YEHISKIEL 46 - BALA LUK DO'

Lun Luk Ngimet Idi Irau-Irau

¹ Kebala Tuhan Allah, “Tanga' natad luk uned luk pa buat aco uen ngitek anem aco kareb muyuh ngakem. Iamo' ieh kabin bang Aco luk inan Mudeng idi teh Bulan Baruh.

² Lun luk ngimet miak nalan ratnan natad luk bal alad amé' bang takep luk rayeh luk munung tanga' ineh idi tuped iring diri tanga' kareb imam-imam ngeseb baréneh luk teburur, idi kareb ideh maré baréneh luk nguit pedo'. Do' ieh sembayang munung tanga' idi remuat. Tanga' ineh na mitek pad macing aco macep.

³ Anid Aco luk inan Mudeng idi anid Bulan Baruh lun mula' tekeradung idi sembayang nan Tuhan pa atun tanga' ineh.

⁴ “Bang Aco luk inan Mudeng do' lun luk ngimet nguit amé' pa kiung Tuhan anem anak dumba, idi sebuleng dumba deléi luk na luk mét mangun ku baré luk sabpen teburur.

⁵ Do' ieh nguit baré akan apat gatang setangal idi anun-anun luk baken luk pian barénneh dengan anid anak dumba ineh. Denga anid baré akan luk apat gatang setangal ineh, do' ieh nguit teluh seréi' umau saitun luk rayeh.

⁶ Kareb Bulan Baruh ieh miak maré aceh sapi' deléi luk pegawa', anem anak dumba, idi sebuleng dumba deléi luk na anun-anun luk mét.

⁷ Dengan anid sapi' idi dumba luk barén, do' ieh maré apat gatang setangal padé idi anun-anun luk pian barénneh dengan anak dumba ineh. Teluh seréi umau saitun luk rayeh miak barén dengan padé ineh.

⁸ Do' lun luk ngimet ineh nalan maya' bang takep luk rayeh idi remuat maya' tanga' luk dalanneh pun-pun.

⁹ “Kareb lun mula' amé' sembayang nan Tuhan kareb aco rayeh, ideh luk semuet maya' tanga' luk pa tinueh busat aco miak remuat kareb ideh pangeh nesembayang maya' tanga' luk pa kabing busat aco. Ideh luk semuet maya' tanga' luk pa kabing busat aco miak remuat maya' tanga' luk pa tinueh busat aco. Na ideh miak remuat maya' dalan luk pun-pun, iamo' do' ideh maya' tanga' luk petutup.

¹⁰ Do' lun luk ngimet semuet kareb lun mula' macing, idi remuat kareb ideh remuat.

¹¹ Kareb irau idi aco rayeh, baré akan ineh apat gatang setangal padé dengan anid sapi' idi dumba, idi teh anun-anun luk pian barén lun luk sembayang ineh dengan anid anak dumba. Teluh seréi' umau saitun luk rayeh miak barén dengan padé ineh.

¹² “Kareb lun luk ngimet pian maré aceh baré kuan Tuhan, maya' ran niatneh — aceh baré luk sabpen teburur, kian aceh baré luk nguit pedo' lek — do' tanga' luk pa busat aco luk semuet amé' nan natad luk uned, kabin kuanneh. Ieh maré baré ineh maya' lawé luk pekalai kareb Aco luk inan Mudeng, idi do' tanga' ineh uen ngitek kareb ieh remuat.”

Baré Anid-Anid Aco

¹³ Kebala Tuhan, “Anid-anid pekak do' maré kuan Tuhan sebuleng anak dumba luk ulun selak idi luk na luk mét. Ini miak barén anid-anid aco.

¹⁴ Idi teh anid pekak do' maré apat kati banak idi aceh seréi' umau saitun luk rayeh pimuar banak ineh. Ukum ratnan baré ini kuan Tuhan lutep macing ruked-ruked.

¹⁵ Anak dumba, banak, idi umau saitun ineh miak barén kuan Tuhan anid pekak macing ruked-ruked.”

Lun Luk Ngimet Idi Tana'

¹⁶ Kudeng ini bala Tuhan Allah: “Kudeng lun luk ngimet maré sebabpat tana'neh kuan sebuleng anakneh, tana' ineh mangun ku babpat anak ineh ratnan binaweh tetek ruma'neh ineh.

¹⁷ Iamo' kudeng lun luk ngimet ineh maré sebabpat tana' ineh kuan seburu lun dukenneh, tana' ineh miak uen nguli' kuan lun luk ngimet kareb lak puit. Ieh luk kuan tananeh, idi anakneh mo' luk miak ngalap aceh babpat luk meparud.

¹⁸ Lun luk ngimet na miak ngaro tana' anak itinneh. Ieh miak maré tana' kuan anakneh ratnan babpat tana' luk pangeh litep kuanneh, pelé ieh na ngedereh pupuKu idi ngaro tana'deh.”

Dapur-dapur Ruma' Allah

¹⁹ Idi lemulun ineh nenguit negku amé' munung tanga' takep-takep luk muneng ku tanga' luk pa kabing busat aco natad luk uned ineh. Ini takep luk meligan kuan imam-imam. Ieh nenicul su luk pa acep aco takep ineh,

²⁰ kebalaneh, “Ini su luk inan imam-imam nanek uang pung luk barén ngaceku sala' idi babeh sala', idi teh su luk inandeh nganau' baré akan, pad anun-anun luk linigan na iten amé' nan natad luk bal alad, idi na macing nan lun mula'.”

^21-22 Idi ieh nenguit negku amé' nan natad luk bal alad, idi ieh nemada' sirenku natad-natad luk isuut bang anid-anid lidung ineh kikadangdeh lélé pulu' aceh depeh, idi pipangdeh ualuh depeh mela.

²³ Anid-anid natad ineh inan libung batu denga tetel iring alad.

²⁴ Kebala lemulun ineh negku, “Ini dapur-dapur su luk inan lun duken bang Ruma' Allah nanek baré luk barén lun mula'.”