YEHISKIEL 40 - BALA LUK DO'

LUK SINIER RATNAN RUMA' ALLAH LUK PIDUTEN ( 40.1—48.35 ) Yehiskiel Inuit Allah Iné' Yerusalim

¹ Pulu' aco pangeh umak lak baruh, ieh ineh dueh ngepulu' limeh lak muci ratnan kai tiban, idi pulu' apat lak muci ratnan Yerusalim linaya'. Idi bang aco sineh teh Ui neketukan Roh Tuhan, idi Ieh nenguit negku nalan.

² Bang luk sinierku Allah nenguit negku iné' bawang Israil idi Ieh nengerareng negku luun pegkung luk medita'. Ui nenier pa atunku tuda'-tuda' pudut mepad kudeng ayu bawang rayeh.

³ Ieh nenguit negku amé' muneng, idi ui nenier aceh lemulun luk mesilo mepad kudeng tekaling. Ieh nengimet aceh tari luk ratnan kibung pu, idi aceh rukud luk ku nari. Idi ieh netuped munung tanga'.

⁴ Kebalaneh negku, “O lemulun, do' iko nier. Ninger do'-do' idi ngerawé ratnan amung-amung luk badénku sirenmu, ngaceku ineh punneh iko inuit amé' tungé'. Do' iko mada' nelun Israil ratnan amung-amung luk sirenmu napeh.”

Tanga' Luk Pa Busat Aco

⁵ Idi ui nenier aceh Ruma' Allah luk linibung. Lemulun ineh nenguit rukudneh luk dueh depeh kadangneh, idi ieh nenari libung ineh. Dita'neh idi kapalneh dueh depeh.

⁶ Idi ieh iné' matun tanga' luk pa busat aco. Idi ieh numak ican idi nenari munung tanga' ineh. Ineh pana' dueh depeh dalamneh.

⁷ Bal tanga' ineh inan aceh dalan arang takep lun luk nginita, teluh pa selipa, teluh pa selipa. Anid takep ineh mepad pipangneh, ieh ineh dueh depeh; idi alad arang takep ineh ualuh kaki kapalneh. Bal takep lun luk nginita ineh inan aceh dalan teh luk dueh depeh kadangneh luk petacu semuet bang aceh takep luk rayeh pa atun Ruma' Allah.

^8-9 Ieh nenari takep ineh, idi pipangneh dueh depeh mela. Ieh mangun ku paped munung tanga' luk muneng ku Ruma' Allah, idi alad luk bal selipa dueh kaki kapalneh. (

¹⁰ Takep lun luk nginita luk pekop dalan ineh mepad rayeh, idi alad luk arangdeh mepad kapalneh.)

¹¹ Pangeh ineh lemulun ineh nenari pipang dalan maya' munung tanga'. Ieh ineh apat depeh pipangneh, idi arang tanga' luk dueh ineh dueh depeh mela pipangneh kareb ieh mukab.

¹² Pa atun anid takep lun luk nginita ineh inan aceh alad luk mebeneh, dita'neh idi kapalneh dueh kaki. (Pipang takep ineh dueh depeh.)

¹³ Idi ieh nenari kiado rat ku alad sebuleng takep macing ku alad takep luk bal selipa dalan ineh, ieh ineh lélé tudu' depeh kikadangneh.

¹⁴ Takep luk paped dalan ineh petacu semuet amé' nan natad luk uned ruma' ineh. Ieh nenari ineh, idi pipangneh limeh depeh mela.

¹⁵ Kikadang dalan rat bal selipa tanga' macing papedneh selipa, ieh ineh pulu' teluh depeh mela.

¹⁶ Inan tabuk luk isuut luun alad anid takep ineh, idi teh luun alad luk arang takep ineh. Inan lawa piasau inarit luun alad luk petutup ku dalan.

