YEHISKIEL 44 - BALA LUK DO'

Ratnan Tanga' Luk Pa Busat Aco

¹ Lemulun ineh nenguit negku amé' nan tanga' luk bal alad Ruma' Allah luk pa busat aco. Idi tanga' ineh initek.

² Idi kebala Tuhan negku, “Tanga' ini mitek idi na miak kabin. Seburur lemulun pana' nateh luk miak semuet maya' tanga' ineh, ngaceku Ui ini Tuhan Allah lun Israil pangeh nesemuet maya' ineh. Na miak na ieh mitek.

³ Iamo' raca' luk ngimet miak tudo su ineh idi kuman pa kiungKu. Ieh miak semuet idi remuat maya' takep luk rayeh luk paped ruma'Ku ineh.”

Ukum Ratnan Semuet Bang Ruma' Allah

⁴ Idi lemulun ineh nenguit negku semuet maya' tanga' luk pa tinueh busat aco luk pa atun Ruma' Allah. Ui nenier idi nekali' Ruma' Allah ineh mepanu' ku rayehNeh. Idi ui netekeradung,

⁵ idi kebala Tuhan negku, “O lemulun, ngerawé do'-do' ratnan luk siren idi pedingerenmu. Ui mada' namu ratnan amung ukum idi lawé Ruma' Allah. Idi ngerawé do'-do' ratnan idé lemulun luk semuet idi remuat rat bang Ruma'Ku ineh.

⁶ “Mada' nelun Israil luk sikal metueh ineh. Kudeng ini bala Tuhan Allah: O lun Israil, do' muyuh ugka' ratnan kekamen muyuh luk dat.

⁷ Muyuh nima' nelun pupu baken luk na sinunat bang burur idi niatdeh, idi luk na maya' balaKu, semuet bang Ruma'Ku, kareb lemak idi dara' barén muyuh Negku. Muyuh pangeh nengelaba jani'Ku ku kekamen muyuh luk pelaba dat.

⁸ Muyuh na matar repapehKu luk meligan, iamo' muyuh ngecuk nelun pupu baken matar su luk meligan ineh.

⁹ “Ngaceku ineh kudeng ini bala Tuhan Allah: Lun pupu baken luk na sinunat bang burur idi niatdeh na miak semuet bang Ruma'Ku, sagan tu pana' ieh tudo arang lun Israil.

Lun Liwi Talan Ratnan Kekamen Imam

¹⁰ “Lun Liwi luk nenecan Negku kareb lun Israil neraruh idi nesembayang inan akang, miak kumin.

¹¹ Ideh miak ngakem bang Ruma'Ku idi matar tanga' idi nganau' kekamen luk baken-baken teh. Ideh ngeret pung luk barén lun mula' ku baré luk sabpen idi ku baré luk kereten, idi ideh megéi' temina' ngakem kuan lun mula'.

¹² Ngaceku ideh nengakem kuan lun Israil pa kiung akangdeh, pad ngeraruh nelun mula', Ui ini Tuhan Allah pebulung, na miak na imam-imam ineh kumin.

¹³ Ideh na miak mangun ku imam-imam pa kiungKu, idi teh ideh na miak amé' muneng ku anun-anun luk linigan kuanKu. Idi ideh na miak semuet bang Su luk Meluun Ligan teh. Ini ukum ngaceku kekamendeh luk pelaba dat.

¹⁴ Ui ngecuk nedeh nganau' kekamen lun duken mo' bang Ruma' Allah.”

Imam-Imam

¹⁵ Kebala Tuhan Allah, “Iamo' imam-imam lun Liwi luk inul Saduk, lutep ngakem bang Ruma'Ku kareb lun Israil luk baken neteketed rat Negku. Ngaceku ineh ideh luk miak ngakem pa kiungKu idi nguit lemak idi dara' ratnan amung baré.

¹⁶ Ideh luk miak semuet bang Ruma'Ku, ngakem iring bubpunKu, idi nguyut sembayang bang Ruma' Allah!

¹⁷ Kareb ideh maya' tanga' semuet nan natad luk uned Ruma' Allah, ideh ngayung ku kibung pu. Ideh na miak ngayung ku ayung luk inau' ratnan buluh dumba kareb ideh ngakem luun natad luk uned, idi bang Ruma' Allah.

¹⁸ Ideh makai sigar idi siduar luk inau' ratnan kibung pu, dengan na abet awa' pad ideh na mepana.

¹⁹ Kareb nateh ideh amé' nan natad luk bal alad su luk inan lun mula', ideh ngelengu ayung luk pakaideh bang Ruma' Allah idi necan ineh bang takep luk meligan. Ideh ngayung ku ayung luk baken, pad ligan ratnan ayungdeh na macing nan lun mula'.

²⁰ “Abpuk imam na miak uen ngiki idi na miak mekadang. Abpukdeh mepad kudeng luk pekalai mo'.

²¹ Imam-imam na miak ngirup abpa' anggur kareb nateh ideh semuet nan natad luk uned.

²² Ideh na miak ngaweh decur luk pangeh nepatad ratnan deléineh. Ieh miak ngaweh anak adi' decur luk nateh nepamung dengan deléi, kudeng na ieh miak ngalap tinula' imam.

²³ “Do' imam-imam mada' pupuKu, pad ideh ngiti luk meligan idi luk na meligan, idi luk bipeng idi luk na bibpeng.

²⁴ Kudeng inan besara', do' imam-imam mutut besara' ineh maya' ukumKu. Do' ideh ngimet amung aco rayeh maya' ukum idi lawéKu Idi do' ideh ngeligan Aco luk inan Mudeng.

²⁵ “Imam-imam na miak ngelutak bururdeh ku butung, kudeng baken ratnan butung taman-tinanneh, anakneh, kinanakneh deléi, idi kinanakneh decur luk na awan.

²⁶ Kareb ieh pangeh linigan do' ieh nganét tudu' aco kinioneh.

²⁷ Pangeh ineh do' ieh amé' nan natad luk uned idi maré aceh baré ngaceku sala', pelé ieh miak ngakem bang Ruma' Allah teh. Ui ini Tuhan pangeh nepebala.

²⁸ “Babpat inul lun imam ratnan luk biréKu nelun Israil luk barén kuan anid-anid inul, ieh ineh kekamen imam. Na ideh miak ngalap tana' bang bawang Israil. Ui ini babpat imam-imam ineh.

²⁹ Baré akan idi baré ngaceku sala' idi babeh sala' mangun ku akandeh, idi ideh ngalap amung-amung luk barén kuanKu bang bawang Israil.

³⁰ Ideh ngalap luk meluun do' ratnan bua' luk pun-pun idi amung-amung luk baken luk barén kuanKu. Kareb pupu ini nganau' ruti, ruti luk pun-pun ruendeh barén kuan imam-imam pad ruma'deh uenKu ngeperuan.

³¹ Imam-imam na miak kuman suit idi pung luk maté mo'-mo', idi teh luk pitayen pung baken.”