YEHISKIEL 9 - BALA LUK DO'

Yehiskiel Nier Yerusalim Uen Ngukum

¹ Idi ui neninger Allah ngitang, kebalaNeh, “Amé' tungé' amung muyuh luk ngukum bawang ini, idi nguit repapeh muyuh.”

² Petacu anem burur lemulun nacing munung tanga' luk déi' liang, ieh ineh tanga' luk pa tinueh busat aco. Idi anid bururdeh inan repapeh luk ku ngaté bang paladdeh. Idi seburur lemulun luk ngayung ku kibung pu nemaya' nedeh, idi inan luk ku ngayud bang paladneh. Idi amungdeh iné' tuped muneng ku bubpun luk ratnan tekaling.

³ Idi rayeh Allah lun Israil luk merasat numak ratnan pung luk inan ilad ineh idi nemubuh iné' munung tanga' Ruma' Allah. Idi Tuhan nenawar lemulun luk ngayung ku kibung pu, kebalaNeh,

⁴ “Do' amé' nalan aput bawang Yerusalim, idi nganau' aceh tanu' luun madu' amung lemulun luk mesusa' niat ngaceku amung kekamen luk dat luk ruen lun bang bawang ineh.”

⁵ Idi ui neninger bala Allah kuan lun baken ineh, “Maya' neneh nalan aput bawang idi ngaté lemulun. Aleg méi' inan seburur lemulun pana'.

⁶ Ngaté lemulun luk mengered, anak adi' deléi idi decur pana', tinan-tinan idi anak-anak. Iamo' aleg ngurat lemulun luk inan tanu' luun madu'neh. Ngimun ieni bang ruma'ku.” Idi ideh nengimun ngaté lun rayeh luk tuped pa atun Ruma' Allah.

⁷ Kebala Allah nedeh, “ngelutak Ruma' Allah. Manu' natad ineh ku butung. Kai muyuh!” Idi ideh nengimun ngaté lemulun bang bawang ineh.

⁸ Kareb ideh ngaté lemulun, ui sebuleng luk idi. Ui netekeradung luun tana' idi nengitang, kebalaku, “O Tuhan Allah, miakké Iko ngaté amung-amung lun Israil luk ketecan ngaceku usehMu nan bawang Yerusalim?”

⁹ Idi Allah nengor balaku, “Lun Israil idi lun Yahuda pelaba sala' ngaceku kekamendeh luk dat. Ideh nengaté lemulun aput tana' idi nemanu' Yerusalim ku kekamendeh luk dat. Kebaladeh, ‘Tuhan pangeh nenecan bawang tau. Idi teh Tuhan na nier netau.’

¹⁰ Ui na muit seburur pana' idi na Ui nganau' kuandeh mepad kudeng ideh nenganau' kuan lun baken.”

¹¹ Idi lemulun luk ngayung ku kibung pu ineh nepebala inan Tuhan, “Ui pangeh nemaya' balaMu.”