YEHISKIEL 7 - BALA LUK DO'

Kekiped Bawang Israil Muneng

¹ Kebala Tuhan negku,

² “O lemulun, Ui ini Tuhan, idi ini balaKu kuan tana' lun Israil. Ini kekipedneh, idi teh kekiped amung tana' lun Israil.

³ “O Israil, kekipedneh pangeh nacing. Iko miak kali' usehKu; Ui ngukum namu ngaceku luk inau'mu ineh. Ui ngua' namu ngaceku kekamenmu luk pelaba dat.

⁴ Ui na miak méi' namu. Ui miak ngukum namu ngaceku kekamenmu luk pelaba dat, pad iko kali' Negku, Ui ini Tuhan.”

⁵ Kudeng ini bala Tuhan, “Susa' megéi' macing namu.

⁶ Ini kekipedneh! Ini kekipedneh! Iko melaya'!

⁷ Ini kekiped muyuh luk tudo bang bawang ini. Aco malé macing kareb nateh irau déi' luun pegkung, iamo' gagau mo'.

⁸ “Na mio teh iko miak kali' usehKu luk mebura'. Ui ngukum namu ngaceku luk inau'mu ineh. Ui ngua' namu ngaceku kekamenmu luk pebala dat.

⁹ Ui na miak méi' namu. Ui miak ngukum namu ngaceku kekamenmu luk pelaba dat, pad iko kali' Negku, Ui ini Tuhan, idi Ui ini luk ngukum namu.”

¹⁰ Aco dereh malé macing. Kekamen luk dat amé' mula'. Dita' niat iuk-iuk amé' rayeh.

¹¹ Kekamen luk dat ngacing kekamen luk meluun dat. Na luk ketecan kuandeh; binaweh pana' nateh, ubur pana' nateh, rayeh pana' nateh.

¹² Tarekneh malé macing. Aco ineh muneng. Melih idi masui pana' na ilungneh, ngaceku useh Allah miak macing luun amung-amung lemulun.

¹³ Lemulun luk pepua' na miak ngalap lemubed luk netutu'neh ruked ulunneh. (Luk sinier ini na mepad ilungneh kuan amung-amung lemulun.) Lemulun luk dat na miak mulun.

¹⁴ Ideh nateg tawak, idi temina'. Iamo' seburur pana' nateh luk amé' pebunu' ngaceku useh Tuhan macing kuan amung-amung lemulun.

Ukum Israil Ngaceku Sala'deh

¹⁵ Inan lemulun pekakem luun dalan déi' kadai, idi bang ruma' inan lemulun luk mét idi melau. Idé-idé luk déi' lati' miak maté bang bunu', idi idé-idé luk bang bawang miak maté ku ét idi lau.

¹⁶ Sebuang buro amé' luun pegkung mepad kudeng sukur luk matot, iamo' ngaceku sala'deh ideh miak maté.

¹⁷ Ticu' amung-amung lemulun melaya', idi alebdeh pana' megegker.

¹⁸ Ideh miak nacung idi megegker. Uluhdeh uen ngiki, idi ideh uen ngigu'.

¹⁹ Ideh nala' amas idi pirakdeh luun dalan mepad kudeng nala' arap, ngaceku pirak idi amas na miak ngulun nedeh kareb Tuhan ngacing usehNeh. Na ideh miak makai ineh ku ngebor batekdeh idi ku ngawang niatdeh. Amas idi pirak ineh nenguit nedeh nganau' sala'.

²⁰ Atun ideh medita' niat ku banédeh luk do' taga, iamo' ideh nemakai ineh ku nganau' akang luk dat. Ineh punneh Tuhan nenganau' binawehdeh mangun ku luk inandeh megani'.

²¹ Kebala Tuhan, “Ui miak nima' pupu baken mano rat nedeh, idi lemulun luk ngelaba ukum miak ngaro binawehdeh idi ngelutak neneh.

²² Idi Ui miak teketed kareb lemulun ngelutak Ruma'Ku idi kareb lun mano ngaro ineh.

²³ “Iapeh-iapeh pana' inan gagau. Mula' lun luk ngaté lemulun idi mula' lun luk dat bang bawang muyuh ineh.

²⁴ Ui miak nguit pupu baken luk meluun dat amé' tungé' idi nima' nedeh ngaro ruma' muyuh. Lemulun luk metueh pana' merapang kareb Ui nima' pupu baken ngelutak su luk inan muyuh sembayang.

²⁵ Susa' macing pad muyuh na tuman. Muyuh nakap do' udeng iamo' na miak.

²⁶ Susa' megéi' macing idi bala luk dat pana'. Muyuh nguring mutuh nabi ngegala' luk sinierdeh. Imam pana' na bada' kuan lun mula', idi lun rayeh-rayeh pana' na bada' teh.

²⁷ Raca' miak temido, anak raca' pana' na rapet, idi lun mula' megegker ku totdeh. Ui ngukum nemuyuh ngaceku luk inau' muyuh, idi Ui mutut ukum kuan muyuh mepad kudeng muyuh nemutut ukum kuan lun baken. Idi muyuh miak kali' Ui ini Tuhan.”