YEHISKIEL 4 - BALA LUK DO'

Yehiskiel Nganau' Aceh Tanu' Pinginud Yerusalim Uen Ngerieng

¹ Kebala Allah, “O lemulun, do' ngalap aceh batu bata, idi nganau' neneh pa atunmu, idi ngarit aceh ayu bawang Yerusalim luunneh.

² Idi nganau' aceh tanu' pinginud Yerusalim uen ngerieng. Ieh ineh do' nganau' abang, ibpeng su luk inan lupo, idi teh repapeh luk ku ngusag bawang.

³ Do' naped aceh balad belawan ku alad arangmu dengan bawang ineh. Sium pa atun bawang ineh. Bawang ineh uen ngerieng, idi iko luk ngerieng neneh. Ini mangun ku tanu' kuan pupu Israil.

⁴ “Telubid tebiring pa kabing, idi Ui ngerareng sala' pupu Israil luunmu. Iko miak telubid su ineh idi mabeh sala'deh,

⁵ teluh ngeratu iwa' ngepulu' aco kinioneh, ngaceku Ui ngukum namu seaco mangun ku aceh lak, ku pinginud ukumdeh.

⁶ Pangeh ineh tebiring selipa idi mabeh sala' Yahuda apat ngepulu' aco kinioneh — seaco mangun ku aceh lak ku pinginud ukumdeh.

⁷ “Nutong bawang Yerusalim luk uen ngerieng. Ngelulun langen kuyu'mu, idi mada' ukum kuan bawang ineh.

⁸ Ui miak ngabet namu, pad iko na miak tebiring selipa, pad macing bunu' ugka'.

⁹ “Do' ngalap bara, ikun, peritek, bua' petar, binamud, idi banak. Muar amung ineh mangun ku ruti. Ini mangun ku akanmu 390 aco kinioneh, kareb iko tebiring pa kabing.

¹⁰ Iko miak kuman anem tahil ruti seaco. Idi do' kuman sesuut-sesuut anid kua'.

¹¹ Idi teh iko miak ngirup dueh sangkir abpa' mo' bang seaco.

¹² Iko miak nganau' apui ratnan téi' lemulun luk tekering. Do' ngeseb ruti luun bareh apui ineh, idi kuman ineh su siren amung-amung lemulun.”

¹³ Kebala Tuhan, “Kareb Ui matad nelun Israil bang bawang pupu baken, kudeng ineh teh lawédeh kuman akan luk bibpeng ukum Musa.”

¹⁴ Iamo' kebalaku, “Ara' ui, Tuhan! Macing nekini nateh ui nengelutak bururku. Rat isuut ui nateh nekuman uang pung luk naté ku ét, idi luk pinaté pung luk meliput pana'. Ui nateh nekuman akan luk melutak.”

¹⁵ Idi kebala Allah, “Kudeng pieh kudeng ineh, miak iko makai téi' sapi' idi ngeseb rutimu luun ineh.”

¹⁶ Idi teh kebalaNeh, “O lemulun, Ui miak ngesusa' bawang Yerusalim, pad ideh na inan petap ruti kenendeh. Dengan merapang ideh miak nguad akan idi abpa' luk rupendeh.

¹⁷ Matu, ideh na inan ruti idi abpa', pad ideh na tuman ku derehdeh, idi ideh iuk-iuk amé' merugu' bang sala'deh.”