YEHISKIEL 48 - BALA LUK DO'

Babpat Tana' Kuan Lun Israil

^1-7 Lakan tana' luk pa tinueh busat aco maya' pa busat aco rat Abpa' Rayeh macing bawang Hetlon, Ruan Hamat, bawang Enon, idi lakan tana' arang imet Damsik denga imet Hamat. Anid-anid pupu miak ngalap aceh babpat tana' rat lakan tana' luk pa busat aco macing nan lakan tana' luk pa acep aco, maya' kudeng luk pa beneh ini, rat pa tinueh busat aco macing pa kabing busat aco; Dan, Aser, Naptali, Manasé, Epraim, Rubin, Yahuda.

Bapbat Luk Linigan Kuan Tuhan Uned Tana' Ineh

⁸ Idi rat pa busat aco macing pa acep aco inan tana' luk linigan kuan Allah. Pipangneh pulu' batu, idi kikadangneh rat pa busat aco macing pa acep aco mepad kikadang babpat pupu-pupu Israil. Idi Ruma' Allah piduten unedneh.

⁹ Kikadang babpat tana' ini luk linigan kuan Tuhan pulu' batu, idi pipangneh ualuh batu.

¹⁰ Imam-imam miak ngalap aceh babpat tana' ini luk meligan. Kikadangneh pa tinueh busat aco idi pa kabing busat aco pulu' batu, idi pipangneh pa busat aco idi pa acep aco apat batu. Ruma' Allah piduten uned tana' ineh.

¹¹ Babpat luk meligan ineh kuan imam-imam luk inul Saduk. Ideh nelutep ngakem kuanKu idi na neperurum nelun Israil nganau' sala' kudeng lun Liwi luk baken ineh.

¹² Ngaceku ineh ideh ngalap aceh babpat luk do' muneng ku babpat lun Liwi luk baken, idi ineh mangun ku luk meluun ligan.

¹³ Lun Liwi miak ngalap aceh babpat tana' muneng ku tana' lun imam. Kikadangneh muneng ku tana' lun imam. Kikadangneh pulu' batu idi pipangneh apat batu.

¹⁴ Tana' luk linigan kuan Tuhan ineh meluun do' ratnan amung tana' luk baken. Sesut tana' ineh pana' na miak pisuen, na miak uen ngelibal, idi na miak uen lun baken ngacem. Tana' ineh meligan kuan Tuhan.

¹⁵ Tana' luk ketecan na meligan, kikadangneh pulu' batu idi pipangneh dueh batu. Tana' ineh kuan lun mula' mo'. Ideh miak tebawang su ineh. Bawang rayeh piduten unedneh.

¹⁶ Idi pipangneh mepad mo' na macing dueh batu.

¹⁷ Libut-libut bawang ineh inan natad, pipangneh 75 depeh.

¹⁸ Tana' luk ketecan kareb bawang ineh pangeh pinudut, luk iring tana' luk meligan, ieh ineh apat batu pa busat aco idi apat batu pa acep aco, miak inan lun luk tudo bang bawang ineh nganau' lati'.

¹⁹ Idé-idé luk tudo bang bawang rayeh ineh, ratnan anid-anid pupu miak nganau' lati' su ineh.

²⁰ Pipang amung tana' luk uen ngeletep pulu' batu, ieh ineh apat ngepulu' batu pekelibut. Idi tana' bawang rayeh bang ineh teh.

^21-22 Kareb tana' luk linigan kuan Tuhan idi tana' luk kuan bawang rayeh pangeh ilap ratnan babpat tana' ineh luk pipangneh pulu' batu, amung tana' luk ketecan selipa idi pa selipa macing abpa' rayeh pa acep aco idi lakan tana' pa busat aco mangun ku babpat lun luk ngimet. Ruma' Allah, tana' luk linigan kuan Tuhan, tana' luk biré nelun Liwi, idi bawang rayeh idi uned babpat ineh. Babpat ineh arang babpat luk biré kuan Yahuda pa tinueh busat aco, dengan babpat luk biré kuan Beniamin pa kabing busat aco.

Tana' Kuan Pupu Israil Luk Baken

^23-27 Pa kabing busat aco babpat ineh, anid-anid pupu Israil luk baken miak ngalap aceh babpat tana' rat lakan tana' luk pa busat aco macing lakan tana' luk pa acep aco, maya' kudeng luk pa beneh ini, rat pa tinueh busat aco macing pa kabing busat aco: Beniamin, Simion, Iskar, Sebulon, Gad.

²⁸ Pa kabing busat aco babpat luk biré kuan pupu Gad, lakan tana' amé' pa lod busat aco rat Bawang Piasau macing takung Kadis, idi amé pa dayeh busat aco maya' lakan tana' Masir macing Abpa' Rayeh.

²⁹ Kebala Tuhan Allah, “Kudeng ineh lawéneh tana' uen mabpat kuan pupu Israil, pad ideh ngalap tana' luk ku babpat inuldeh.”

Tanga'-Tanga' Yerusalim

^30-34 Ini amung tanga' bawang ineh. Kikadang anid libung na macing dueh batu, idi anid libung ineh inan teluh tanga', idi anid tanga' inan ngadan aceh pupu Israil. Tanga' luk pa tinueh busat aco titen Rubin, Yahuda, idi Liwi. Tanga' luk pa busat aco titen Yusup, Beniamin, idi Dan. Tanga' luk pa kabing busat aco titen Simion, Iskar, idi Sebulon. Idi tanga' luk pa acep aco titen Gad, Aser, idi Naptali.

³⁵ Kidakang libung luk libut-libut bawang lélé ualuh batu. Ngadan bawang ineh rat pad sineh, “Tuhan Idi Su Ini!”