukum amung lun luk nengedereh namu, idi nengesusa' nedeh. Ui ini Tuhan luk pebala namu.”

Sala' Tepun Lun Israil

⁴ O muyuh lun luk inul Yakub, idi amung uang tetek ruma' lun Israil, do' ninger bala Tuhan.

⁵ Kebala Tuhan: “Anun datKu pad tepun muyuh nenecan Negku? Ideh nesembayang inan akang luk na ulek, pad ideh pana' na ulek teh.

⁶ Na ideh nengerawé Negku, sagan pana' Ui nemuit nedeh rat bawang Masir, idi nenguyut nedeh maya' déi' su luk ali-ali, ieh ineh su luk mula' pegkung bada idi luk dat ali; ieh ineh tana' luk tekering luk na delanin lemulun idi na inan lun tebawang, ngaceku inan luk katot.

⁷ Ui nenguit nedeh iné' inan tana' luk mebaleng, pad ideh do' udeng idi ngalap bua' luk mula'. Iamo' ideh nacing idi nengedat tana'Ku, idi nengelutak bawang luk biréKu nedeh.

⁸ Idi lun imam na nengitun, ‘Iapeh inan Tuhan?’ Idi imamKu sebuleng na miti Negku. Idi lun rayeh-rayeh sikal metueh rat Negku, idi amung nabi nepebala dengan ngadan Baal, idi nesembayang inan akang luk na ulek.”

Tuhan Ngadu' PupuNeh

⁹ Idi kebala Tuhan, “Ui sikal nguit pupuKu besara' sekua' baruh teh, idi ngadu' anak inuldeh.

¹⁰ Do' amé' pulau Siprus luk pa acep aco; ngecuk nelun amé' bawang Kedar luk pa busat aco, idi nier do'-do'. Inanké luk kudeng ini mangun atun?

¹¹ Lun pupu baken na nengelibal allahdeh, sagan pana' allahdeh na matu. Iamo' pupuKu pangeh nengelibal Negku, sagan pana' Ui ini Allah luk ngeperuan nedeh; iamo' ideh nengalap allah luk na miak ngedengan nedeh.

¹² Idi Ui ini Tuhan ngecuk langit megegker ku tot, pad ieh megagap idi mawa.

¹³ PupuKu pangeh nenganau' dueh sala': ideh nenecan Negku, ieh ineh aceh bued abpa' luk do'; idi ideh nengukat tuda'-tuda' subuk, luk na inan abpa' mudeng.

Bua'-Bua' Lun Israil Luk Na Lutep Inan Tuhan

¹⁴ “Israil na ieh demulun, idi na ieh inul demulun. Ngudeh bunu'neh ngerada' neneh?

¹⁵ Ideh ngeku iringneh mepad kudeng balang. Idi ideh nenganau' tana'neh mangun ku su luk ali-ali, idi nengusag bawangneh, pad na lemulun tudo bang ineh.

¹⁶ Lun Mempis idi lun Tapanes pangeh nemila' uluhneh.

¹⁷ O Israil, iko luk nengedat bururmu sebuleng! Ngaceku iko nenecan Negku luk Tuhan Allahmu, karebKu nenguyut namu maya' dalan.

¹⁸ Anunké luk pianmu iko amé' bawang Masir? Pian ngirup Abpa' Nil, iko? Anunké luk pianmu iko amé' bawang Asur pian ngirup Abpa' Pirat, iko?

¹⁹ Datmu sebuleng miak ngukum namu, idi teh iko miak kumin, ngaceku iko neteketed rat Negku, idi na matot Negku, pad iko kali' kudeng apeh susa' idi dat necan Tuhan Allahmu. Ui ini Tuhan Allah luk Melalud luk pebala namu.

Israil Ara' Sembayang Inan Tuhan

²⁰ “O lun Israil, rat monneh iko ngelaba balaKu, idi ara' maya' Negku, idi kebalamu, ‘Na ui pian mangun ku demulun!’ Iamo' iko mepad kudeng decur luk mesawa' luun anid-anid surud luk medita' idi liang anid-anid kayuh luk mebata'.

