YEREMIA 1 - BALA LUK DO'

¹ Surat ini mada' ratnan luk bila idi luk inau' Yeremia. Yeremia ini anak Hilkia, seburur imam rat Anatot bang bawang Beniamin.

² Idi bang lak luk kepulu' teluh kareb Raca' Yosia Amon nengimet bawang Yahuda, idi Tuhan nepebala ni Yeremia.

³ Idi Ieh nepebala neneh sekua' teh, kareb Yoyakim Yosia mangun ku raca'. Pangeh ineh Tuhan megéi' pebala neneh, pad macing lun Yerusalim tiban, kareb Sedekia Yosia pangeh nengimet nedeh pulu' lak limeh bulan.

Tawar Yeremia

⁴ Kebala Tuhan negku,

⁵ “Kareb nateh Ui nemudut namu ku lemulun, Ui nemili' namu. Idi kareb nateh iko tinganak Ui nengetu namu; Ui nemili' namu mangun ku nabi kuan amung-amung pupu.”

⁶ Idi kebalamu, “O Tuhan Allah, na ui mileh peburi'. Ngaceku ui anak.”

⁷ Iamo' kebala Tuhan negku, “Alegmala namu anak, iamo' do' amé' inan pupu su luk dukenKu namu, idi mada' nedeh ratnan amung-amung luk bilaKu namu.

⁸ Aleg matot nedeh, ngaceku Ui idi denganmu idi matar namu. Ui ini Tuhan luk pebala namu!”

⁹ Idi Tuhan nenatang ticu'Neh, idi nengakem bibirku, idi kebalaNeh negku, “Do' iko ninger! Nekini Ui maré bala luk badénmu.

¹⁰ Aco sini Ui maré lalud namu pa luun amung-amung pupu idi amung-amung imet pad mubput idi nabpa, ngusag idi ngeluka', mudut idi nibu.”

Dueh Luk Sinier Yeremia

¹¹ Idi Tuhan nengitun negku, kebalaNeh, “Yeremia, anun luk sirenmu?” Kebalaku, “Ui nier angat berangan.”

¹² Idi kebala Tuhan negku, “Matu balamu, idi Ui matar pad balaKu mangun.”

¹³ Idi Tuhan nengitun negku teh, kebalaNeh, “Anun luk sirenmu baken teh?” Kebalaku, “Ui nier aceh lacang meburek pa tinueh busat aco, luk lélé melukeb pa tungé'.”

¹⁴ Idi kebala Tuhan negku, “Dereh miak macing rat pa tinueh busat aco kuan amung-amung lun luk tudo bang bawang ini,

¹⁵ ngaceku Ui miak nawar amung-amung pupu rat pa tinueh busat aco. Raca'deh miak macing idi ngerareng kerusideh munung amung tanga' Yerusalim idi libut aladneh, idi libut bawang baken déi' Yahuda teh.

¹⁶ Kudeng ini lawéneh Ui ngukum lemulun luk mesala', idi luk nenecan Negku, idi luk nengeseb umau luk do' buen kuan allah baken, idi luk nesembayang inan akang luk inau'deh.

¹⁷ Do' iko mekuu' amé' mada' nedeh ratnan amung-amung luk belénKu namu. Aleg iko matot nedeh nekini, pad Ui na maré namu matot nedeh muci, kareb iko idi dengandeh.

^18-19 O Yeremia, do' iko ninger! Amung lun bang bawang ini, ieh ineh amung raca' Yahuda, idi amung lun rayeh, idi amung imam idi amung anak itindeh sikal metueh rat namu. Iamo' aco sini Ui ngetueh namu, pad iko tuman rat nedeh, mepad kudeng aceh bawang luk linibung, idi kudeng diri belawan, idi kudeng alad tekaling. Na ideh miak ngelaya' namu, ngaceku Ui idi denganmu idi matar namu. Ui ini Tuhan luk pebala namu.”