YEREMIA 19 - BALA LUK DO'

Kuden Luk Mebila'

¹ Tuhan nengecuk negku amé' melih aceh kuden. Ieh nengecuk negku nguit tuda'-tuda' lun rayeh pupu Israil idi tuda'-tuda' imam luk mengered,

² amé' Ruan Hinom luk déi' liang Tanga' Kuden Luk Mebila'. Idi ui icuk Tuhan mada' balaNeh déi'.

³ Tuhan nengecuk negku pebala, “O amung raca' Yahuda idi lun Yerusalim, do' ninger luk belénKu, ieh ineh Tuhan luk Melalud, Allah lun Israil. Ui ngacing aceh susa' kuan bawang ini, pad idé-idé luk ninger balaneh miak megagap.

⁴ Ui miak nganau' amung ineh ngaceku pupu ini pangeh nenecan Negku idi pangeh nengelutak bawang ini ku barédeh kuan allah baken — luk nateh nekali' tepundeh, luk nateh nekali' raca'-raca' Yahuda, meluun teh luk nateh nekali' bururdeh sebuleng. Ideh pangeh nemanu' bawang ini ku dara' lemulun luk na mesala'.

⁵ Idi ideh pangeh nenganau' bubpun kuan Baal, pad ideh miak ngeseb anakdeh mangun ku baré luk sabpen. Na tu Ui nengecuk nedeh ngeseb anakdeh mangun ku baré luk sabpen. Na tu Ui nengerawé ratnan luk kudeng ineh.

⁶ Ngaceku ineh, muci su ineh na miak tetanen Topet idi Ruan Hinom, iamo' su ineh tetanen Ruan Até.

⁷ Idi su ini Ui miak ngusag amung terawé lun Yahuda idi lun Yerusalim. Ui miak nima' bunu'deh metueh rat nedeh pad ideh ngaté nedeh. Ui miak maré butungdeh kenen suit-suit idi pung-pung luk meliput.

⁸ Ui miak ngacing dereh luk pelaba rayeh pad idé-idé luk lemaba miak megagap idi mawa ngaceku amung-amung luk pangeh nangun déi'.

⁹ Ui miak nganau' lemulun luk tudo déi' kuman uang anakdeh sebuleng. Ideh miak kuman lun dengandeh kareb bunu'deh ngerieng bawangdeh idi nutun ngaté nedeh.”

¹⁰ Idi Tuhan nengecuk negku mila' kuden ineh pa kiung lemulun luk nemaya' negku,

¹¹ idi mada' nedeh ratnan luk bila Tuhan luk Melalud, kebalaNeh, “Ui miak mila' pupu ini idi bawang ini, mepad kudeng muyuh mila' kuden, pad ieh na miak mangun ku kuden baruh. Lemulun miak nanem nelundeh luk maté déi' Topet pana', ngaceku na luk inan baken su luk inan nanem nedeh.

¹² Ini luk miak ruenKu kuan bawang ini idi lun luk tudo ieni. Ui miak nganau' neneh mepad kudeng bawang Topet.

¹³ Idi ruma'-ruma' Yerusalim, idi ruma' raca'-raca' Yahuda, idi amung ruma' su luk inandeh ngeseb umau luk do' buen kuan gituen luun apodeh idi su luk inandeh ngutang baré luk rupen kuan allah baken miak mangun melutak mepad kudeng Topet.”

¹⁴ Idi ui nenalan rat bawang Topet, su luk inan Tuhan nengecuk negku mada' balaNeh. Idi ui iné' tuped luun natad Ruma' Allah idi nemada' amung lemulun.

¹⁵ Kebalaku, “Kudeng ini bala Tuhan luk Melalud, Allah lun Israil, ‘Ui miak ngacing kuan bawang ini idi kuan amung ruma' libut-libut bawang ini amung ukum luk litepKu, ngaceku muyuh metueh niat idi na sikal ninger luk belénKu.’ ”