YEHISKIEL 6 - BALA LUK DO'

Yehiskiel Mebpeng Na Sembayang Inan Akang

¹ Kebala Tuhan negku,

² “O lemulun, nier amung pegkung déi' bawang Israil, idi mada' balaKu nedeh.

³ Ngecuk nedeh ninger bala Tuhan luk belénKu kuan pegkung, surud, ruan, idi raked. Ui miak maré pelapet luk ngusag su luk inan lemulun sembayang inan akang.

⁴ Amung bubpun miak uen ngusag idi su luk inan ngeseb umau luk do' buen miak uen mila'. Amung lemulun miak pitayen pa atun akangdeh.

⁵ Ui miak matad butung lun Israil. Ui miak ngisak tulangdeh libut-libut bubpun ineh.

⁶ Amung bawang Israil miak uen ngusag, idi su luk inandeh sembayang inan akang pana' miak uen ngusag, pad amung bubpun idi akangdeh uen ngareg, idi su luk inandeh ngeseb umau luk do' buen uen mila', idi amung-amung luk pangeh inau'deh metutu'.

⁷ Lemulun iapeh-iapeh pana' miak pitayen, idi lemulun luk ketecan miak ngamo Negku ini Tuhan.

⁸ “Ui nima' sebuang lemulun mulun amé' arang pupu baken,

⁹ idi tudo déi'. Su luk inandeh tiban, ideh miak ngerawé idi kali' Negku luk ngukum nedeh pad ideh migu', ngaceku niatdeh luk na lutep mado rat Negku, idi ideh meluun awa inan akangdeh. Ideh miak megateh inan bururdeh sebuleng, ngaceku kekamendeh luk dat idi megani'.

¹⁰ Ideh miak kali' Negku, Ui ini Tuhan, idi bada'Ku nedeh baken mo'-mo'.”

Sala'Lun Israil

¹¹ Kebala Tuhan Allah, “Ngekaka ticu'mu, namid kukudmu idi nangi' ku susa' niatmu, ngaceku amung kekamen luk dat idi melutak luk inau' lun Israil. Ideh miak maté bang bunu', ku lau, idi ku ét pana'.

¹² Lemulun luk mado mét idi maté. Lemulun luk muneng miak maté bang bunu'. Lemulun luk ketecan miak maté ku lau. Ideh miak kali' usehKu luk mebura'.

¹³ Butungdeh miak uen ngisak arang akangdeh idi libut-libut bubpundeh, idi luun anid surud idi pegkung, idi liang anid lawa kayuh idi su apeh luk inandeh ngeseb baré kuan akangdeh. Idi amung-amung lemulun miak kali' Negku, Ui ini Tuhan.

¹⁴ Matu, Ui miak natang ticu'Ku idi ngusag bawangdeh. Ui nganau' neneh mangun ku su luk ali-ali rat pa kabing busat aco pad macing bawang Ribla pa tinueh busat aco, ieh ineh amung su luk inan lun Israil tudo. Idi amung-amung lemulun miak kali' Negku, Ui ini Tuhan.”