YEHISKIEL 38 - BALA LUK DO'

Gog mangun Ku Pelapet Allah

¹ Kebala Tuhan negku,

² “O lemulun, do' ngadu' ni Gog rat bawang Magog. Ieh ineh raca' rayeh bang bawang Misek idi Tubal. Ngadu' neneh.

³ Kudeng ini bala Tuhan Allah: Ui ni bunu'mu.

⁴ Ui ngakem namu idi ngedier namu amé' pa keted. Ui nganau' keluit bang tangmu idi ngeruid namu dengan bawehmu semuet bang ukum, dengan baweh kuda idi lun luk maya' kuda dengan ayung bunu'deh. Baweh ineh pelaba rayeh idi anid lun pebunu' ngimet utap idi pelapet.

⁵ Lun rat Parsi, Sudan, idi Libia idi denganmu. Amungdeh inan utap idi tupi.

⁶ Amung lun pebunu' rat bawang Gomer idi Bait Togarma rat pa tinueh busat aco idi denganmu, kudeng ineh teh lun pebunu' rat bawang baken.

⁷ Do' iko temina' dengan amung bawehmu luk maya' ukummu.

⁸ Pangeh tuda'-tuda' lak Ui ngecuk namu ngerieng aceh bawang su luk inan lemulun tudo dengan na matot bunu' rat kareb ideh pimung rat bang tuda'-tuda' bawang. Iko miak ngerieng pegkung-pegkung Israil luk mio tican, iamo' nekini ideh do' udeng su ineh.

⁹ Iko dengan bawehmu idi dengan mula' pupu baken miak ngerieng bawang Israil mepad kudeng barui, idi iko mapen tana' mepad kudeng laput.”

¹⁰ Kudeng ini bala Tuhan Allah ni Gog: “Kareb ineh iko inan aceh terawé luk dat.

¹¹ Iko miak ngerawé ratnan ngerieng aceh bawang luk melaya' luk na linibung idi luk na lun pebunu', idi su luk inan lemulun do' udehg.

¹² Iko miak mano idi ngaro ruma' lemulun luk mudeng bang bawang luk inusag atun. Ideh pimung rat arang anid-anid pupu, idi nekini ideh inan tana' idi aya', idi ideh tudo uned tana' ini.

¹³ Lun Siba, lun Dedan, idi lun luk pepua' rat bawang Tarsis miak ngitun namu, kebaladeh, ‘Pangehké iko nengamung bawehmu amé' pebunu' pad ngaro idi naban pirak, amas, sapi', idi binaweh, idi buro dengan pelaba ula' binaweh luk uenmu mano?’ ”

¹⁴ Idi Tuhan Allah nengecuk negku pebala ni Gog, “Kudeng ini bala Tuhan Allah: Kareb pupuKu lun Israil do' udeng iko miak nalan,

¹⁵ rat bawangmu luk pa tinueh busat aco. Iko nguit aceh baweh luk rayeh idi luk mesangit ratnan mula' pupu. Amungdeh maya' kuda.

¹⁶ Iko miak munu' nelun Israil, mepad kudeng aceh barui luk lemaba bawang. Kareb tarekneh macing, Ui ngecuk namu ngerieng bawangKu, pad amung pupu kali' Negku, pelé Ui ngegala' liganKu bang luk ruenKu kuanmu.

¹⁷ Ui nepebala ratnan iko dengan tang demulunKu nabi-nabi lun Israil luk atun, kebalaKu, Ui miak nguit seburur lemulun munu' Israil.” Tuhan Allah pangeh nepebala.

Ukum Allah Kuan Gog

¹⁸ Kebala Tuhan Allah, “Kareb Gog munu' Israil, Ui megateh niat.

¹⁹ Dengan usehKu Ui pejani'. Idi kareb ineh, inan aceh ruyuh tana' luk rayeh bang bawang Israil.

²⁰ Amung lawid idi suit, amung pung luk rayeh idi luk isuut, idi amung lemulun luk luun tana' ini miak megegker ku totdeh Negku. Pegkung miak meturan, pipi'-pipi' pana' meturan, idi amung libung batu miak metabpa.

²¹ Ui miak ngatot ni Gog ku tuda'-tuda' susa'. Ui ini Tuhan pangeh nepebala. Bawehneh sebuleng pad-pad pepaté ku pelapetdeh.

²² Ui ngukum neneh ku ét idi até pitayen. Ui ngutang udan idi udan batu, apui idi batu apui luunneh idi luun bawehneh, idi teh luun amung pupu baken luk ngedengan neneh.

²³ Dengan luk kudeng ineh, Ui ngegala' kuan amung pupu ratnan Ui ini rayeh idi meligan, pelé ideh kali' Ui ini Tuhan.”