YEREMIA 11 - BALA LUK DO'

Yeremia Idi Pejani' Tuhan

¹ Kebala Tuhan ni Yeremia,

² “Ninger bala pejani' ini. Do' mada' nelun Yahuda idi lun Yerusalim teh, kebalamu,

³ Ui ini Tuhan Allah lun Israil, pangeh nengediman amung-amung lemulun luk na maya' bala pejani' ini.

⁴ Ieh ineh pejani' luk inau'Ku kuan tepundeh, kareb Ui nenguit nedeh remuat rat bang bawang Masir, ieh ineh bawang luk mepad kudeng tetel belawan luk melau' kuandeh. Ui nengecuk nedeh maya' balaKu idi nganau' amung-amung luk icukKu nedeh. KebalaKu, kudeng ideh maya' Negku ideh miak mangun ku pupuKu idi Ui mangun ku Allahdeh.

⁵ Idi Ui miak maya' jani' luk inau'Ku kuan tepundeh, idi maré kuandeh tana' luk mebaleng luk inandeh tudo nekini.” Idi kebala Yeremia, “Mo, Tuhan.”

⁶ Idi kebala Tuhan ni Yeremia, “Amé' iko déi' amung bawang Yahuda idi amung dalan Yerusalim. Idi mada' balaKu su ineh, idi ngecuk nedeh ninger idi maya' bala pejani' ineh.

⁷ Kareb Ui nenguit tepundeh remuat rat bang bawang Masir, Ui nengecuk nedeh maya' balaKu, idi Ui na ugka' mada' nedeh macing aco sini.

⁸ Iamo' ideh na ninger idi maya'. Ideh lutep nganau' luk dat dengan tueh niatdeh. Ui nengecuk nedeh maya' pejani' ineh, iamo' ideh ara'. Ngaceku ineh Ui nengacing amung ukum ineh kuandeh.”

⁹ Idi kebala Tuhan ni Yeremia, “Amung lun Yahuda idi lun Yerusalim sikal metueh rat Negku.

¹⁰ Ideh nelemubed nganau' sala' tepundeh luk ara' maya' balaKu. Ideh nesembayang inan allah baken. Lun Israil idi lun Yahuda nengelaba pejani' luk inau'Ku kuan tepundeh.

¹¹ Ngaceku ineh, Ui ini Tuhan pebala nedeh, Ui miak ngukum nedeh pad ideh na mepuit. Idi kareb ideh nawar Negku mutuh pedengan, na Ui pian ninger baladeh.

¹² Idi lun Yahuda idi lun Yerusalim miak amé' mutuh pedengan ratnan amung allah luk inandeh maré baré luk sabpen. Iamo' allahdeh ineh na miak ngulun nedeh kareb ukum ini macing.

¹³ Kinula' allah lun Yahuda mepad kudeng kinula' bawangdeh. Idi kinula' bubpun lun Yerusalim luk maré kuan Baal mepad kudeng kinula' dalan bawang ineh.

¹⁴ O Yeremia, aleg iko sembayang mutuh kuan lemulun ini. Kareb ideh mesusa' idi nawar Negku mutuh pedengan, idi na Ui ninger baladeh.”

¹⁵ Kebala Tuhan, “Pupu luk inanKu mawa nganau' luk dat. Miakké ideh amé' bang ruma'Ku? Miakké ideh ngagka' susa' dengan tuda'-tuda' jani' idi baré luk sabpendeh. Miakké ideh mepuit ratnan luk kudeng ineh?

¹⁶ Atun Ui neten nedeh aceh lawa saitun luk mula' don idi mula' bua'. Iamo' nekini Ui miak ngeseb donneh idi mutul angatneh dengan uni luk mepad kudeng lalam.

¹⁷ “Ui ini Tuhan luk Melalud pangeh nenibu Israil idi Yahuda, iamo' nekini Ui mada' nedeh ratnan susa' luk miak macing. Ini miak mangun ngaceku sala'deh sebuleng. Ideh nenganau' Negku museh ku barédeh luk sabpendeh kuan Baal.”

Bunu' Yeremia Pegayam Sikal Ngaté Neneh

¹⁸ Kebala Yeremia, “Idi Tuhan nemada' negku ratnan dat luk tirawé bunu'ku kuanku.

¹⁹ Ui mepad kudeng anak dumba luk miak pitayen dengan na matot, ngaceku ui na kali' nedeh ngerawé nganau' luk dat kuanku. Kebaladeh, ‘Do' tau nebpeng kayuh ini kareb ieh do' ulun. Do' tau ngaté neneh, pelé seburur pana' nateh ngerawé neneh.’ ”

²⁰ Idi kesembayang Yeremia, “O Tuhan luk Melalud, Iko Lun luk Mutut Besara' luk matu. Iko luk nier terawé idi niat lemulun. Nima' negku nier Namu ngua' sala' pupu ini, ngaceku ui pangeh nemaré bururku bang paladMu.”

²¹ Idi Lun Anatot sikal ngaté ni Yeremia, kebaladeh, “Kai miak ngaté namu, kudeng iko na ugka' mada' dengan ngadan Tuhan.”

²² Ngaceku ineh, kebala Tuhan luk Melalud, “Ui miak ngukum nedeh! Anak adi' deléi miak pitayen bang bunu' idi anakdeh miak maté ku lau.

²³ Seburur pana' rat arangdeh nateh luk ketecan kareb Ui ngacing susa' kuan lun Anatot.”