YEREMIA 10 - BALA LUK DO'

Sembayang Inan Akang Idi Sembayang Inan Luk Matu

¹ O lun Israil, do' ninger bala Tuhan nemuyuh.

² KebalaNeh, “Aleg nginud kekamen pupu baken, idi aleg muyuh megagap ku tanu' luk siren muyuh déi' langit, mepad kudeng pupu baken.

³ Sembayang lemulun ini na ulekneh. Ideh nebpeng kayuh déi' luun pulung, idi lun luk mileh ngarit ineh,

⁴ idi ngakep ineh ku amas idi pirak. Idi ideh maku' ineh ku paku', pad ieh na mebpeh.

⁵ Akang ineh mepad kudeng akang luk déi' kabun bua' sukui, idi na mileh pebala. Idi ideh baben, ngaceku na ideh miak nalan. Aleg matot ku ineh: ngaceku ideh na ngurat nemuyuh, idi ideh na miak nganau' luk do' kuan muyuh,”

⁶ O Tuhan, na lun luk kudeng Iko; Iko luk metueh, idi ngadanMu rayeh idi melalud.

⁷ Petulu amung lemulun matot Namu, O Raca' amung pupu? Petulu Iko inan matot. Na lun luk kudeng Iko rat arang amung-amung lun luk mileh bang anid-anid bawang idi bang amung-amung imetdeh.

⁸ Amung-amung lun mileh arangdeh mebacé. Miakké akang kayuh mada' nedeh ratnan anun-anun?

⁹ Akangdeh kikep ku pirak rat Tarsis idi amas rat bawang Upas, ieh ineh kekamen lun luk mileh; amungdeh inayung ku kibung luk mebata' idi luk tibaruh lun luk mileh ngebaruh.

¹⁰ Iamo' Tuhan ineh Allah luk matu, Allah luk mulun idi Raca' luk meruked. Kareb Ieh museh tana' meruyuh; idi amung pupu na tuman ku usehNeh. (

¹¹ Do' muyuh lun Israil mada' nelun pupu baken ineh, kebala muyuh, “Amung allah luk na nenganau' tana' idi langit miak sagen. Idi ideh na miak mulun iapeh-iapeh pana' luun tana' ini.”)

Aceh Nani Ubur Kuan Allah

¹² Tuhan nemudut tana' dengan lalud idi ilehNeh; idi Ieh nemalad langit dengan ilehNeh teh.

¹³ Maya' ukumNeh inan uni lalam déi' langit, idi Ieh nguit laput rat iring tana'. Ieh nganau' kilep dengan udan idi maré bui rat su inanneh.

¹⁴ Amung lemulun dat ileh idi mebacé, amung lun luk mileh nganau' amas dat niat ku akangdeh, ngaceku ideh ineh allah luk mebalih, idi na mulun.

¹⁵ Ideh ineh na ulek, idi petulu uen ngigu'. Ideh miak sagen kareb Tuhan macing ngukum nedeh.

¹⁶ Allah Yakub baken kudeng ineh; Ieh ineh nenganau' luk amung-amung, idi Ieh nemili' Israil ku pupuNeh sebuleng. Tuhan luk Melalud, ieh ineh ngadanNeh.

Pupu Tuhan Miak Tebanen

¹⁷ O Pupu Yerusalim, luk uen ngerieng! Nipa amung binaweh muyuh,

¹⁸ ngaceku Tuhan miak nala' nemuyuh rat bang bawang ini nekini. Ieh miak munu' nemuyuh, pad muyuh mabud maté. Tuhan pangeh nepebala.

¹⁹ Idi lun Yerusalim ngitang, “Pelaba bura' ét kai! Urat kai na miak mepali'. Idi kai nengerawé kai miak tuman ku ini!

²⁰ Lepo kai pangeh nekusag, ngaceku amung abetdeh pangeh neputut. Anak-anak kai pangeh nenecan nekai, idi amungdeh pangeh neburo. Idi seburur pana' nateh luk ketecan luk miak mudut lepo kai teh.”

²¹ Kebala Yeremia, “Lun rayeh tau mebacé; ideh na mutuh kuyut ratnan Tuhan. Ini pundeh na mileh; idi pupu tau pangeh nepatad.

²² Do' muyuh ninger! Inan bala macing! Inan aceh ria' bang aceh bawang luk pa tinueh busat aco. Bawehneh miak nganau' amung bawang Yahuda mangun ku su luk ali-ali, ieh ineh su luk inan galau mulun.”

²³ Tuhan, ui kali' seburur lemulun na lalud miak ngimet ulunneh sebuleng, idi na kali kekipedneh.

²⁴ Do' mada' nekai, O Tuhan; iamo' aleg pelaba tueh. Aleg mada' nekai dengan useh, pad kai na maté.

²⁵ Do' Iko museh inan pupu luk na sembayang Namu, idi pupu luk na mutuh pedengan rat Namu. Ideh nengaté inul Yakub idi nengusag nekai, idi bawang kai teh.