YEREMIA 14 - BALA LUK DO'

Rikan Luk Mio

¹ Kebala Tuhan ni Yeremia ratnan rikan,

² “Yahuda nacung, idi amung-amung bawangneh medereh, idi lun Yahuda telubid luun tana' ngaceku dat niat idi Yerusalim ngitang mutuh pedengan.

³ Lun do' ngecuk demulundeh ngalap abpa'; ideh amé' inan subuk, iamo' na abpa'. Idi ideh muli' dengan sidangur luk na uang. Ideh ngebpu uluhdeh ngaceku migu' idi dat niat.

⁴ Lun luk amé' lati' pelaba susa' niat idi ngebpu uluhdeh, ngaceku na udan idi tana' tekering.

⁵ Déi' luun amug payo tineh necan anakneh luk isuut, ngaceku na uduh.

⁶ Idi keladai luk meliput tuped luun surud, idi nginiat mepad kudeng galau. Meseraber sirendeh ngaceku na akandeh.

⁷ PupuKu nawar Negku, kebaladeh, ‘Sagan pana' sala' kai ngesala' nekai, O Tuhan ngedengan nekai, maya' kudeng luk pijani'Mu. Kai megéi' teketed rat Namu idi megéi' nganau' sala' pa kiungMu.

⁸ Iko sebuleng mo' luk miak inan lun Israil merapet, Iko mo' luk ngulun nekai kareb kai inan susa'. Ngudeh Iko mepad kudeng sakai bang bawang kai, luk amé' rudap sealem mo'?

⁹ Ngudeh Iko mepad kudeng lemulun luk megagap, idi lun pebunu' luk na miak ngedengan? O Tuhan kali' rungen Iko idi dengan kai! Kai lun pupuMu; aleg Iko necan nekai.’ ”

¹⁰ Kebala Tuhan ratnan pupu ini, “Ideh pian buro rat Negku kudeng ini, idi ideh na miak ngimet bururdeh. Ngaceku ineh Ui na mawang niat nedeh. Ui miak ngerawé kekamendeh luk dat idi ngukum nedeh ngaceku sala'deh.”

¹¹ Kebala Tuhan negku, “Aleg mutuh Negku ngedengan pupu ini.

¹² Sagan pana' ideh mawa' na kuman idi na Ui sikal ninger putuhdeh. Idi sagan tu pana' ideh maré baré luk sabpen idi baré luk kenen, Ui na mawang niat nedeh. Iamo' Ui miak ngaté nedeh bang bunu', dengan lau idi ét.”

¹³ Kebalaku, “O Tuhan Allah, Iko kali' amung nabi mada' pupu ini, kebaladeh, ‘Na luk idi bunu' idi lau bang bawang tau ngaceku Tuhan pangeh pejani' na inan susa'.’ ”

¹⁴ Iamo' kebala Tuhan, “Amung nabi ineh mebalih dengan ngadanKu. Na Ui nengecuk nedeh, na Ui nepebala nedeh. Amung luk badéndeh nemuyuh ratnan luk sinierdeh baken rat Negku, idi bada'deh luk tirawédeh sebuleng na ulekneh.

¹⁵ Ui ini Tuhan mada' nemuyuh ratnan luk miak ruenKu kuan nabi ineh luk na icukKu, iamo' luk mada' dengan ngadanKu, kebaladeh, ‘Bunu' idi lau na miak macing bang bawang ini:’ Ui miak ngaté nedeh bang bunu' idi dengan lau.

¹⁶ Lemulun luk inandeh nepebala kudeng ini miak pitayen bang bunu' idi dengan lau. Butungdeh miak talan luun amung dalan Yerusalim, ngaceku na lun luk miak nanem nedeh. Amung ini miak mangun kuandeh, do' awandeh, idi anakdeh luk deléi idi decur teh. Ui miak maré tabpar sala'deh.”

¹⁷ Kebala Tuhan, “O Yeremia, mada' pupu ini ratnan susa'mu, kebalamu, ‘Nima' abpa' matehku mebpeh tebaco kedangan, meluun do' ui na ugka' nangi', ngaceku pelaba bura' urat pupuku.

¹⁸ Kareb ui nalan luun raked, ui nier butung lemulun luk pinaté bang bunu'; idi kareb ui amé' bang bawang rayeh ui nier lemulun luk maté ku lau. Lun nabi idi imam ngakem, iamo' na ideh kali' luk ruendeh.’ ”

Pupu Israil Sembayang Mutuh Ratnan Tuhan

¹⁹ O Tuhan, matuké Iko nala' Yahuda, idi megateh inan lun Sion? Ngudeh Iko ngurat nekai, pad kai na miak uen ngedo'? Kai pian pedo', iamo' na luk do'. Kai merapet miak uen ngedo', iamo' luk katot macing nekai.

²⁰ O Tuhan, kai ngamo sala' kai, idi sala' tepun kai pana', ngaceku kai nenganau' sala' pa kiungMu.

²¹ Ngerawé jani'Mu, idi aleg nala' nekai, aleg ngacing igu' kuan Yerusalim su luk inan kerusi rayehMu. Aleg ngelaba jani' luk inau'Mu kuan kai.

²² Sebuleng pana' rat arang akang pupu baken na miak maré udan rat bang langit. O Tuhan Allah kai, kai merapet Namu, ngaceku Iko mo' luk miak nganau' luk kudeng ineh.