YEREMIA 16 - BALA LUK DO'

Pian Tuhan Kuan Yeremia

¹ Idi Tuhan nepebala negku teh,

² “Aleg iko ngaweh idi ngalap anak bang bawang luk kudeng ini.

³ Ui miak mada' namu ratnan luk miak mangun kuan anak-anak luk tinganak ieni, idi luk miak mangun kuan taman idi tinandeh teh.

⁴ Ideh miak maté ku ét luk mebura'. Seburur pana' nateh luk temido nedeh, idi na ideh tinamen. Idi butungdeh telubid luun tana' mepad kudeng rimuk. Ideh miak pitayen bang bunu' idi maté ku lau. Idi butungdeh mangun ku akan kuan suit-suit idi pung-pung luk meliput.

⁵ “Aleg iko umak ruma' lemulun luk temido, idi aleg iko temido seburur lemulun pana'. Ngaceku na Ui maré nedeh do' udeng, idi na Ui méi' idi mawa nedeh.

⁶ Lun do' idi lun dat miak maté bang bawang ini. Iamo' na ideh tinamen, idi na ideh uen nido. Idi sebururdeh pana' nateh nacung.

⁷ Idi seburur pana' na miak kuman idi ngirup dengan lun kareb lemulun luk inanneh mawa maté. Idi seburur pana' nateh luk méi', sagan tu pana' tamanneh idi tinanneh maté.

⁸ “Aleg umak ruma' lemulun luk nganau' irau. Aleg perurum kuman idi ngirup dengandeh.

⁹ Ninger luk bilaKu, ieh ineh Tuhan luk Melalud, Allah lun Israil. Ui miak ngagka' riruh idi awang niatdeh, idi tang decur idi deléi luk sikal ngaweh bang bawang ini. Idi lun bang bawang ini miak nier amung ini mangun.

¹⁰ “Kareb iko mada' nedeh ratnan amung ini, ideh miak ngitun namu, anun punneh Ui ngukum nedeh kudeng ineh. Ideh miak ngitun, ‘Anun sala' kai pa kiung Tuhan Allah kai?’

¹¹ Do' mada' nedeh ratnan luk bila Tuhan, ‘Tepun muyuh nenecan Negku, idi maya' idi nesembayang inan allah baken. Ideh nenecan Negku idi na nemaya' bada'Ku.

¹² Iamo' muyuh pangeh nenganau' luk meluun dat ratnan luk inau' tepun muyuh. Amung muyuh dat idi metueh niat idi na maya' Negku.

¹³ Ngaceku ineh, Ui miak masut nemuyuh rat bang bawang ini, pad muyuh amé' bang aceh bawang luk nateh nekali' muyuh idi tepun muyuh pana'. Idi déi' muyuh miak sembayang inan allah baken tebaco kedangan. Idi na Ui miak méi' nemuyuh.’ ”

Lun Israil Miak Iten Tuhan Muli'

¹⁴ Kebala Tuhan, “Idi karebneh miak macing, seburur pana' nateh miak pebulung ku ngadanKu ini, Allah luk mulun luk nenguit pupu Israil remuat rat bang tana' Masir.

¹⁵ Iamo' ideh miak pebulung ku ngadanKu ini, Allah luk mulun luk nenguit nelun Israil remuat rat bang bawang luk pa tinueh busat aco, idi rat bang amung bawang luk inanKu nengatad nedeh. Ui miak nguit nedeh lemubed amé' bang bawangdeh sebuleng, ieh ineh bawang luk biréKu kuan tepundeh.”

Ukum Luk Miak Macing

¹⁶ Kebala Tuhan, “Ui ngecuk mula' lun luk ngerabat amé' ngakem lemulun ini. Idi Ui miak ngecuk mula' lun luk nganup nakap nedeh luun anid pegkung, idi luun surud, idi bang lubang batu pana'.

¹⁷ Ui nier amung luk ruendeh. Na luk lumi Negku. Na ideh miak ngapung sala'deh pa kiungKu.

¹⁸ Ui miak ngua' sala' idi datdeh dueh kua'. Ideh pangeh nengelutak tana'Ku ku akangdeh luk na mulun luk mepad kudeng butung. Idi ideh pangeh nemanu' bawang luk biréKu nedeh ku allahdeh luk mebalih.”

Sembayang Yeremia Luk Merapet Inan Tuhan

¹⁹ O Tuhan, Iko luk matar negku, idi maré tueh kuanku. Iko megéi' ngedengan negku kareb inan susa'. Amung pupu rat iring tana' miak amé' Namu idi pebala, “Tepun kai nesembayang inan allah luk mebalih mo', idi akang luk na ulek.

²⁰ Miakké seburur lemulun nganau' allahneh sebuleng? Na tu-tu miak! Baken ideh allah luk matu.”

²¹ “Ngaceku ineh,” kebala Tuhan, “nekini Ui miak ngegala' lalud idi tuehKu kuandeh, pad ideh kali' Ui ini Tuhan.”