YEHISKIEL 34 - BALA LUK DO'

Lun Matar Nelun Israil

¹ Kebala Tuhan negku,

² “O lemulun, ngadu' nelun luk matar nelun Israil, ieh ineh dumbaKu. Mada' nedeh. Kudeng ini bala Tuhan Allah: Muyuh miak kumin, O muyuh lun luk matar nelun Israil! Muyuh ngasa' burur muyuh sebuleng, iamo' na muyuh ngasa' dumba ineh.

³ Muyuh ngirup rata sapi' idi ngayung ku buluh dumba, idi ngeret idi kuman dumba luk meluun do'. Iamo' na muyuh ngasa' dumba ineh.

⁴ Muyuh na nengasa' dumba luk melaya', na nengedo' dumba luk mét, na nengabet urat dumba luk nurat, na nenguit dumba luk neraruh muli', idi na nenakap dumba luk netutu'. Iamo' muyuh nengedereh nedeh.

⁵ Ngaceku dumba ineh na lun luk matar nedeh, ideh nepatad pad pung luk mesangit nengaté idi nekuman nedeh.

⁶ Idi dumbaKu neraruh luun surud luk medita' idi luun pegkung pana'. Ideh nepatad aput tana' ini, idi seburur pana' nateh luk nenakap nedeh.

⁷ “Ngaceku ineh, O muyuh lun luk matar, ninger bala Tuhan.

⁸ Ui ini Tuhan Allah luk mulun, do' ninger balaKu, DumbaKu pangeh pinaté idi kinan pung luk mesangit, ngaceku na luk matar nedeh. LunKu luk matar na iné' nakap dumba. Ideh nengasa' bururdeh sebuleng idi ideh na ngerawé dumba.

⁹ O muyuh lun matar, do' ninger balaKu.

¹⁰ Kudeng ini bala Tuhan Allah: Ui ini bunu' muyuh. Ui miak ngalap dumbaKu rat nemuyuh pelé muyuh na mangun ku lun matar nedeh, pad muyuh na ngerawé burur muyuh sebuleng mo'. Ui ngalap dumbaKu rat nemuyuh pad muyuh na kuman nedeh.

Lun Matar Luk Do'

¹¹ “Kudeng ini bala Tuhan Allah: Ui ini nakap dumbaKu idi ngasa' nedeh,

¹² mepad kudeng lun matar ngasa' dumbaneh luk pangeh nepatad idi teh luk mepamung. Ui nguit nedeh muli' rat su lukinandeh nepatad kareb aco susa' luk medacem ineh.

¹³ Ui nguit nedeh remuat rat bang bawang baken, pelé ngamung nedeh idi nguit nedeh muli'. Ui maman nedeh luun pegkung Israil, idi tangeb abpa' idi bang anid bawang su luk inan lemulun tudo.

¹⁴ Ui nima' nedeh kuman déi' laman luk luun pegkung idi luk luun raked dengan na susa'.

¹⁵ Ui ini mangun ku lun matar dumbaKu idi nakap su luk inandeh ngato erurdeh, Ui ini Tuhan Allah pangeh nepebala.

¹⁶ “Ui miak nakap dumba luk netutu', nguit muli' dumba luk neraruh, ngabet urat dumba luk murat, ngedo' dumba luk mét, idi ngasa' dumba luk melamu idi luk metueh, ngaceku Ui ini Lun Matar luk nganau' luk matu.

¹⁷ “O dumbaKu, kudeng ini bala Tuhan Allah: Ui miak ngukum anid burur muyuh pelé ngatad luk do' ratnan luk dat, ieh ineh Ui ngatad dumba ratnan amék.

¹⁸ Naké muyuh mawang niat kuman uduh luk do'? Ngudehké muyuh ngeradu' uduh luk ketecan ku kukud muyuh? Naké muyuh mawang niat ngirup abpa' luk melio? Ngudehké muyuh ngelutut abpa' luk ketecan ku kukud muyuh?

¹⁹ Petuluké dumbaKu luk baken kuman uduh luk ridu' muyuh, id ngirup abpa' luk linutut muyuh?

²⁰ “Ngaceku ineh, kudeng ini bala Tuhan Allah: Ui ngukum nemuyuh, pad ngatad dumba luk melamu ratnan dumba luk merugu'.

²¹ Muyuh nemanul dumba luk mét idi nengagkul nedeh ratnan sengeriudan.

²² Iamo' Ui miak ngulun dumbaKu, pad ideh na uen muyuh ngedereh teh.

²³ Ui maré kuandeh demulunKu Daud ku Lun Matar nedeh, idi Ieh miak ngasa' nedeh.

²⁴ Ui ini Tuhan, mangun ku Allahdeh, idi demulunKu Daud mangun ku Raca'deh. Ui pangeh nepebala.

²⁵ Ui nganau' aceh jani' kuandeh luk maré ulun kuandeh. Ui nala' amung pung luk mesangit rat bang bawang ineh, pelé dumbaKu mulun dengan do' bang laman idi rudap bang pulung pana'.

²⁶ “Ui ngeperuan nedeh idi nima' nedeh nalan libut-libut pegkungKu luk meligan. Ui ngeperuan nedeh ku udan bang kareb luk petulu.

²⁷ Amung kayuh miak kebua', lati' inan uli', idi amung lemulun do' udeng bang bawangdeh sebuleng. Kareb Ui muit pupuKu rat nelun luk nenaban nedeh, kareb Ui mutut kalingdeh, idi ideh miak kali' Ui ini Tuhan.

²⁸ Lun luk na manu na miak ngaro nedeh baruh, idi pung luk mesangit na miak ngaté idi kuman nedeh. Ideh do' udeng idi na lun ngatot nedeh.

²⁹ Ui maré nedeh tana' luk mebaleng, pad na lun melau bang bawang ineh. Lun pupu baken na situnga nedeh baruh.

³⁰ Amung lemulun miak kali' Ui ini lun matar Israil, idi ideh luk mangun ku pupuKu. Ui ini Tuhan Allah pangeh nepebala.

³¹ “O dumbaKu luk sengeriudan luk paninKu, muyuh ineh lemulun, idi Ui ini Allah muyuh.” Kudeng ini bala Tuhan Allah.