YEREMIA 12 - BALA LUK DO'

Yeremia Ngitun Inan Tuhan

¹ O Tuhan, kudeng ui pesaad Namu, kali' rungen Iko luk matu. Iamo' do' ui ngitun Namu ratnan anun-anun luk mesiri Ngudeh lemulun luk dat na ngalap susa'? Idi ngudeh lemulun luk naluk ngalap luk piandeh?

² Iko nibu nedeh, idi ideh petacu inan uat; idi ideh mulun, idi petacu inan bua'. Ideh ngubur Namu, iamo' na ideh mawa Namu.

³ Iamo' Tuhan, Iko kali' negku, Iko nier kekamenku idi kali' ui mawa Namu. Do' nguit lemulun luk dat ini, mepad kudeng dumba luk kereten; matad nedeh pad macing aco luk inandeh kereten.

⁴ Tuda' ioké tana' ini tekering, idi uduh bang laman mekarang? Amung pung idi suit maté ngaceku dat lemulun luk tudo bang bawang ini, ieh ineh lemulun luk pebala, “Tuhan na miak nier kekamen tau.”

⁵ Kebala Tuhan, “O Yeremia, kudeng iko na tuman peribatun dengan lemulun, kudeng apehké iko peribatun dengan kuda? Iko dat udeng bang bawang luk na inan susa', iamo' kudeng apehké iko miak tuman bang pulung tangeb Abpa' Yarden?

⁶ Kinanakmu luk bang tetek ruma'mu sebuleng pangeh nemasui namu; ideh pangeh perurum dengan bunu'mu. Sagan tu pana' baladeh do', aleg iko merapet nedeh.”

Susa' Tuhan Ngaceku Sala' PupuNeh

⁷ Kebala Tuhan, “Ui pangeh nenecan pupuKu, Ui pangeh nenala' pupuKu luk pinili'Ku. Ui pangeh nemaré pupu luk inanKu mawa bang palad bunu'deh.

⁸ Pupu luk pinili'Ku pangeh nangun ku bunu'Ku; mepad kudeng balang luk bang pulung, ideh ngeku Negku pad Ui megateh nedeh.

⁹ Pupu luk pinili'Ku mepad kudeng kanui, idi kanui luk baken ngekura' nedeh. O muyuh pung luk meliput, do' amé' ku irau ini.

¹⁰ Mula' raca' rat bawang baken pangeh nengusag kabun anggurKu, ideh nengeradu' lati'Ku, idi nengisu' bawangKu luk do' mangun ku su luk ali-ali.

¹¹ Ideh nenganau' bawang ineh mangun ku tana' luk metugeh, idi luk tican pa kiungKu. Aput tana' mangun ku su luk ali-ali; idi na lemulun ngerawé tana' ineh.

¹² Idi lemulun luk ngaro macing maya' pegkung luk ali-ali ineh. Ui pangeh nemaré bunu' ngusag amung tana' ini, pad seburur pana' nateh luk do' udeng.

¹³ PupuKu nenibu padé, iamo' ideh ngalap tabpa' mo'. Ideh metueh ngakem, iamo' na uli'deh. Ngaceku usehKu idi pun tibudeh na uli'.”

Pejani' Tuhan Kuan Pupu Luk Iring Bawang Israil

¹⁴ Kebala Tuhan, “Ini balaKu kuan pupu luk dat luk iring bawang Israil, idi luk nengusag tana' luk biréKu kuan pupuKu Israil. Ui miak ngalap pupu ini rat bang bawangdeh, mepad kudeng tibu luk binubput, idi Ui miak muit nelun Yahuda rat nedeh.

¹⁵ Iamo' kareb Ui ngalap nedeh idi Ui miak méi' nedeh. Ui miak nguit anid pupu lemubed amé' inan tana' idi bawangdeh sebuleng.

¹⁶ Kudeng ideh mepicet maya' sembayang pupuKu, idi pebulung ratnan ngadan Tuhan luk mulun — mepad kudeng luk atun ideh nemada' pupuKu pebulung ratnan ngadan Baal — idi ideh miak mangun ku aceh babpat pupuKu idi ngalap peruan.

¹⁷ Iamo' kudeng aceh pupu na maya', idi Ui miak ngalap nedeh idi ngaté nedeh. Ui ini Tuhan pangeh nepebala.”