YEHISKIEL 8 - BALA LUK DO'

Luk Sinier Yehiskiel Teh ( Yeh 8.1—10.22 ) Lun Yerusalim Sembayang Inan Akang

¹ Limeh aco bulan anem bang lak luk keanem, kareb kai tiban, idi lun rayeh-rayeh lun Yahuda luk tiban tudo bang ruma'ku idi pegayam negku, denak-denak lalud Tuhan neketukan negku.

² Ui netengook idi nekali' aceh ayu luk mebudung. Rat ku awaneh macing ku kukudneh bururneh mepad kudeng apui, idi rat ku awa'neh macing ku uluhneh ieh mesilo mepad kudeng tekaling luk isa.

³ Idi ieh nenatang luk kudeng ayu aceh ticu' idi nengakem abpukku. Idi bang luk sinierku ineh, Roh Allah nengikit negku iné' arang gawa' idi nenguit negku amé' Yerusalim. Ieh nenguit negku macing munung tanga' luk déi' dalem, ieh ineh tanga' Ruma' Allah luk pa tinueh busat aco, su luk inan aceh akang luk inan Allah megateh.

⁴ Su ineh ui nenier rayeh Allah luk Israil, mepad kudeng ui nenier rayehNeh bang luk sinierku déi' luun raked.

⁵ Kebala Allah negku, “O lemulun, nier pa tinueh busat aco.” Idi ui nenier, idi muneng ku bubpun luk déi' munung tanga' ui nenier akang luk inan Allah megateh.

⁶ Kebala Allah negku, “O lemulun, do' nier luk ruendeh. Nier kekamen lun Israil luk pelaba dat luk ngado Negku ratnan su luk inanKu luk meligan. Iko miak nier luk meluun dat ratnan ineh.”

⁷ Ieh nenguit negku iné' munung tanga' natad luk déi' liang, idi nemada' aceh lubang alad Ruma' Allah sirenku.

⁸ KebalaNeh, “O lemulun, mesut alad su ini.” Idi ui nemesut neneh idi nekali' aceh tanga'.

⁹ Idi kebalaNeh, “Semuet idi nier kekamendeh luk dat ineh.”

¹⁰ Idi ui nesemuet idi nenier. Alad-alad ineh maput ku arit menipeh idi pung baken luk melutak idi arit luk baken luk inan lun Israil sembayang.

¹¹ Tudu' ngepulu' lun rayeh lun Israil idi déi' dengan Yasania Sapan. Anid-anid bururdeh ngimet aceh luk inan ngeseb umau luk do' buen, idi ieh merabpun.

¹² Allah nengitun negku, kebalaNeh, “O lemulun, inanké iko nier luk ruen lun Israil dengan lulem? Amungdeh sembayang bang aceh takep luk mepanu' ku akang. Kebaladeh, ‘Tuhan na nier netau. Tuhan pangeh nenecan bawang tau.’ ”

¹³ Idi kebala Tuhan negku, “Iko miak nier kekamendeh luk meluun dat ratnan ineh.”

¹⁴ Idi Ieh nenguit negku amé' munung tanga' Ruma' Allah luk pa tinueh busat aco, idi nemada' decur luk temido ku até akang Tamus sirenku.

¹⁵ Idi Allah nengitun negku, kebalaNeh, “O lemulun, kali'muké ineh? Iko miak nier kekamendeh luk meluun dat ratnan ineh.”

¹⁶ Idi Ieh nenguit negku amé' luun natad Ruma' Allah luk déi' dalem. Idi munung tanga' Su luk Meligan arang bubpun idi dalan inan lélé dueh ngepulu' limeh burur lemulun. Ideh neteketed rat Su luk Meligan idi netekunal pa busat aco, idi ideh sembayang inan aco masat.

¹⁷ Idi kebala Tuhan negku, “O lemulun, kali' muké ineh? Lun Yahuda ineh na musam ku kekamendeh luk dat luk siniermu ineh. Ngaceku kekamendeh ineh, inan luk dat iapeh-iapeh pana' bang bawang ini. Meluun teh, ideh amé' tungé' idi nganau' Negku meluun useh. Nier kudeng apeh ideh ngedat Negku dengan dalan luk meluun dat!

¹⁸ Ideh miak kali' usehKu luk mebura'. Ui na miak méi' nedeh. Ideh sembayang dengan abud rayeh arod, iamo' Ui na miak ninger sembayangdeh ineh.”