YEREMIA 18 - BALA LUK DO'

Yeremia Déi' Ruma' Lun Luk Mileh Mipi' Kuden

¹ Kebala Tuhan negku,

² “Amé' ruma' lun luk mileh mipi' kuden, idi Ui miak mada' balaKu namu.”

³ Idi ui iné' déi', idi nenier lun ineh mipi' kuden.

⁴ Idi kareb aceh kuden luk inau'neh na do' tu, ieh miak ngalap tana' kuden ineh idi muar neneh baruh teh idi nganau' kuden baruh teh.

⁵ Idi kebala Tuhan negku,

⁶ “Kali' rungen Ui miak nganau' kuan muyuh lun Israil, mepad kudeng luk inau' lun luk mileh mipi' kuden. Muyuh idi bang paladKu, mepad kudeng tana' kuden luk bang palad lun luk mileh mipi' kuden.

⁷ Kudeng idan-idan Ui pebala, Ui sikal mubput, ngaro, idi ngusag aceh pupu idi aceh bawang,

⁸ idi pupu ineh uren ratnan amung-amung datdeh, idi Ui miak ngisu' terawéKu, pad Ui na miak nganau' luk bilaKu.

⁹ Iamo', kudeng Ui pebala, Ui miak nibu idi ngeletep aceh pupu idi bawang,

¹⁰ idi pupu ineh nganau' luk dat, Ui miak ngisu' terawéKu, pad Ui na miak nganau' luk bilaKu.

¹¹ Ngaceku ineh do' mada' nelun Yahuda idi lun Yerusalim, kebalamu, ‘Ui ini Tuhan luk mileh mipi' kuden. Ui temina' ku ukum kuan muyuh. Do' muyuh uren ratnan kekamen muyuh luk dat idi ngisu' lawé idi kekamen muyuh.’

¹² Iamo' ideh miak pebala, ‘Na ulekneh mada' nekai! Kai sikal maya' terawé kai sebuleng. Kai miak maya' pinian burur kai sebuleng idi maya' niat kai luk dat.”

Lun Israil Necan Tuhan

¹³ Kebala Tuhan, “Do' ngitun amung-amung pupu, Inanké luk kudeng ineh mangun atun? Lun Israil pangeh nenganau' luk pelaba dat!

¹⁴ Miakké salju luk luun Pegkung Lebanon ubpa'? Miakké arur luk luun pegkung ineh mekeket?

¹⁵ Iamo' pupuKu pangeh nekelupan Negku. Ideh ngeseb umau luk do' buen kuan akangdeh. Ideh netebaceng maya' dalan luk matu, idi na ideh maya' dalan luk meruked, iamo' ideh maya' dalan luk na rapi'.

¹⁶ Ideh nenganau' bawang ini mangun ku luk katot, idi uen ngedat ruked-ruked. Idi amung lun luk lemaba, megagap ku luk sirendeh, idi ideh siguling uluh idi mawa.

¹⁷ Ui miak matad pupuKu pa kiung bunu'deh; mepad kudeng kipu luk mepalid ku bui rat pa busat aco. Ui miak teketed rat nedeh. Na Ui ngedengan nedeh kareb susa' ineh macing.”

Gayam Lun Dat Luk Sikal Metueh Rat Ni Yeremia

¹⁸ Idi kebala lun mula', “Do' tau nala' ni Yeremia! Inan teh imam-imam luk miak mada' netau, idi lun mileh luk ngubuk netau, idi nabi-nabi luk miak mada' bala Allah. Do' tau ngadu' neneh, idi aleg ninger bada'neh.”

¹⁹ Idi kesembayang Yeremia, “O Tuhan, ninger balaku, idi ninger adu' bunu'ku negku.

²⁰ Miakké luk do' uen ngua' ku luk dat? Ideh pangeh nengukat aceh lubang kuanku. Do' ngerawé ratnan sembayangku kuandeh pa kiungMu kareb ui nemutuh Namu aleg museh nedeh.

²¹ Iamo' nekini Tuhan, nima' anakdeh maté ku lau. Nima' nedeh pitayen bang bunu'. Nima' decurdeh patad ratnan awandeh idi anakdeh. Nima' amung deléi maté ku ét, idi amung anak adi' deléi pitayen bang bunu'.

²² Ngecuk aceh baweh ngaro ruma'deh denak-denak pad ideh ngitang idi matot. Ideh pangeh nengukat aceh lubang kuanku idi nenganau' abpung pad ideh ngakem negku.

²³ Iamo' Tuhan, Iko luk kali' gayamdeh luk sikal ngaté negku. Aleg Iko maré do' ratnan dat idi sala'deh. Do' nala' nedeh! Ngukum nedeh kareb Iko museh!”