Natad Luk Bal Alad

¹⁷ Lemulun ineh nenguit negku amé' nan natad luk bal alad maya' tanga' ineh. Idi inan teluh ngepulu' takep luk iring alad luk ngelibung bawang, idi pa atun takep inan aceh natad luk ianu' ratnan batu,

¹⁸ luk ngelibut natad luk bal alad ineh. Natad luk bal alad meluun beneh ratnan natad luk uned ineh.

¹⁹ Inan aceh tanga' luk meluun dita' luk macing nan natad luk uned ineh. Lemulun ineh nenari arang dueh tanga' ineh. Idi kikadangneh lélé dueh ngepulu' tudu' depeh.

Tanga' Luk Pa Tinueh Busat Aco

²⁰ Idi lemulun ineh nenari tanga' luk pa tinueh busat aco, luk macing nan natad luk bal alad.

²¹ Teluh takep lun luk nginita luk iring dalan selipa, alad luk arangdeh, idi takep luk rayeh mepad kirayeh kudeng bang tanga' luk pa busat aco, ieh ineh kikadang tanga', pulu' teluh depeh mela idi pipangneh lélé tudu' depeh.

²² Takep luk rayeh, tabuk, idi arit lawa piasau, mepad kudeng luk bang tanga' luk pa busat aco.Su ineh pana' inan tudu' tatak umak amé' munung tanga', idi takep luk rayeh pa atun natad luk uned.

²³ Guta natad luk bal alad rat tanga' luk pa tinueh busat aco inan aceh tanga' luk amé' nan natad luk uned, mepad kudeng luk pa busat aco. Lemulun ineh nenari arang dueh tanga' ineh. Idi kikadangneh lélé dueh ngepulu' tudu' depeh.

Tanga' Luk Pa Kabing Busat Aco

²⁴ Pangeh ineh ieh nenguit negku amé' pa kabing busat aco, idi kai nenier aceh tanga' teh. Ieh nenari ineh, idi ieh mepad kudeng luk baken.

²⁵ Inan tabuk bang takep tanga' ineh mepad kudeng bang tanga' baken. Idi kikadang tanga' ineh pulu' teluh depeh mela, idi pipangneh lélé tudu' depeh.

²⁶ Inan tudu' tatak pad umak su ineh, idi takepneh luk rayeh pa atun natad luk uned. Inan lawa piasau inarit luun alad luk petutup ku dalan ineh.

²⁷ Su ineh pana' inan aceh tanga' luk amé' nan natad luk uned ineh. Lemulun ineh nenari kiado rat tanga' lu kedueh ineh. Idi kikadangneh lélé dueh ngepulu' tudu' depeh.

Natad Luk Uned: Tanga' Luk Pa Kabing Busat Aco

²⁸ Idi lemulun ineh nenguit negku maya' tanga' luk pa kabing busat aco amé' nan natad luk uned ineh. Ieh nenari tanga' ineh, idi ieh mepad kudeng luk baken.

^29-30 Takep lun luk nginita, takep luk rayeh, idi alad luk arangdeh mepad kirayeh kudeng bang tanga' luk baken. Inan teh tabuk bang takep ini. Idi kikadang tanga' ini pulu' teluh depeh mela, idi pipangneh lélé tudu' depeh.

³¹ Inan takep luk rayeh petutup ku natad luk bal alad. Inan lawa piasau inarit luun alad luk petutup ku dalan. Inan ualuh tatak pad umak amé' munung tanga' ineh.

Natad Luk Uned: Tanga' Luk Pa Busat Aco

³² Lemulun ineh nenguit negku maya' tanga' luk pa busat aco amé' nan natad luk uned. Ieh nenari tanga' ineh, idi ieh mepad kudeng luk baken.

³³ Takep lun luk nginita, takep luk rayeh idi alad luk arangdeh, mepad kirayeh kudeng bang tanga' luk baken. Inan tabuk pekelibut luun alad ineh, idi inan teh aceh takep luk rayeh. Idi kikadang tanga' ineh pulu' teluh depeh mela, idi pipangneh lélé tudu' depeh.

