YEHISKIEL 32 - BALA LUK DO'

Raca' Pinginud Buayeh

¹ Aceh aco bulan pulu' dueh bang lak luk kepulu' dueh, kebala Tuhan negku,

² “O lemulun, nganau' aceh tido kuan raca' Masir rat Negku, kebalamu: Iko siayu mepad kudeng balang arang amung pupu, iamo' iko mepad kudeng buayeh luk mesibur bang abpa'. Iko nganau' abpa' melutut ku kukudmu, idi iko ngelutak abpa'.

³ Kareb mula' pupu mepamung, Ui miak ngakem namu bang rabatKu idi nima' nedeh nginat rabat ineh.

⁴ Ui miak ngebpeh namu luun tana', pad amung pung idi amung suit miak amé' kuman namu.

⁵ Ui mapen pegkung idi raked ku butungmu luk melu.

⁶ Ui ngeba' tana' ini ku dara'mu, pad pegkung uen mapen idi arur uen manu'.

⁷ Kareb Ui ngaté namu, Ui ngedacem langit idi ngilep gituen. Ui ngelinged aco ku laput idi bulan pana' na macang.

⁸ Ui miak ngilep amung acang bang langit, pad tana'mu ineh medacem. Ui ini Tuhan Allah pangeh nepebala.

⁹ “Mula' pupu miak mesusa' kareb Ui mada' bala ratnan atému bang bawang luk na inanmu pekalai.

¹⁰ Luk ruenKu namu miak ngagap mula' pupu. Kareb Ui ngeliling pelapetKu, raca'-raca' megegker ku tot. Kareb iko mebpeh, amung-amungdeh megegker ngerawé ulundeh sebuleng.”

¹¹ Kebala Tuhan Allah kuan raca' Masir, “Iko amé' matun pelapet raca' Babil.

¹² Ui nima' bunu' ratnan pupu-pupu luk na méi' nginat pelapetdeh pad ngaté nelun mula'. Ideh miak ngusag amung-amung luk inanmu medita' niat idi ngaté anak itinmu.

¹³ Ui ngaté sapi'mu déi' su luk inandeh ngirup abpa'. Na lemulun idi sapi' ketecan pad ngelutut abpa'.

¹⁴ Ui nima' amung abpa'mu melio, idi arur muyuh pana' manud ulai-ulai. Ui ini Tuhan Allah pangeh nepebala.

¹⁵ Kareb Ui nganau' Masir mangun ku su luk ali-ali idi ngaté amung lemulun luk tudo su ineh, ideh miak kali' Ui ini Tuhan.

¹⁶ Bada' ini luk meberat miak mangun ku aceh tido. Decur ratnan anid pupu miak menani tidu ineh kuan Masir idi amung pupuneh. Ui ini Tuhan Allah pangeh nepebala.”

Su Luk Inan Até

¹⁷ Pulu' limeh aco bulan bang lak luk kepulu' dueh, kebala Tuhan negku,

¹⁸ “O lemulun, nangi' idi temido kuan amung lun Masir. Ngecuk nedeh amé' su luk inan até dengan pupu baken luk mebala.

¹⁹ Kebalamu nedeh: Meluunké taga muyuh rat nelun baken? Amé' telubid bang tanem lun luk na manu.

²⁰ “Ideh miak meluka' dengan lemulun luk pitayen bang bunu'. Pelapet temina' ngaté amung-amung lemulun bang bawang Masir.

²¹ Lun luk meluun sangit idi lun luk nengedengan nedeh bang bunu' nawar nelun Masir amé' su luk inan até. Kebaladeh, ‘Lun luk na manu luk pinaté bang bunu' pangeh netemurun idi netelubid su ini!’

²² “Asur pana' idi déi' dengan amung tanem bawehneh. Amungdeh ineh pinaté bang bunu',

²³ idi tanemdeh idi bang su luk meluun dalem déi' su luk inan até. Amung lun pebunu' Asur pinaté bang bunu' idi tanemdeh pekelibut lungun Asur ineh. Iamo' atun ideh ngatot lemulun bang tana' ini.

²⁴ “Elam pana' idi déi' dengan amung tanem bawehneh. Amungdeh ineh pinaté bang bunu' idi netemurun dengan na sinunat iné' su luk inan até. Kareb ideh mulun ideh ngatot, iamo' nekini ideh pangeh naté idi inigu'.

²⁵ Elam telubid arangdeh luk pinaté bang bunu', idi tanem bawehneh pekelibut neneh. Amungdeh ineh na sinunat idi pinaté bang bunu'. Kareb ideh mulun ideh ngatot, iamo' nekini ideh pangeh naté idi inigu', mepad kudeng lun baken ineh luk pinaté bang bunu'.

²⁶ “Misek idi Tubal pana' idi déi' dengan amung tanem bawehneh. Amungdeh ineh na sinunat, idi pinaté bang bunu'. Iamo' atun ideh nengatot lemulun bang tana' ini.

²⁷ Kareb ideh tinanem na ideh inubur mepad kudeng lun mesangit bang kareb luk mon, luk iné' su luk inan até dengan ayung lun pebunu', pelapet iang pudakdeh, idi utap luun ruukdeh. Atun lun mesangit ini metueh, pad ngatot lemulun bang tana' ini.

²⁸ “Kudeng ineh lun Masir uen ngelaya' pad ideh telubid arang lun luk na sinunat luk pinaté bang bunu'.

²⁹ “Edom pana' idi déi' dengan raca'neh idi lun luk ngimet neneh. Atun ideh lun pebunu' luk metueh, iamo' nekini ideh telubid déi' su luk inan até dengan lun luk na sinunat luk pinaté bang bunu'.

³⁰ “Amung lun luk ngimet rat pa tinueh busat aco idi déi' dengan lun Sidon. Atun ideh ngatot, iamo' nekini ideh temurun amé' su luk inan até dengan igu' pad perurum dengan lemulun luk pinaté bang bunu', idi tinamen dengan na sinunat.

³¹ “Kareb raca' Masir nier nedeh, ieh miak buken ratnan aténeh sebuleng idi ratnan até bawehneh luk pinaté bang bunu',” kebala Tuhan Allah.

³² “Ui nenima' raca' Masir ngatot lemulun bang tana' ini, iamo' ieh pitayen dengan amung bawehneh idi tinamen dengan lun luk na sinunat luk maté bang bunu'.” Tuhan Allah pangeh nepebala.