YEHISKIEL 5 - BALA LUK DO'

Yehiskiel Muting Abpukneh

¹ Kebala Allah, “O lemulun, do' ngalap aceh pelapet luk metadem. Mingit buluh tangmu idi abpukmu. Nimang abpuk ineh, idi mabpat neneh mangun ku teluh babpat.

² Ngeseb aceh babpat bang bawang ineh kareb bunu' ugka'. Idi teh ngalap aceh babpat idi natek ineh ku pelapetmu kareb iko lawé-lawé bang bawang. Idi nala' babpat luk ketecan pad ieh mepalid ku bui, idi Ui munu' neneh ku pelapetKu.

³ Nganug tuda'-tuda' urat abpuk ineh idi ngelulun neneh bang iring kuyu'mu.

⁴ Idi ngalap sebuang urat ineh teh idi nala' nedeh bang apui pad ideh meseb. Rat nedeh apui miak meperuit kuan amung pupu Israil.”

⁵ Idi kebala Tuhan, “Nier bawang Yerusalim. Ui nemudut neneh uned tana' ini, dengan bawang baken libut-libutneh.

⁶ Iamo' Yerusalim sikal metueh ratnan ukumKu, pad ieh meluun dat ratnan pupu baken, ieh meluun ara' ku ukumKu, ratnan bawang luk libut-libutneh. Yerusalim nengarung bada'Ku, idi ara' maya' ukumKu.

⁷ O Yerusalim, do' ninger balaKu. Ngaceku Ui ini Tuhan. Iko ngacing ria' meluun ratnan pupu luk libut-libutmu, ngaceku iko na ninger balaKu, idi na maya' ukumKu. Iko nemaya' lawé pupu baken.

⁸ Idi Ui ini Tuhan pebala, Ui mangun ku bunu'mu. Ui miak ngukum namu su siren amung pupu.

⁹ Ui miak ngacing kuan Yerusalim ukum luk meluun rayeh ratnan luk atun idi ratnan luk macing muci, ngaceku amung kekamenmu luk inanKu megateh.

¹⁰ Idi déi' Yerusalim, taman-taman miak kuman anakdeh, idi anak-anak miak kuman tamandeh. Ui miak ngukum namu idi matad lemulun luk ketecan amé' iapeh-iapeh.

¹¹ “Ui ini Allah luk mulun idi ini bala Tuhan: Ngaceku iko nengelutak ruma'Ku ku kekamen luk dat idi megani', idi Ui miak ngusag namu dengan na méi'.

¹² Sebabpat bang teluh babpat pupumu miak maté bang bawang, ku ét, idi lau. Sebabpat miak pitayen ku pelapet bal alad bawang; idi babpat luk keteluh miak mepalid ku bui idi Ui ngerada' nedeh dengan pelapetKu.

¹³ “Iko miak kali' useh idi gatehKu luk mebura', pad Ui musam. Kareb amung ini mangun, iko miak kali' idi Ui ini Tuhan nepebala namu dengan usehKu, ngaceku iko na lutep maya' Negku.

¹⁴ Amung-amung lun pupu baken luk libut-libutmu idi luk lemaba namu miak situnga namu rat mado.

¹⁵ “Kareb Ui museh idi megateh namu, idi kareb Ui ngukum namu, amung-amung pupu luk libut-libutmu miak matot. Ideh megileg nier namu idi situnga namu.

¹⁶ Idi Ui na maré akan namu pad iko maté ku lau. Idi laumu mepad kudeng ét lemulun luk binayung ku ileb.

¹⁷ Ui ngacing lau idi pung luk mesangit miak ngaté anakmu, idi teh ét idi bunu' miak ngaté namu. Ui ini Tuhan pangeh nepebala.”