³⁴ Takep luk rayeh petutup ku natad luk bal alad. Inan lawa piasau inarit luun alad luk petutup ku dalan. Inan ualuh tatak pad umak amé' munung tanga' ineh.

Natad Luk Uned: Tanga' Luk Pa Tinueh Busat Aco

³⁵ Lemulun ineh nenguit negku amé' nan tanga' luk pa tinueh busat aco. Ieh nenari ineh, idi ieh mepad kudeng luk baken.

³⁶ Inan teh takep lun luk nginita, alad luk inarit arangdeh, aceh takep luk rayeh, idi tabuk pekelibut luun alad ineh. Kikadang tanga' ineh pulu' teluh depeh mela, idi pipangneh lélé tudu' depeh.

³⁷ Takep luk rayeh ineh petutup ku natad luk bal alad. Inan lawa piasau inarit luun alad luk petutup ku dalan. Inan ualuh tatak pad umak amé' nan tanga' ineh.

Pudut-Pudut Luk Muneng Ku Tanga' Luk Pa Tinueh Busat Aco

³⁸ Luun natad luk bal alad ineh inan aceh pudut baken luk pekatu nan tanga' luk déi' dalem, luk semuet amé' bang takep luk rayeh luk petutup ku natad ineh. Su ineh ideh maru' butung pung luk sabpen teburur mangun ku baré.

³⁹ Bang takep luk rayeh ineh inan apat méja, dueh selipa idi dueh selipa. Luun méja ineh ideh ngaté pung luk ku baré sabpen teburur, idi baré ngaceku sala', idi teh babeh sala'.

⁴⁰ Bal takep ineh inan teh apat méja, dueh munung tanga' selipa idi dueh selipa, ieh ineh munung tanga' luk pa tinueh busat aco.

⁴¹ Inan apat méja bang takep idi apat bal alad, ieh ineh ualuh méja su luk inan pung luk barén pitayeh.

⁴² Apat méja ineh luk nan ngerareng baré luk sabpen teburur inau' ratnan batu. Kidita'deh dueh kaki idi pipangneh dueh kaki setangal. Amung repapeh luk ku ngaté pung luk barén uen ngerareng luun méja ini.

⁴³ Iring amung méja ineh apat inci kirayehneh. Amung uang pung luk ku baré uen ngerareng luun méja ineh.

⁴⁴ Iring tanga' luk pa tinueh busat aco inan aceh takep luk meluun do' luk petutup pa kabing busat aco, idi inan teh iring tanga' luk pa kabing busat aco luk petutup pa tinueh busat aco.

⁴⁵ Kebala lemulun ineh negku, “Takep luk petutup pa kabing busat aco kuan imam-imam luk ngakem bang Ruma' Allah.

⁴⁶ Idi takep luk petutup pa tinueh busat aco kuan imam-imam luk ngakem iring bubpun.” Amungdeh ineh lun Liwi luk Inul Saduk. Ideh mo' luk simén amé' ngakem pa kiung Tuhan.

Natad Luk Uned Idi Ruma' Allah

⁴⁷ Lemulun nenari natad luk uned ineh, idi pipangneh lélé dueh ngepulu' tudu' depeh. Inan aceh bubpun pa atun Ruma' Allah.

⁴⁸ Idi ieh nenguit negku maya' munung tanga' semuet bang takep luk pa atun Ruma' Allah. Ieh nenari munung tanga' ineh, idi kikadangneh medepeh mela' pipangneh lélé apat depeh, idi aladneh pekop lélé medepeh kapalneh.

⁴⁹ Kikadang takep luk pa atun ineh lélé anem depeh, idi pipangneh teluh depeh mela dengan ican pad umak amé' dita'. I dita' inan diri pekop munung tanga' ineh.