YEHISKIEL 28 - BALA LUK DO'

Bada' Luk Biré Tuhan Ratnan Raca' Sur

¹ Kebala Tuhan negku,

² “O lemulun, mada' Raca' Sur ratnan luk belén Tuhan Allah neneh: ‘Iko pelaba dita' niat, pad iko mala iko aceh allah. Kebalamu, “Ui mepad kudeng aceh allah luk tudo luun kerusineh, luk linibut abpa' rayeh.” Sagan tu pana' iko siayu mangun ku aceh allah, setuneh iko lemulun idi baken Tuhan.

³ Iko ngerawé iko meluun ileh ratnan Danel, pad na luk uen ngalum rat namu.

⁴ Dengan ileh idi terawému iko mangun ku lun do' ku binaweh amas idi pirak.

⁵ Iko pangeh megéi' pepua' dengan ilehmu, pad iko mula' utung. Iko medita' niat ngaceku iko mula' binaweh.’

⁶ “Ngaceku ineh kudeng ini bala Tuhan Allah: ‘Ngaceku iko ngerawé iko mepad ileh kudeng aceh allah,

⁷ Ui miak ngecuk bunu' luk na méi' ngerieng namu. Ideh miak ngusag amung binaweh luk ilapmu ku ileh idi terawému.

⁸ Ideh miak ngaté namu idi nala' butungmu bang abpa' rayeh.

⁹ Kareb ideh macing ngaté namu, miakké iko pebala iko allah? Kareb iko tuped pa kiung lun luk ngaté ngamu iko lemulun teh idi baken Tuhan.

¹⁰ Iko maté mepad kudeng uko', bang palad lun pupu baken luk na manu nan Allah. Ui ini Tuhan Allah pangeh nemutut Ukum.’ ”

Ebpeh Raca' Sur

¹¹ Kebala Tuhan negku teh,

¹² “O lemulun, do' nganau' aceh tido kuan Raca' Sur luk kumin, idi mada' neneh, kudeng ini bala Tuhan Allah: ‘Atun iko mangun ku pinginud ratnan luk meligan. Iko mileh idi metaga!

¹³ Iko tudo déi' Eden, bang kabun Allah, idi nengayung ku batu luk meraga, ieh ineh batu luk mesia', batu intan, batu luk mebirar, batu luk bata' melaco, bau burur, batu luk mebirar luk mesilo; batu luk bata' langit, batu luk bata' uduh, idi batu luk sia' merirem. Iko nengayung ku amas. Ayung amas ineh inau' kuanmu kareb aco luk inanmu pinudut.

¹⁴ Ui nengecuk seburur melaikat luk inan matot matar namu su ineh. Iko tudo luun pegkungKu luk meligan idi nenalan arang batu luk meraga idi mesilo.

¹⁵ Kekamenmu do' rat karebmu pinudut pad macing iko nganau' luk dat.

¹⁶ Iko megagau pepua', pad iko mesala' idi ngedereh lemulun. Idi Ui nengusu namu ratnan pegkungKu luk meligan. Melaikat luk nematar namu nengusu namu rat arang batu luk meraga idi mesilo.

¹⁷ Iko medita' niat ku tagamu, idi iko mebacé ngaceku rayehmu. Ui nenala' namu luun tana' pad iko mangun ku bada' kuan raca' baken.

¹⁸ Sala'mu pelaba rayeh kareb iko pepua', pad su luk inanmu sembayang pana' linutak. Idi Ui nengeseb bawang ineh pad iko mangun ku abuh siren lun baken.

¹⁹ Iko metutu' ruked-ruked, idi amung pupu baken luk pekalai namu pelaba tot, ngaceku kian ideh mekaneh ukummu lek.’ ”

Bada' Luk Biré Tuhan Ratnan Sidon

²⁰ Kebala Tuhan negku,

²¹ “O lemulun, do' ngadu' bawang Sidon,

²² idi mada' luk belén Tuhan Allah nedeh, kebalamu, ‘Ui ini bunu'mu, O Sidon. Ui miak buren lun ngaceku ukumKu namu. Ideh miak kali' Ui ini Tuhan, kareb Ui ngegala' liganKu idi ngukum lemulun luk tudo bang namu.

²³ Ui maré ét namu, idi ngutang dara' luun dalanmu. Iko uen ngerieng rat selipa idi rat pa selipa, pad pupumu pitayen, pad iko kali' Ui ini Tuhan.’ ”

Israil Uen Ngeperuan

²⁴ Kebala Tuhan, “Pupu baken libut-libut bawang Israil luk nesitunga neneh na mangun ku tabpa' luk ngurat Israil sekua' teh, pad ideh kali' Ui ini Tuhan.”

²⁵ Kebala Tuhan Allah, “Ui nguit nelun Israil muli' ratnan bawang su luk inanKu nengatad nedeh, pad amung-amung pupu kali' Ui ini meligan. Lun pupu Israil miak tudo bang bawangdeh sebuleng luk biréKu kuan demulunKu Yakub,

²⁶ dengan do' udeng. Ideh mudut ruma' idi teh ideh nibu anggur. Ui miak ngukum nelun dengandeh luk nesitunga nedeh, pad Israil do' udeng pelé ideh kali' Ui ini Tuhan Allahdeh.”