²¹ Iko aceh ilung luk pelaba do' idi bua' anggur luk mepaci', kareb Ui nenibu namu. Iamo' nekini iko mepad kudeng bua' anggur luk melu luk na pianKu.

²² Sagan pana' iko ngasa ticu'mu ku batu. idi sibaru' ku sabun, nateh sala'mu mekiu' sirenKu. Ui ini Tuhan Allah luk pebala namu.

²³ Ngudeh iko mala namu na nengelutak bururmu, idi na tupu nesembayang inan Baal? Ngerawé sala' luk pangeh inau'mu déi' luun raked. Iko mepad kudeng aceh unta tineh luk ucet nakap deléi,

²⁴ luk buro amé' déi' su luk ali-ali. Kareb ieh nakap deléi, idéké luk miak nginita neneh? Deléi luk pian neneh na susa' nakap neneh, ngaceku ieh luk amé' matun.

²⁵ O Israil, aleg nima' kukudmu mét idi telananmu metekering nakap allah baken. Iamo' kebalamu, ‘Kapehneh tau'? Ui mawa inan allah baken, idi pian nakap nedeh.’ ”

Israil Petulu Miak Kumin

²⁶ Kebala Tuhan, “Muyuh lun Israil miak uen ngigu' mepad kudeng lun mano luk kikem, ieh ineh amung muyuh, do' raca', pengulu, imam, idi nabi.

²⁷ Amung muyuh luk pebala inan kayuh, ‘Iko tamanku,’ idi luk pebala inan batu, ‘Iko tinanku,’ miak uen ngigu'. Ini miak mangun ngaceku muyuh neteketed rat Negku, idi na lumi Negku. Iamo' kareb muyuh inan susa', muyuh mutuh Negku amé' ngulun nemuyuh.

²⁸ “Iapehké amung allah luk inau' midi? Kareb iko inan susa', nima' nedeh ngulun namu, kudeng mo' ideh miak! O Yahuda, allahmu mepad kinula' bawangmu.

²⁹ Ui ini Tuhan luk ngitun, anunké luk inan muyuh dat Negku. Amung muyuh pian metueh rat Negku.

³⁰ Ui nengukum nemuyuh, iamo' na ulekneh, ngaceku muyuh na pian badén. Muyuh nengaté nabi muyuh, mepad kudeng balang luk mesangit.

³¹ Do' amung muyuh ninger do'-do' luk belénKu, O Israil, inanké Ui mepad kudeng su luk ali-ali, idi kudeng bawang luk inan luk katot kuan muyuh? O pupuKu, ngudeh muyuh mala nemuyuh sikal nganau' luk pian muyuh, idi muyuh na sikal amé' Negku?

³² Miakké seburur decur luk paweh ngayung ku kuyu' luk dat? Idi miakké seburur anak adi' decur mekelupan banéneh? Iamo' pupuKu megéi' mekelupan Negku.

³³ Iko mepad kudeng decur luk nakap deléi, pad decur luk mesawa' pana' nginud lawému.

³⁴ Kuyu'mu maput ku dara' lemulun luk masi' luk na mesala' idi luk na nemano binawehmu. “Iamo' iko mala,

³⁵ ‘Ui na mesala'; kali' rungen Tuhan na museh negku.’ Iamo' Ui ini Tuhan miak ngukum namu, ngaceku iko mala namu na mesala'.

³⁶ Ngudeh muyuh malé misu' terawé? Kudeng bawang Masir ngedengan namu, kali' rungen iko uenneh ngigu', mepad kudeng bawang Asur nengigu' namu atun.

³⁷ Idi iko pana' migu' kareb iko lemubed rat bawang Masir teh. Ui ini Tuhan luk pangeh nenala' luk inanmu merapet; idi na ideh miak nguit luk do' kuanmu.”