YEHISKIEL 3 - BALA LUK DO'

¹ Kebala Allah, “O lemulun, do' iko kuman surat ini, idi amé' pebala nelun Israil.”

² Idi ui nengukab tangku, idi Ieh nemaré surat ineh kenenku.

³ KebalaNeh, “O lemulun, kuman surat ini luk barénKu namu. Ngebor batekmu ku ineh.” Ui nekuman ineh, idi ieh mén mepad kudeng duru' tebikan.

⁴ Idi kebala Allah, “O lemulun, amé' nelun Israil, idi mada' nedeh ratnan luk belénKu namu.

⁵ Na Ui ngecuk namu amé' nan pupu luk mikat buri'. Ui ngecuk namu amé' nelun Israil.

⁶ Kudeng Ui ngecuk namu amé' inan pupu luk rayeh luk mikat buri' luk na kali'mu, ideh pian ninger balamu.

⁷ Iamo' lun Israil na pian ninger balamu. BalaKu pana' ideh na ninger. Amung-amungdeh metueh niat na maya' bala.

⁸ Nekini Ui miak nganau' namu metueh niat idi mekuu' mepad kudeng ideh.

⁹ Ui miak nganau' namu meluun tueh ratnan batu, idi mepad tueh kudeng batu luk meraga. Aleg iko matot inan lemulun luk sikal metueh.”

¹⁰ Kebala Allah, “O lemulun, ninger do'-do' idi ngerawé amung-amung luk belénKu namu.

¹¹ Idi amé' inan pupumu luk tiban idi mada' nedeh ratnan luk belénKu nedeh, kudeng ideh ninger balaKu, kian na lek.”

¹² Idi Roh Allah nengikit negku, idi ui neninger aceh arod pa ketedku luk mepad rayeh kudeng uni ruyuh tana', kebalaneh, “Ngubur rayeh Tuhan luk déi' dita'!”

¹³ Ui neninger uni ilad pung ineh mebabpet déi' arang gawa', idi teh uni roda ineh pana' mepad rayeh kudeng uni ruyuh tana'.

¹⁴ Kareb Roh Allah nengikit idi nenguit negku, idi ui dat niat idi museh, idi lalud Tuhan neketukan luunku.

¹⁵ Ui iné' su luk inan lun luk tiban tudo déi' Tel Abib, luk déi' tangeb Abpa' Kibar, idi ui netudo déi' tudu' aco kinioneh dengan pelaba awa.

Allah Ngecuk Ni Yehiskiel Mangun Ku Lun Luk Matar Bawang

¹⁶ Pangeh tudu' aco, idi Tuhan nepebala negku.

¹⁷ KebalaNeh, “O lemulun, Ui nganau' namu mangun ku lun luk matar bawang kuan pupu Israil. Do' iko mada' balaKu nedeh.

¹⁸ Kudeng Ui mala seburur lemulun luk dat miak maté, idi kudeng iko na ngecuk neneh ngisu' kekamenneh pad ieh mulun, ieh miak maté bang sala'neh, idi iko luk mabeh aténeh pa kiungKu.

¹⁹ Kudeng iko mada' lemulun luk dat, idi na ieh ugka' nganau' luk dat, ieh miak maté bang sala'neh, iamo' Ui ngulun namu.

²⁰ “Kudeng lemulun luk do' ngimun nganau' luk dat, idi Ui tumen abpung kuanneh, kali' rungen ieh maté kudeng iko na mada' neneh. Ieh miak maté ngaceku sala'neh, idi Ui na ngerawé kekamen luk do' luk inau'neh atun. Idi iko mabeh aténeh pa kiungKu.

²¹ Kudeng iko mebpeng lemulun luk do' na nganau' sala, pad ieh ninger balamu idi na nganau' sala', ieh miak mulun, idi iko pana' uenKu ngulun.”

Yehiskiel Na Miak Peburi'

²² Idi lalud Tuhan neketukan luunku, idi ui neninger balaNeh negku, “Tumui iko idi amé' luun raked. Idi Ui miak pebala namu déi'.”

²³ Id ui iné luun raked, idi su ineh ui nenier rayeh Tuhan, mepad kudeng luk sinierku déi' tangeb Abpa' Kibar. Idi ui netekeradung luun tana',

²⁴ iamo' Roh Allah nesemuet bang negku idi nenui negku. Idi kebala Tuhan negku, “Do' iko muli', semuet bang ruma'mu idi ngitek tanga' ruma'mu ineh.

²⁵ O lemulun, iko miak batin ku kalat, pad iko na miak mepai.

²⁶ Ui miak ngaté urat dila'mu, pad iko na miak mada' lemulun ini luk sikal metueh.

²⁷ Idi kareb Ui pebala namu teh idi iko miak peburi', iko miak pebala nedeh, ‘Kudeng ini bala Tuhan.’ Sebuang miak ninger balamu, idi sebuang na ninger, ngaceku ideh ineh aceh pupu luk sikal metueh.”